فوتو: istockphoto.com
ۇكىمەت باسشىسى تەحنولوگيالىق سەرپىلىستىڭ ماڭىزدىلىعىنا توقتالىپ, جاڭا تسيفرلىق ونىمدەردىڭ پايداسىن ءاربىر ازامات سەزىنۋى ءتيىس ەكەنىن اتاپ ءوتتى.
«مەملەكەت باسشىسى 2026 جىلدى تسيفرلاندىرۋ جانە جاساندى ينتەللەكت جىلى دەپ جاريالادى. ءبىزدىڭ باستى ماقساتىمىز – ەكونوميكانىڭ بارلىق سالالارىنا سەرپىندى تەحنولوگيالاردى ەنگىزۋ. جاڭا تسيفرلىق ونىمدەردىڭ وڭ ناتيجەسىن ءار ازامات سەزىنۋگە ءتيىس», دەدى ولجاس بەكتەنوۆ.
جاساندى ينتەللەكت جانە تسيفرلىق دامۋ مينيسترلىگىنىڭ مالىمەتىنشە, ەلىمىزدە ينتەرنەت ساپاسىن ارتتىرۋ بويىنشا اۋقىمدى جۇمىستار اتقارىلىپ جاتىر:
- 2025 جىلدىڭ قورىتىندىسى بويىنشا 2 606 اۋىل جوعارى جىلدامدىقتى ينتەرنەتكە قوسىلدى. 2026 جىلى تاعى 1 900 ەلدى مەكەندى قوسۋ جوسپارلانعان.
- قازىرگى تاڭدا 5G بايلانىسى ەلىمىزدىڭ 20 ءىرى قالاسىندا قولجەتىمدى.
- بۇگىندە 3 115 اۋىل 4G جەلىسىمەن قامتىلعان بولسا, 2026 جىلى تاعى 836 اۋىل وسى ساپالى بايلانىسقا قول جەتكىزەدى.
پرەمەر-مينيستر تسيفرلاندىرۋ تەك تەحنيكالىق پروتسەسس ەمەس, ەكونوميكانىڭ تيىمدىلىگىن ارتتىراتىن جانە حالىقتىڭ ءومىر ءسۇرۋ ساپاسىن جاقسارتاتىن باستى قۇرال ەكەنىن باسا ايتتى.
