قىزىل كىتاپقا ەنەتىن سۇڭقىلداق اققۋدى اۋىل تۇرعىندارىنىڭ ءبىرى بايقاپ قالعان.
– پاۆلودار اۋدانى مارالدى اۋىلىندا تۇرامىز. 3 قاڭتار كۇنى كەشكىلىك اتا-انامىزعا بارا جاتىپ, ءدال اۋىل شەتىندە قاردا وتىرعان اققۋدى كوردىك. قۇستىڭ ابدەن توڭىپ, اشىعىپ قالعانى بايقالدى, ۇشىپ كەتۋگە شاماسى جوق.
جاقىنداپ كەلگەندە بىزدەن قورقىپ, قاناتىن سابالاپ قاشىپ كەتتى. اۋىلداعى ادامدارعا ايتىپ ەدىك, تۇرعىنداردىڭ جارتىسى بىزگە كەلىپ كومەكتەستى, ءبارىمىز جۇگىرىپ ارەڭ دەگەندە ۇستاپ الدىق, – دەيدى اۋىل تۇرعىنى ميحايل كريۆوبوكوۆ.
پاۆلودار ورمان جانە جانۋارلار دۇنيەسىن قورعاۋ مەكەمەسىنىڭ باسشىسى اجدار ءجۇسىپوۆ قۇتقارىلعان قۇس اققۋدىڭ سۇڭقىلداق تۇرىنە جاتاتىنىن حابارلادى. سۇڭقىلداق اققۋ قازاقستاندا جانە رەسەيدە قىزىل كىتاپقا ەنگەن.
– جالعىز اققۋدى ءبىزدىڭ ورمانشىلارىمىز اۋىلعا بارىپ قابىلداپ الدى. ونى پاۆلودارسكوە اۋىلىنداعى بەلسەندى دەمالىس ورتالىعىنا اكەلىپ ورنالاستىردىق. مۇندا حايۋاناتتاردى ۋاقىتشا ۇستاۋ ورنى بار. بۇعان دەيىن بيىل جىلى جاققا ۇشا الماي قالعان 4 اققۋ وسى ورتالىققا ورنالاستىرىلعان. ەندى ولاردىڭ قاتارىنا بەسىنشىسى قوسىلىپ وتىر. اققۋلاردىڭ بارلىعى كوكتەمگە دەيىن كۇتىلىپ, ۇشىرىلادى, – دەيدى ول.
