ەلىمىزگە تاعى دا سەرپىلىس كەرەك
بيىلعى جىلى ەلىمىزدە كەزەكتەن تىس پرەزيدەنتتىك سايلاۋ وتكىزۋ باستاماسىن مەملەكەتتىك ساياساتتىڭ دامۋىنا مۇددەلى قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ۇجىمى مەن ستۋدەنتتەرى ءبىراۋىزدان قولدايدى. بۇل دەر كەزىندە كوتەرىلگەن ءارى ءبىرتۇتاس قازاقستان قوعامىن ءبىر تۋدىڭ استىنا توپتاستىراتىن سەرپىلىسكە تولى وقيعا.
قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتى تاۋەلسىز قازاقستاننان ءبولىپ قاراۋ مۇمكىن ەمەس, ول ساناعا سىيمايدى. ويتكەنى, قازاقستان حالقى ءۇشىن ەلباسى مىزعىماس سەنىم ءارى الىنباس قامالداردى مۇقالتار ەلباسى. ءاربىر قازاقستاندىق ءۇشىن قازاقستان جانە نازارباەۆ – ەگىز ۇعىم, سولاي قالا بەرەدى دە!
بارشامىزعا بەلگىلى, كەزەكتى پرەزيدەنتتىك سايلاۋ 2016 جىلى ءوتۋى كەرەك. بۇعان قوسا, پارلامەنت دەپۋتاتتارىنىڭ سايلاۋ ناۋقانى دا سول جىلعا جوسپارلانعان. سايلاۋ ناۋقانى ءبىر كۇننىڭ شارۋاسى ەمەس ەكەنى بەسەنەدەن بەلگىلى. وعان ۇلكەن دايىندىق جۇرگىزىلىپ, قارجىلىق جوسپار بەكىتىلەتىنى تاعى دا بار. جاڭارعان مەملەكەتتىڭ جاڭا پارلامەنتىن سايلاۋدا وعان جاعداي جاساۋ ءۇشىن الدىمەن ەل پرەزيدەنتى سايلانۋى كەرەك. دەمەك, قحا كەڭەسىندەگى پرەزيدەنتتىك سايلاۋدى مەرزىمىنەن ەرتەرەك وتكىزۋ ۇسىنىسى وتە ورىندى دەپ ەسەپتەيمىن.
راس, 2011 جىلى پرەزيدەنت جانە پارلامەنت سايلاۋلارى قاتار ءوتتى. ول ۋاقىتتا قازاقستان پارلامەنت سايلاۋىن ساياسي پارتيالارعا داۋىس بەرۋ ارقىلى جۇزەگە اسىرىپ, ساياسي تۇرعىدا تىڭ رەفورما جاساعان بولاتىن. وعان پرەزيدەنتتىك سايلاۋدىڭ بىرگە ءجۇرگىزىلۋى سەرپىلىس بەرگەنى اقيقات. بۇل دەگەنىمىز – ەندى پرەزيدەنتتىك سايلاۋدىڭ پارلامەنتتىك ناۋقاننان ەرتە ءوتۋى ەل ءماجىلىسمەندەرى ورىنتاعىنا دەگەن ساياسي پارتيالاردىڭ باسەكەلەستىگىن ارتتىرۋدا ولاردىڭ قابىلەتتىگىن دامىتادى دەگەن ءسوز. ويتكەنى, ولار العاشقى رەفورمادا «اتتەگەن-اي» دەگەن تۇستارىن سارالاپ, كەلەسى ساياسي دوداعا ءتاستۇيىن دايىن ءجۇر.
