«قۇرمەتتى ازامات» اتاعىنا دەگەن قۇرمەتسىزدىك

اكادەميك تورەگەلدى شار­مانوۆتىڭ 12 ناۋرىز كۇنى «ەگەمەن قازاقستان» گازە­تىن­دە جارىق كورگەن «قۇندى­لىق­تاردىڭ قۇلدىراۋى» اتتى ماقالاسى شىققاننان بەرى وسى تاقىرىپ توڭىرەگىندە قانشاما ويلى ۇنقاتۋلار جارىق كوردى دەسەڭىزشى. بۇل قوعامدا ۇلت, ەل-جۇرت مۇددەسىنە دەگەن جاۋاپكەرشىلىكتىڭ بار ەكەندىگىن كورسەتەدى. كوپتى كورگەن زيالى, عالىم اعامىز ادامعا ءتان قۇندىلىقتاردىڭ قۇلدىراۋىن اشىنا جەتكىزسە, وعان ءۇن قوسىپ جاتقان بەلگىلى ازاماتتاردىڭ شىنايى تولعانىستارى كوتە­رىلىپ وتىرعان ماسەلەنىڭ ماڭىزدىلىعىنىڭ دالەلى. وقىر كوز, تۇسىنەر سانا بولسا, از ايتىلىپ جاتقان جوق. وسىلاردىڭ ىشىندە مەنىڭ ايتايىن دەگەنىم مىنا ماسەلە ەدى. ەلىمىز ەگەمەندىگىن الىپ, ودان بەرگى ەس جيۋ كەزەڭىنەن وتكەننەن بەرى جەرگىلىكتى جەرلەردە ازاماتتارعا ءماسلي­حاتتاردىڭ شەشىمىمەن اۋدان­نىڭ, وبلىستىڭ «قۇرمەتتى ازاماتى» دەگەن اتاق بەرىلۋدە. ءوزىنىڭ ءمانى بويىنشا ول تۋىپ-وسكەن ولكەسىنە, ەلىمىزدىڭ ءوسىپ-وركەندەۋىنە ولشەۋسىز ەڭبەگى سىڭگەن, مەملەكەتتىك وردەن, مەدالدارى بار, ەڭ باستىسى – حالىق وتە قۇرمەتتەيتىن تۇلعالارعا بەرىلۋى كەرەك. باسقا جەردى قايدام بىزدە وسى اتاقتىڭ ابىرويى ابدەن ءتۇسىپ بولدى. ونىڭ قۇنىن كەتىرىپ جاتقان ەشكىم ەمەس, ءوزىمىز. وسىدان 5-6 جىل بۇرىن ءبىر مەزەتتە 30-عا جۋىق ادامعا «اۋداننىڭ قۇرمەتتى ازاماتى» اتاعى بەرىلىپ كەتىپ, ارتى ۇلكەن داۋ-دامايعا ۇلاستى. سول «قۇرمەتتىلەردىڭ» ىشىندە جۇمىس ىستەپ جۇرگەن مەكتەپ ديرەكتورلارى, اۋداننىڭ پوليتسيا باستىعى سەكىلدى شەندىلەر دە بولعان. وكىنىشكە قاراي, الگى اتاقتى يەلەنگەن جەكەلەگەن ازاماتتار كەيىننەن ءىستى بولىپ سوتتالىپ, العان اتاقتارىنان ايىرىلىپ جاتتى. وسى جاعداي ساباق بولسا, كانەكەي. بۇدان ءبىر-ەكى جىل بۇرىن تاعى دا ءوزىمىز تانيتىن جاپ-جاس كاسىپكەر جىگىتتەر جانتالاسىپ وسى اتاققا تالاسقاندا كوپ ادام جاعاسىن ۇستادى. مىنە, بۇل جاعىمسىز جاعدايدىڭ ءوزى دە ار-ۇياتتى ساقتاۋ, قوعام, حالىق الدىنداعى ورنىمىزدى ءبىلۋ, قاراپايىمدىلىق دەگەن قاسيەتتەردىڭ قۇلدىراعانىن كورسەتەدى. الداعى ۋاقىتتا اۋداننىڭ, وبلىستىڭ «قۇرمەتتى ازاماتتارى» اتاعىن بەرۋدە جاسقا, قىزمەتكە بايلانىستى شەكتەۋلەر قويۋ قاجەت. ەرەن, جانقيارلىق ەرلىگى بولماسا, 30-40-تاعى داڭققۇمارلارعا ونى الۋعا مۇلدەم تىيىم سالۋ كەرەك دەگەن پىكىر كوپ ايتىلۋدا. سونىمەن قاتار, جەرگىلىكتى جەرلەردەگى باس اۋرۋعا اينالعان ونى بە­كىتۋدى قوعامدىق ۇيىمدار ءمۇ­شەلەرىمەن كەڭەيتىلگەن ءبىر عانا ورگاننىڭ, نە اكىمدىكتىڭ, نە ءماسليحاتتىڭ قۇزىرەتىنە بە­رۋ قاجەت دەپ ويلايمىن. سون­دا عانا بۇرىنعىسىنان دا كو­بەيگەلى تۇرعان اتاققۇمارلىق دە­گەن دەرتتىڭ الدىن الا الامىز. ماقتانشاقتىق دەرتىن اباي بابامىز اجۋالاعاننان بەرى قان­شا ۋاقىت وتسە دە وسى ءبىر جاعىم­سىز قاسيەتتىڭ قازاقتان ءالى دە بولسا قالماي كەلە جات­قاندىعى ءبارىمىزدى ويلاندىرۋى ءتيىس. مۇراتبەك داكەن ۇلى,  ۇستاز, قازاقستان رەسپۋبليكاسى ءبىلىم بەرۋ ءىسىنىڭ ۇزدىگى. جامبىل وبلىسى, ت.رىسقۇلوۆ اۋدانى, قۇلان اۋىلى.