قازاقستاندا شاي ونىمدەرىنەن قاۋىپتى قوسپالار انىقتالدى

دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنىڭ حابارلاۋىنشا, ەۋرازيالىق ەكونوميكالىق كوميسسيادان ەاەو ەلدەرىندە وتاندىق وندىرۋشىلەردىڭ جالعان شاي ونىمدەرى ساتىلىپ جاتقانى تۋرالى اقپارات تۇسكەن. وسىعان بايلانىستى قازاقستان اۋماعىندا باقىلاۋ ماقساتىندا سىنامالار الىنىپ, زەرتحانالىق ساراپتاما جۇرگىزىلدى.

زەرتتەۋ ناتيجەسىندە بىرنەشە ۇلگىدەن تاعامدىق ونىمدەردە قولدانۋعا رۇقسات ەتىلمەيتىن مىناداي بوياعىشتار تابىلدى:

• «كۇن باتار تۇستەس» سارى بوياعىش (ە110);
• تارترازين (ە102);
• پونسو 4R (ە124).

سونىمەن قاتار ءونىم سىرتىندا كورسەتىلگەن ءوندىرىس جانە بۋىپ-ءتۇيۋ مەكەنجايلارىنىڭ شىندىققا جاناسپايتىنى بەلگىلى بولدى. كوميتەت ماماندارىنىڭ ايتۋىنشا, بۇل كاسىپورىنداردىڭ قىزمەتىن جۇزەگە اسىرۋعا قاجەتتى رۇقسات قۇجاتتارىنىڭ جوقتىعىن بىلدىرەدى.

ساتۋعا تىيىم سالىنعان شاي اتاۋلارىنىڭ ءتىزىمى:

1. «اپامنىڭ شايى Premium gold», «وردا كەنيا», «ال-قايرات ءشايى Premium gold» – دايىنداۋشى جانە بۋىپ-ءتۇيۋشى: «Orda Trade Astana» جشس, الماتى وبلىسى;

2. «Al-Hayat Golg» – ءوندىرۋشى: «Empire KENIY E.P.Z. Limited», الماتى وبلىسى;

3. «بالقيا Premium gold» – بۋىپ-ءتۇيۋشى: «ال-حاديا» جك (الماتى);

4. «Sultan Suleyman», «Pakistan tea» – ءوندىرۋشى: «Real Trade Astana» جشس (استانا);

5. «Aje Onim» – ءوندىرۋشى: «كالتسي» جشس تاپسىرىسىمەن «وردا چاي» جك (الماتى);

6. «Al-Jannat Premium» – ءوندىرۋشى: «Ferdaus» جك (الماتى);

7. «Alfarah» – قاپتاماسىندا ءوندىرۋشى تۋرالى مالىمەت كورسەتىلمەگەن.