حالىققا ساياسي ناۋقاننىڭ تاعى ءبىر بەرەتىن جەتىستىگى بار. ول – پرەزيدەنتتىك سايلاۋ كەزىندە ەلگە جاريالاناتىن ءۇمىتكەرلەردىڭ باعدارلامالارى داعدارىس سىن-قاتەرلەرىنىڭ الدىن الۋدا قازاقستاننىڭ ىلگەرىلەۋىن قامتاماسىز ەتپەك. وندا حالىقارالىق قوعامداستىقتى الاڭداتىپ وتىرعان ەكونوميكالىق جانە الەۋمەتتىك قيىندىقتاردان قۇتىلۋ تەتىكتەرى جان-جاقتى سارالانۋى مۇمكىن. بۇل – ءاربىر مەنەدجەرگە تاپتىرمايتىن قۇندىلىق. سونىمەن قاتار, ءبىز پرەزيدەنتتىك سايلاۋدا بەرىلگەن ۋادەلەردىڭ تولىقتاي ورىندالاتىنىنا وتە سەنىمدىمىز. ياعني, بۇل باستاما ارقىلى ەلباسى ن.ءا.نازارباەۆتىڭ «داعدارىستان – دامۋعا» اتتى بۇرىننان كەلە جاتقان قاعيداتى قازاقستاننىڭ جاڭا باعىتتا وركەندەۋىنە جاعداي تۋعىزباق.
سوندىقتان, داعدارىس ۋاقىتىندا ەل ەرتەڭىنە سەنىمدى دە باتىل قادامدار جاساۋ ءۇشىن مەملەكەت باسشىسىن تاڭدايتىن ەڭ باستى ءارى ماڭىزدى سايلاۋدى كەشىكتىرمەي مەرزىمىنەن بۇرىن وتكىزسەك ۇتىلمايمىز. الەمدىك دەڭگەيدەگى ەكونوميكالىق ساراپشىلاردىڭ جوبالاۋىنشا, 2016 جىلى الەمدىك داعدارىس ءوزىنىڭ شارىقتاۋ شەگىنە – امپليتۋداسىنا جەتەدى. دەمەك, ۇساق-تۇيەككە ۋاقىت جوعالتۋ, كىدىرۋ اسا ورىنسىز. مۇنى دۇنيەجۇزىلىك كەڭىستىكتە «قازاقستاندىق ۇلگى» رەتىندە تانىلعان اسسامبلەيا وكىلدەرى جان-تاندەرىمەن سەزىنىپ وتىر دەۋگە بولادى.
وسىدان كەلىپ تۋىندايتىن وي – ءبىز بارشا ءبىرتۇتاس قازاقستان حالقى قوعام دامۋى جانە ەكونوميكالىق داعدارىسقا جول بەرمەۋدە ەلباسىنىڭ بارلىق نازارى مەن قابىلەتىنە مۇمكىندىك بەرۋىمىز قاجەت. بۇل – وتە ورىندى ءارى ءتيىمدى باستاما. ويتكەنى, اتالعان جاعدايات الداعى قىرۋار سوقپاقتاردىڭ قاسىندا مونشاقتاي ماسەلە بولىپ قالادى. وسى ورايدا, ءبىز بارلىعىن جوسپارلى ويلاستىرىپ قانا قويماي, ۋاقىتتى ءتيىمدى پايدالانىپ, بولىپ قالۋى مۇمكىن قيىنشىلىقتاردى جەڭۋگە ەرتە باستان قامدانعانىمىز ابزال. ول ءۇشىن تاعى دا ءبىر ساياسي تۇرعىدان سەرپىلۋىمىز كەرەك.
دينار نوكەتاەۆا,
قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى.
الماتى.
