سۋرەتتى تۇسىرگەن – اۆتور
حالقىمىز «جەتىم كورسەڭ, جەبەي ءجۇر», دەپ بەكەر ايتپاعان. تاعدىر تالقىسىنا ەرتە تۇسكەن جەتىم بالالاردىڭ كوڭىلىن اۋلاپ, جانىنا دەمەۋ بەرۋ, قامقورلىق كورسەتۋ – يگى ءىس.
وسىدان ءتورت جىل بۇرىن پاۆلودار قالاسىنداعى «جاس دارىن» مامانداندىرىلعان مەكتەپ-ليتسەيى «وقۋشىدان-وقۋشىعا» دەگەن ءبىلىم جوباسىن باستاپ, ول بۇگىندە وڭىردەگى ناتيجەلى باستامانىڭ بىرىنە اينالىپ ۇلگەردى. قازىرگى ۋاقىتتا جاس دارىندىق 23 وقۋشى «كەنجەكول وتباسىلىق ۇلگىدەگى بالالار اۋىلىندا» تاربيەلەنىپ جاتقان جەتىم جانە اتا-انا قامقورلىعىنسىز قالعان بالالارعا بوس ۋاقىتتارىندا قوسىمشا ساباق ۇيرەتەدى. ونىڭ ارقاسىندا بالالار ۇيىندە تۇراتىن جاسوسپىرىمدەردىڭ مەكتەپتەگى ساباقتارى دۇرىستالىپ, ءتاۋىر باعالار الا باستاعان. ءتىپتى ولاردىڭ الدى وبلىس ورتالىعىنداعى دارىندى بالالارعا ارنالعان مەكتەپتەرگە اۋىسىپ, وقي باستاعان.
– وتباسىلىق ۇلگىدەگى اۋىلىمىزدا 70 بالانى تاربيەلەپ وتىرمىز. ولار كادىمگى مەكتەپتەردە ءبىلىم الادى. بىراق بىلىمدەرىن قوسىمشا جەتىلدىرۋ ءۇشىن رەپەتيتور جالداۋعا بىزدە قاراجات جوق. ءبىزدى بۇل قيىندىقتان دارىندى بالالار قۇتقارىپ وتىر. اتاپ ايتقاندا, 23 بالامىز «وقۋشىدان – وقۋشىعا» جوباسىنىڭ يگىلىگىن كورىپ وتىر. ولار ماتەماتيكا, اعىلشىن, قازاقستان تاريحى, بيولوگيا سياقتى نەگىزگى پاندەردەن قوسىمشا ساباقتار الادى, تۇسىنبەگەن تاقىرىپتارىن ناقتىلايدى. ءتيىمدى ءادىستىڭ ارقاسىندا ءبىلىمنىڭ ساپاسى كوتەرىلىپ كەلە جاتىر. ءتورت جىل ىشىندە ءبىزدىڭ تاربيەلەنۋشىلەر كوپ ناتيجەگە قول جەتكىزدى. ەڭ اۋەلى 14 بالامىز بۇگىندە پاۆلودارداعى دارىندى وقۋشىلارعا ارنالعان مەكتەپتە وقيدى. ءبىر تۇلەگىمىز كاسپي ۋنيۆەرسيتەتىنىڭ ءبىلىم گرانتىن يەلەندى. بالا مەن بالا سويلەسكەندە ساباقتىڭ جەڭىل قابىلداناتىنىن بايقايمىز. تاربيەلەنۋشىلەرىمىزگە تەگىن قوسىمشا ءبىلىم ۇسىنىپ وتىرعان ليتسەي وقۋشىلارىنا العىسىمىز شەكسىز! – دەيدى كەنجەكول اۋىلىنداعى بالالار اۋىلىنىڭ باسشىسى ايجان شامعاليەۆا.
نەگىزى بۇل يدەيانىڭ اۆتورى – «جاس دارىن» مامانداندىرىلعان مەكتەپ-ليتسەيىنىڭ ديرەكتورى گۇلنار جانعازى. العاشقىدا بۇل ىسكە 7–8 وقۋشىنى جۇمىلدىرىپ, ءتيىمدىلىن بايقاعان سوڭ قوسىمشا ءبىلىم بەرۋگە ىنتالى وزگە دارىندى بالالاردى تارتا باستاعان.
– 2021 جىلى مەكتەبىمىز بەن بالالار اۋىلى اراسىندا ارنايى مەموراندۋم قابىلدادىق. وقۋشىلارىمىز ۇيرەتەتىن قوسىمشا ءبىلىم تەگىن ءارى ونلاين تۇردە وتەدى. ءبىزدىڭ مەكتەپتە دارىندى بالالار جەتكىلىكتى. ولاردىڭ الەۋەتىن جەتىم بالالاردى دامىتۋعا باعىتتاساق, ودان ۇتىلمايتىنىمىزدى ءبىلدىم. وقۋشىلار العاشقىدا مۇنداي بالالار اۋىلى بارىن بىلمەيتىن. جەتىم بالالاردىڭ تاعدىرلارى تۋرالى ايتقانىمىزدا, وقۋشىلارىمىزدىڭ بويىندا جاناشىرلىق سەزىمدەرى وياندى. كەيىن مۇنداي جوبانىڭ بار ەكەنىن اتا-انالارعا حاباردار ەتتىك. ەرەسەكتەر بالالارىنىڭ يگى ىسپەن اينالىسىپ جۇرگەندەرىن ەستىگەندە كوزدەرىنە جاس الىپ, قاتتى تولقىدى. كەيىن ءتىپتى ولاردىڭ قوسىمشا ساباقتاردى تۇراقتى وتكىزۋلەرىن قاداعالاي باستادى. بالالارى ساباق وتكىزەر الدىندا بولمەلەرىن جيىستىرىپ, ادەمى كيىمدەرىن كيىپ, وزدەرىن ەرەسەك ادامدارشا ۇستايتىندارىن ايتىپ كەلەدى اتا-انالارى. مۇنىڭ بارلىعى ءبىزدى قۋانتادى, – دەيدى مەكتەپ باسشىسى.
