فوتو: اشىق دەرەككوزدەن
قاسىم-جومارت توقاەۆ ۋران ءوندىرىسى بويىنشا الەمدە كوش باستاپ تۇرعان ەلدىڭ بىردە-ءبىر اتوم ەلەكتر ستانتسياسىن سالماۋى مۇلدەم اقىلعا قونبايتىنىن اتاپ ءوتتى.
«قۋات كوزدەرىن سالۋ ءۇشىن بىلىكتى ماماندار كەرەك. كاپيتال قورى شامامەن 4,5 تريلليون دوللار بولاتىن الەمدەگى ەڭ ءىرى كومپانيا – NVIDIA-نىڭ باسشىسى جاقىندا «كوك جاعالىلار», ياعني تەحنيكالىق ماماندىق يەلەرى مۋلتيميلليونەرلەر قاتارىنا قوسىلادى دەپ بولجام جاسادى.
بىرنەشە اتوم ستانتسياسىن سالۋ – بىرىنشىدەن, تاريحي ولقىلىقتىڭ ورنىن تولتىرۋ دەگەن ءسوز. سەبەبى, ۋران ءوندىرىسى بويىنشا الەمدە كوش باستاپ تۇرعان ەلدىڭ بىردە-ءبىر اتوم ەلەكتر ستانتسياسىن سالماۋى مۇلدەم اقىلعا قونبايدى. ەكىنشىدەن, بۇل قادام قازاقستاننىڭ ابىروي-بەدەلىن نىعايتا تۇسەدى. ءبىز اتوم ستانتسيالارىن سالۋ ارقىلى تەحنيكالىق ينتەلليگەنتسيانىڭ جاڭا بۋىنىن قالىپتاستىرامىز. تيىسىنشە, مەملەكەتتىك ساياساتتىڭ تۇپكى ءمانىن وزگەرتەمىز. وسىنى قاپەردەن شىعارماعان ءجون», دەدى مەملەكەت باسشىسى.
پرەزيدەنت سۇحباتىندا الداعى بەس جىلدىڭ وزىندە سيرەك مەتالدارعا سۇرانىس بەس ەسە ارتاتىنىنا, وسى رەتتە, قازاقستان ءۇشىن تاعى ءبىر مۇمكىندىك اشىلاتىنىنا نازار اۋداردى.
«تاعى ءبىر وتە ماڭىزدى تاقىرىپ – جەر قويناۋىندا سيرەك كەزدەسەتىن مەتالدار. بولاشاقتا ونداي ماتەريالدارعا دەگەن سۇرانىس ارتا بەرەدى, الداعى بەس جىلدىڭ وزىندە بۇل سۇرانىس ەكى ەسە وسەدى. وسى رەتتە, قازاقستان ءۇشىن تاعى ءبىر مۇمكىندىك اشىلادى. ەلىمىز جەر قويناۋىندا سيرەك كەزدەسەتىن مينەرالدار قورى بويىنشا الەمدىك كوشباسشىلار قاتارىنا قوسىلۋى ابدەن مۇمكىن. قازاقستان ستراتەگيالىق ماڭىزى بار وسى سالاداعى ءوز ءرولىن كۇشەيتۋ ءۇشىن اقش, قىتاي, رەسەي, وڭتۇستىك كورەيا, جاپونيا ەلدەرىمەن جانە ەۋروپا وداعىنىڭ بىرقاتار مەملەكەتىمەن ىنتىماقتاستىعىن دامىتا باستادى», دەدى قاسىم-جومارت توقاەۆ.
ەسكە سالايىق, بۇگىن قازاقستان پرەزيدەنتى قاسىم-جومارت توقاەۆ «Turkistan» گازەتىنە كەڭ كولەمدى سۇحبات بەردى. وندا مەملەكەت باسشىسى ساربازداردىڭ جاراقات الۋى مەن قازا بولۋى وركەنيەتتى ەلگە جات ءۇردىس ەكەنىن اتاپ ءوتتى.
سۇحبات بارىسىندا مەملەكەت باسشىسى پارلامەنت توراعاسى لاۋازىمىنا قاتىستى جانە ەكس-پرەزيدەنتتىڭ ماسكەۋگە ساپارى تۋرالى پىكىر ءبىلدىردى.
قاسىم-جومارت توقاەۆ قيت ەتسە ۇكىمەتتەن كومەك سۇرايتىن, مەملەكەتتىڭ قولداۋىن دۇرىس تۇسىنبەيتىن كاسىپكەرلەردى سىنعا الدى.