بىرلىگىمىزدىڭ باياندى بولۋى ءۇشىن
ءبىز, قازاق جەرىن كيەلى مەكەنىمىزگە بالاعان وزگە ەتنوستاردىڭ وكىلدەرى قازاقستانداعى تاتۋلىق پەن دوستىقتىڭ بەرىك بولۋىنا, ەكونوميكانىڭ كەڭ قۇلاش جايا وركەندەپ, ەلىمىزدىڭ قۋاتتى مەملەكەتكە اينالۋىنا مۇددەلىمىز. ويتكەنى, الەم ەلدەرىندەگى داعدارىس پەن قاقتىعىستاردىڭ تەك ەكونوميكاعا عانا ەمەس, الدىمەن, ادامزاتقا تيگىزەر زاردابىنىڭ اۋىر بولاتىنىن كورىپ وتىرمىز. جاھان جۇرتىن ءبىر جاعىنان قارجى داعدارىسىنىڭ, ەكىنشى جاعىنان مۇناي باعاسىنىڭ قۇلدىراۋىنان جۇمىسسىزدىقتىڭ شەڭگەلى قىسىپ بارا جاتقان تۇستا ەلباسى نۇرسۇلتان نازارباەۆ داعدارىستىڭ الدىن الۋ شارالارىن باستادى. نۇرسۇلتان ءابىش ۇلىنىڭ ارىدەن ويلايتىن كورەگەندىگى مەن سارابدال ساياساتىنىڭ ناتيجەسىندە قازاقستان جۇرتى الەمدەگى قارجى داعدارىسىنىڭ دا, مۇناي باعاسىنىڭ قۇلدىراۋىنىڭ دا سالقىنىن سەزە قويعان جوق. بۇعان دەيىن دە ءبىزدىڭ ەلىمىز ازيا داعدارىسىنىڭ, الەمدىك قارجى داعدارىسىنىڭ بىرنەشە كەزەڭىنەن امان وتتىك.
ەلىمىزدە جۇمىسسىزدىقتى ءتومەندەتۋ باعىتىندا ءتۇرلى باعدارلامالار ىسكە اسىرىلىپ, سونىڭ ناتيجەسىندە وتانداستارىمىز سان الۋان كاسىپورىندارعا جۇمىسقا ورنالاسىپ جاتىر. ارينە, قاي ەلدە دە حالىقتىڭ بارلىعى دەرلىك جۇمىسپەن تۇگەل قامتىلۋى مۇمكىن ەمەس. حالىقتىڭ بەلگىلى ءبىر مولشەرىن جۇمىسسىزدار قۇرايتىنى زاڭدىلىق دەسەك تە, قازاقستانداعى جۇمىسسىزدىق دەڭگەيى الەمدەگى, سونىڭ ىشىندە تمد مەملەكەتتەرىندەگى كورسەتكىشتەردەن الدەقايدا ءتومەن ەكەندىگى داۋ تۋدىرماس شىندىق. ويتكەنى, ءبىزدىڭ ەلىمىزدە «الدىمەن – ەكونوميكا» قاعيداسىمەن وتاندىق ءوندىرىستەردى كوپتەپ اشىپ, جاڭا جۇمىس ورىندارىن قۇرۋ ارقىلى جۇمىسسىزدىقتى ازايتۋعا باسا ءمان بەرىلىپ وتىر. بۇل – ءبىر.
ەكىنشىدەن, ءبىزدىڭ باستى تابىسىمىز – تاتۋلىق پەن تۇراقتىلىق. بۇل كوپتەگەن ەلدەردىڭ كۇنى-ءتۇنى اڭسايتىن, قانشا تىرىسسا دا قول جەتكىزە الماي جۇرگەن ماڭگىلىك ارمانىنا اينالدى. ال بىزدە شە؟ بىزدە قۇدايعا شۇكىر, تاتۋلىق پەن تۇراقتىلىقتىڭ تۋى جىعىلعان, بەرىكتىگىنە سىنا قاعىلعان ەمەس. الداعى جىلداردا دا ورتاق وتانىمىز – قازاقستانداعى بىرلىكتىڭ بۋىنى بۇگىنگىدەن بەرىك بەكىپ, تاتۋلىعىمىز بەن تۇراقتىلىعىمىز ماڭگىلىك بولۋىنا ءبارىمىز دە مۇددەلىلىك تانىتامىز. ەلىمىزدىڭ وسىنداي باستى جەتىستىگىنە تۇڭعىش پرەزيدەنتىمىز نۇرسۇلتان نازارباەۆتىڭ كوپەتنوستى ءبىر شاڭىراقتىڭ استىنا ۇيىستىرا, ورتاق ءمۇددەگە ۇيىستىرا بىلگەن تاجىريبەلى ساياساتكەرلىگى مەن كوشباسشىلىق كەمەڭگەرلىگىنىڭ ارقاسىندا جەتىپ وتىرمىز.