قازىرگى ۋاقىتتا «جاس دارىن» بويىنشا 8–11-سىنىپتارداعى وقۋشىلار بۇل ىسپەن تۇراقتى شۇعىلدانا باستاعان. ايتۋلارىنشا, بالالار ۇيىندەگى تاربيەلەنۋشىلەر كوبىنە قيىن تاقىرىپتاردى مەڭگەرۋ ءۇشىن, ءبولىم بويىنشا جيىنتىق باعالاۋلار كەزىندە ءجيى حابارلاسادى ەكەن. ءسويتىپ, ەكەۋارا ۋاقىتىن كەلىسىپ, ساباقتى ونلاين تۇردە وتكىزەدى.
– 11-سىنىپتا وقىپ جاتىرمىن. سوفيا ەسىمدى 10-سىنىپ وقۋشىسىنا بوس ۋاقىتىمدا بيولوگيادان قوسىمشا ساباقتار وتكىزەمىن. سوفيا الدا وتەتىن تاقىرىپتار تۋرالى, قانداي ۋنيۆەرسيتەتتەرگە تۇسۋگە بولاتىنىن كوپ سۇرايدى. كەيدە ءوزىم بىلمەيتىن تۇستارىمدى وسىنداي ساباقتار ارقىلى قايتادان زەرتتەپ الامىن. اتا-انام مەنى ۇنەمى قولدايدى. ولار بۇل ءىسىمنىڭ ەكى جاققا دا پايدالى ەكەنىن جاقسى تۇسىنەدى, – دەيدى دارىندى جاس الديار تۇمەنباەۆ.
ال 11-سىنىپتىڭ تاعى ءبىر وقۋشىسى نۇرايىم جانعازى بالالار اۋىلىندا تۇراتىن ارتەم گەراسيمچۋككە اعىلشىن تىلىنەن كومەكتەسىپ ءجۇر. ايتۋىنشا, ارتەم اعىلشىنشا ءتىلىن سىندىرىپ, اجەپتاۋىر ۇيرەنىپ قالعان. مەكتەپتە ۇزدىك باعالار الىپ جۇرگەنىن ايتىپ ماقتانادى.
– بۇل مەنىڭ ءوز ىنتام. وزگە بالالارمەن تەز ءتىل تابىسا الامىن. كەنجەكولدەگى بالالار ۇيىندە بىرنەشە مارتە بولىپ, ارتەممەن كەزدەستىم. ونىڭ ۇيرەنۋگە دەگەن ىنتاسى بار. وتە سىپايى, مەيىرىمدى بالا. ارمانى كوپ, فۋتبول ويناعاندى ۇناتادى, – دەيدى نۇرايىم.
وقۋشى قىز بوس ۋاقىتىندا مۋزىكا تىڭداپ, بي بيلەگەندى ۇناتادى. ءوز سىنىپتاستارى اراسىندا بالالار ۇيىنە قامقور بولىپ جۇرگەن قۇربى-قۇرداستارى بارشىلىق ەكەنىن جەتكىزدى.
بالالار اۋىلىنىڭ تاربيەلەنۋشىسى الۆينا ميرونوۆا جاس دارىندىقتارعا العىسى شەكسىز ەكەنىن ايتادى. ول اعىلشىن تىلىنەن ساباقتار ۇيرەنىپ, كۇندەلىگىندە بەستىكتەر پايدا بولا باستاعان.
ال اندرەي گولوۆانوۆ ينفورماتيكادان, ارتۋر شكرەبەتس ماتەماتيكادان وقۋ ۇلگەرىمدەرى كوتەرىلىپ قالعاندارىن جەتكىزدى.
«جاس دارىن» مەكتەبىنىڭ ۇستازدارى مەن اتا-انالار قاۋىمى كەنجەكول بالالار اۋىلى تاربيەلەنۋشىلەرىنىڭ تىلەكتەرىنە ۇنەمى نازار اۋدارىپ, ناۋرىز جانە جاڭا جىل مەرەكەلەرىندە سىيلىقتار جاسايدى. ماسەلەن بيىلعى جاڭا جىلدا 6 بالانىڭ اياز اتاعا جازعان حاتى «جاس دارىننىڭ» جومارت جاندارىنا تاپ بولىپتى. مەرەكە قارساڭىندا جەتكىنشەكتەر ولاردىڭ تاراپىنان مول سىيلىققا كەنەلىپ, كوڭىلدەرى جارقىراي ءتۇستى.
اتاپ وتەرلىگى, 2024 جىلى قامقورشىلار كۇنىنە وراي «جاس دارىننىڭ» بەلسەندى وقۋشىلارى ساۋاپتى ىستەرى ءۇشىن پاۆلودار وبلىسى اكىمىنەن العىسحات العان.
پاۆلودار وبلىسى
