فوتو: AVN
انت بەرۋ كەزىندە رودريگەس ەل حالقىنىڭ باسىنان وتكەن اۋىر كەزەڭدى اتاپ ءوتىپ, مەملەكەتتەگى بەيبىتشىلىكتى قامتاماسىز ەتۋگە بار كۇشىن سالاتىنىن ايتتى. ونىڭ سوزىنشە, ۇلتتىق بىرلىك پەن ۇيىمداسقان حالىقتىڭ قۋاتى ەلدىڭ ەگەمەندىگىن ساقتاۋدىڭ باستى كەپىلى.
دەلسي رودريگەس ۆەنەسۋەلا تاريحىندا اتقارۋشى بيلىكتى باسقارعان العاشقى ايەل اتاندى. ول قازىرگى احۋالدى ەل تۇراقتىلىعىنا تونگەن سىن-قاتەرمەن بايلانىستىرىپ, بەيبىت ءومىردى قامتاماسىز ەتپەيىنشە ءبىر ساتكە دە توقتامايتىنىن مالىمدەدى.
سول كۇنى پارلامەنت وتىرىسىندا ونىڭ اعاسى حورحە رودريگەس ۇلتتىق اسسامبلەيا توراعاسى قىزمەتىنە بەكىتىلدى. ال اقش پرەزيدەنتى دونالد ترامپ ۆەنەسۋەلاعا قاتىستى قىسىمدى كۇشەيتىپ, دەلسي رودريگەستىڭ ەلدەگى وتپەلى كەزەڭگە جاۋاپتى بولاتىنىن مالىمدەگەن.
ءوز كەزەگىندە ۋاقىتشا پرەزيدەنت اقش-پەن ءوزارا ىنتىماقتاستىققا دايىن ەكەنىن ايتىپ, ۆەنەسۋەلانىڭ بەيبىت ءومىر ءسۇرۋى مەن ەگەمەندىگىنە قۇقىعى بار ەكەنىن اتاپ ءوتتى.
دەلسي رودريگەس چاۆيزم باعىتىنداعى ىقپالدى ساياسي تۇلعالاردىڭ ءبىرى سانالادى. زاڭگەر ماماندىعىن العان ول بوليۆارلىق جوبانى قولدايدى. بۇعان دەيىن سىرتقى ىستەر ءمينيسترى جانە اتقارۋشى ۆيتسە-پرەزيدەنت قىزمەتتەرىن اتقارىپ, ۇكىمەتتىڭ ستراتەگيالىق سالالارىندا ساياسي سالماعىن كۇشەيتتى.
اقپارات كوزدەرىنىڭ حابارلاۋىنشا, ول ۋاقىتشا پرەزيدەنت مىندەتىن قازىرگى مەملەكەت باسشىسى نيكولاس مادۋرو امەريكالىق اسكەري قۇرىلىمدار تاراپىنان ۇستالعاننان كەيىن قابىلداعان. مادۋرو مەن جۇبايى سيليا فلورەس نيۋ-يوركتەگى فەدەرالدى سوت الدىندا ەسىرتكى تەرروريزمىنە قاتىستى ايىپتارمەن جاۋاپ بەرىپ جاتىر. ەكەۋى دە وزدەرىنە تاعىلعان ايىپتاردى مويىنداماي, 17 ناۋرىزعا بەلگىلەنگەن قايتا تىڭداۋعا شاقىرىلعان.
بۇعان دەيىن ەدمۋندو گونسالەس ءوزىن ۆەنەسۋەلا پرەزيدەنتى دەپ جاريالاعان بولاتىن.
