وستاپ بەندەردىڭ شوبەرەلەرى شىمكەنتتە ءجۇر

ۇستىنە ءبىر شەلەك سۋ قۇيساڭ دا قۇرعاق شىعاتىن اتاقتى وستاپ بەندەردىڭ اعايىندارى شىمكەنتتە بوي كورسەتە باستادى. ولار الدەبىر تۇتىنۋشىلار وداعىنىڭ اتىن جامىلعان قوعامدىق بىرلەستىكتەردىڭ كۋالىگىن جان قالتالارىنا سالىپ العان. اڭديتىندارى – شاعىن كاسىبى بار كاسىپكەرلەر. باسپالاپ كەلەدى. وكتەم سويلەيدى. كەلىسىمشارتقا تۇرىپ اقشا تولەۋدى تالاپ ەتەدى. باسىنان باستايىقشى. وڭ­تۇستىك قازاقستان وبلىسىنىڭ كاسىپكەرلەر پالاتاسىنا شىم­كەنتتىڭ تۇرعىنى, شاعىن كاسىپكەر اينۇر بەسباەۆا ءوز باسىنان ءوت­كەن احۋالدى ايتىپ شاعىنادى. شا­عىن دۇكەنى بار. بىرەۋدەن ىلگەرى, بىرەۋدەن كەيىن ءومىر ءسۇرىپ, تاعدى­رىنا شۇكىرشىلىك ايتىپ جۇرگەن. ءبىر كۇنى دۇكەنىنە سىپ ەتىپ التى بىردەي ايەل, ەركەگى ارالاس توپ كىرىپ كەلەدى. تۇتىنۋشىلاردىڭ قۇقىعىن قورعاۋ ورنىنانبىز دەپ سەندىرەدى. كۋالىكتەرىن كور­سەتەدى. «قۇقىعىڭدى قورعاي­مىز, مەملەكەتتىك ورگاندار ارا­سىنداعى تۋىنداعان پروبلەمالار­دى ىڭ-شىڭسىز شەشىپ بەرەمىز», دەيدى. بىلاي ايتقاندا, توبەسىنەن سۋ وتپەيتىن بەرىك شاتىر. اينۇر سەنەدى. كەلىسىمشارتقا وتىرادى. سۇراعان اقشاسىنىڭ جارتىسىن سول جەردە قولما-قول ساناپ بەرەدى. كەيىنىرەك تەكسە­رۋشىلەر كەلە باستاعاندا الگى «كرىشالارىنا» تەلەفون شالماي ما؟! تەلەفوندارى ءوشىرۋلى, جۇمىس ورنىنىڭ تەلەفونى دا ءۇنسىز. ارادا ءبىراز ۋاقىت وتكەن سوڭ ەرلى-زايىپتى قۇقىق قورعاۋ­شىلار كەلگەن. كەلىسىمشارتقا وتىرىپ, اقشاسىن تولەسە سانيتار­لىق-ەپيدەميولوگيالىق ستانسا, سالىق ورگاندارى سياقتى قازىنالىق ورگانداردا تۋىنداعان ماسەلەنى شەشىپ بەرەدى ەكەن. العاشقىدان اۋزى كۇيگەن اينۇر بەسباەۆا ۇمىتتەندىرمەي شىعارىپ سالادى. ءۇشىنشىسى بۇل جوقتا دۇكەنگە كەلىپتى. ساتۋشى قىزدار ابىرجىپ الگىنى تەلەفونعا قوسادى. شاڭقىلداپ تۇرىپ ۇرىسىپتى اينۇرعا. «ەگەر مەنىمەن جۇ­مىس جاسامايتىن بولساڭ, تۇقى­مىڭدى تۇزداي قۇرتامىن, مەملەكەتتىك ورگانداردان تەكسەرۋ ۇيىمداستىرىپ, دۇكەنىڭدى جاپتىرامىن». اينۇر قۋلىققا باسىپ: «تۇرا تۇرىڭىز, قازىر سىزبەن سويلەسەتىن جاۋاپتى ورگاننىڭ ادامى بارادى», دەگەن ەكەن, الگى جەر تەپسىنىپ تۇرعان دەرەۋ تايىپ تۇرىپتى. وبلىستىڭ كاسىپكەرلەر پالاتاسىندا وتكىزىلگەن ءباسپاسوز ءماسليحاتىندا دەپارتامەنتتىڭ اكىمشىلىك كەدەرگىلەردى ازايتۋ ءبولىمىنىڭ جەتەكشىسى تي­مۋر ناقىپبەكوۆ اينۇر ايت­قان پروبلەمانىڭ جالعىز وقيعا ەمەستىگىن جەتكىزدى. مىسىق­تابانداعان قۇقىق قورعاۋشىلار زاڭگەرلەرى بار ۇلكەن بيزنەس ورتالىقتارىنا بارمايدى ەكەن. ولاردىڭ اڭدىعانى بەينەكامەراسى جوق شاعىن دۇكەن, شاعىن ءدارىحانا, جول بويىنداعى بۋدكا-دۇكەن. سۋىت كىرەدى, بۇيىرعانىن الىپ تايىپ تۇرادى. كاسىپكەرلەر پالاتاسىنا كەن­تاۋ قالاسىنان ونشاقتى شا­عىن كاسىپكەرلەر قول قويعان ارىز تۇسكەن. تۇتىنۋشىلار ودا­عىنانبىز دەپ كۇشەنىپ كەلگەندەر دۇكەن سورەلەرىن ارالاپ, تاۋارلاردىڭ ساقتاۋ مەرزىمىن تەكسەرگەن. سوڭى: «ءبىز تۇرعاندا ەشكىم بەتىڭە جەل بولىپ تيمەيدى, كە­لى­سىمشارتقا وتىرىپ اقشا تولەپ تۇرساڭ بولعانى», دەگەن ءۋاج. وسىنداي وقيعالار سايرام, بايدىبەك اۋداندارىنىڭ شاعىن كاسىپكەرلەرىندە دە كەزدەسىپتى. تيمۋر ناقىپبەكوۆ جۋرناليست اعايىنداردان كومەك سۇرادى. ءار اۋدان, قالادا پروكۋراتۋرانىڭ جانىندا كاسىپكەرلىك پالاتاسىمەن بىرلەسكەن جەدەل توپ بار. قوڭىراۋ تۇسكەن مەزەتتە الاياقتاردى تۇياق سەرپۋگە مۇر­شاسىن كەلتىرمەي ۇستايدى. ازىرگە ولار امان ءجۇر. وڭتۇستىكتە بىرەۋدىڭ بيزنەسى ۇستىنەن جونىپ جەۋ وقيعالارى وسىلايشا كوبەيىپ تۇر. باقتيار تايجان, «ەگەمەن قازاقستان». شىمكەنت.