فوتو: اشىق دەرەككوز
2025 جىلدىڭ جەلتوقسان ايىنىڭ قورىتىندىسى بويىنشا تەڭگە باعامى 1 دوللار ءۇشىن 505,73 تەڭگەگە دەيىن 1,3%-عا نىعايدى. وسى كەزەڭدە قازاقستان قور بيرجاسىنداعى ساۋدا-ساتتىقتىڭ ورتاشا كۇندىك كولەمى 280 ملن دوللارىنان 359 ملن دوللارىنا دەيىن ارتتى. اي ىشىندەگى جالپى ساۋدا كولەمى 7,9 ملرد دوللارىن قۇرادى.
«جالپى 2025 جىلدىڭ قورىتىندىسى بويىنشا تەڭگە باعامى 3,7%-عا نىعايىپ, ۆاليۋتا نارىعىنداعى وتىمدىلىك ايتارلىقتاي ارتتى», دەپ حابارلادى ۇلتتىق بانك.
جىلدىق ەسەپپەن ساۋدا-ساتتىقتىڭ جيىنتىق كولەمى 15%-عا ۇلعايىپ, 63 ملرد دوللارعا جەتكەن.
ۇلتتىق بانكتىڭ مالىمدەۋىنشە, رەسپۋبليكالىق بيۋدجەتكە ترانسفەرتتەردى قامتاماسىز ەتۋ جانە «تالدىقورعان – ءۇشارال» ماگيسترالدىق گاز قۇبىرىن سالۋ جونىندەگى ينفراقۇرىلىمدىق جوبانى قارجىلاندىرۋ ماقساتىندا 2025 جىلعى جەلتوقسان ايىندا ۇلتتىق قوردان 400 ملن اقش دوللارىنا ۆاليۋتا ساتىلعان.
«بۇل جالپى ساۋدا كولەمىنىڭ شامامەن 5%-ىن قۇرادى», دەلىنگەن حابارلامادا.
سونداي-اق ۇلتتىق بانك 2025 جىلى ۇلتتىق قوردان ساتىلعان ۆاليۋتانىڭ جالپى كولەمى 8,2 ملرد دوللارعا جەتكەنىن اتاپ ءوتتى. ال ۇكىمەتتىڭ الدىن الا بولجامدى وتىنىمدەرىنە سايكەس, 2026 جىلعى قاڭتار ايىندا ۇلتتىق قوردان 350 – 450 ملن دوللار كولەمىندە ۆاليۋتا ساتۋ جوسپارلانىپ وتىر.
اينالاۋ وپەراتسيالارى اياسىندا جەلتوقسان ايىندا 475 ملرد تەڭگە الىنعان.
«2025 جىلى التىن-ۆاليۋتا رەزەرۆتەرىنەن ساتىلعان ۆاليۋتانىڭ كولەمى 7 ملرد اقش دوللارىن قۇرادى», دەلىنگەن ۇلتتىق بانكتىڭ اقپاراتىندا.
بانك وكىلدەرىنىڭ ايتۋىنشا, الىنباي قالعان وتىمدىلىكتى, اينالاۋ وپەراتسيالارىن جانە التىن باعاسىنىڭ ەلەۋلى ءوسۋىن ەسكەرە وتىرىپ, 2026 جىلدىڭ ءبىرىنشى توقسانىندا شامامەن 1,1 ترلن تەڭگە بالاماسىندا شەتەل ۆاليۋتاسىن ساتۋ جوسپارلانىپ وتىر.
«ۇلتتىق قور قاراجاتىمەن وپەراتسيالار جۇرگىزۋ كەزىندە جانە اينالاۋ تەتىگىن ىسكە اسىرۋ بارىسىندا ءبىز نارىقتىق بەيتاراپ قاعيداتتى قاتاڭ ساقتايمىز. بۇل ۆاليۋتانى تۇراقتى ءارى بىركەلكى ساتۋدى بىلدىرەدى», دەپ مالىمدەدى ۇلتتىق بانك.
جەلتوقسان ايىندا ۇلتتىق بانك ۆاليۋتالىق ينتەرۆەنتسيا جۇرگىزبەگەن. سونىمەن قاتار, كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمىنىڭ ءبىر بولىگىن مىندەتتى ساتۋ اياسىندا شامامەن 315 ملن دوللار ساتىلعان.
بىرىڭعاي جيناقتاۋشى زەينەتاقى قورىنىڭ ۆاليۋتالىق اكتيۆتەرى 40%-دان جوعارى بولعاندىقتان, جەلتوقسان جانە قاڭتار ايلارىندا زەينەتاقى اكتيۆتەرى ءۇشىن دوللار ساتىپ الۋ جوسپارلانباعان.
«قىسقامەرزىمدى پەرسپەكتيۆادا تەڭگەنىڭ ديناميكاسى نارىق قاتىسۋشىلارىنىڭ كۇتۋلەرىنە, سالىق تولەمدەرىنە, الەمدىك نارىقتاعى جاعدايعا جانە گەوساياسي فاكتورلارعا بايلانىستى بولادى», دەپ اتاپ ءوتتى ۇلتتىق بانك.
ۆەدومستۆو التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن جانە تەڭگەرىمسىزدىكتىڭ جينالۋىنا جول بەرمەيتىن يكەمدى ايىرباس باعامى رەجيمىن ۇستانۋدى جالعاستىراتىنىن مالىمدەدى.