بۇگىنگى تاڭدا الىستاعى الەم ەلدەرى دە, ازيا مەن تمد-داعى ەجەلدەن تانىس تا بەيتانىس, كورشىلەس مەملەكەتتەر دە قازاقستاننىڭ كەمەل كەلەشەگىنە باياندى باستاۋ بولعان بىرلىگىمىز بەن ءبىر-ءبىرىنىڭ ۇلتتىق قۇندىلىقتارىنا قۇرمەت كورسەتكەن تاتۋلىعىمىزعا دا, ەكونوميكالىق وركەندەۋ مەن تۇعىرى تۇعىرلى تۇراقتىلىعىمىزعا تامسانىپ تا, ارينە, قىزعانىپ تا قارايدى. جاھان جۇرتىنىڭ ءبارىنىڭ باسىنا بۇيىرا قويماعان, بۇيىرعان كۇندە دە ۇستاپ تۇرا الماعان بىرلىك پەن تاتۋلىق, وركەندەۋ مەن تۇراقتىلىق قازاق ەلىنىڭ ماڭدايىنا جازىلىپ, قولى جەتىپ تۇر. بۇل – بىرىنشىدەن, اللا تاعالانىڭ سىيى, ەكىنشىدەن, ەلباسى نۇرسۇلتان نازارباەۆتىڭ ەرەن ەڭبەگىنىڭ جەمىسى. ەلىمىزدىڭ بىرلىگى بۇدان بىلايعى ۋاقىتتا دا باياندى بولۋى بارشامىزدىڭ قولىمىزدا ەكەنىن ۇمىتپاي, پرەزيدەنتتىك سايلاۋدى مەرزىمىنەن بۇرىن وتكىزۋ ءجونىندەگى قازاقستان حالقى اسسامبلەياسىنىڭ ۇسىنىسىن قولداعانىمىز ءجون.
پرەزيدەنتتىك سايلاۋدى وتكىزۋ بىزگە – كوپەتنوستى قازاقستاندىقتارعا بۇگىنگىدەي الەمدىك ەكونوميكانى ءدۇمپۋى قاتتى داعدارىس جايلاعان, قاۋىپتى سىن-قاتەرلەردىڭ تۋىنداۋ مۇمكىندىگى ۇلعايعان تۇستا تاۋەلسىز قازاقستانىمىزدىڭ بىرلىگى مەن تۇراقتىلىعىن, ءبۇتىندىگى مەن وركەندەۋ قابىلەتىن ارتتىرۋ ءۇشىن اسا قاجەت.
الەكساندر دۋملەر,
«ۆيدەرگەبۋرد» نەمىس ەتنومادەني بىرلەستىگىنىڭ جەتەكشىسى, اتىراۋ وبلىستىق ءماسليحاتىنىڭ دەپۋتاتى.
اتىراۋ وبلىسى.
ويىمىزداعىنى ءدوپ باستى
قازاقستان حالقى اسسامبلەياسى كەڭەسىنىڭ بيىل مەرزىمىنەن بۇرىن پرەزيدەنتتىك سايلاۋ وتكىزۋ تۋرالى باستاماسىنا اقجايىق ءوڭىرىن مەكەندەگەن ەتنوستاردىڭ ءبىر شوعىرى – ۇيعىرلار دا قوسىلادى. XXI عاسىر اقپاراتتار اعىنى زامانى دەپ بەكەر ايتپايدى. ەلىمىزدەگى باق بەتتەرى ارقىلى وزگە ەلدەردەگى باۋىرلارىمىزدىڭ تىنىس-تىرشىلىگىنەن حاباردارمىز. الايدا, قازاقستانداعىداي ءار ەتنوسقا سالت-ءداستۇرىڭدى ساقتا, مادەنيەتىڭدى وركەندەت, كاسىپكەرلىكپەن شۇعىلدان دەپ كەڭشىلىك جاساپ وتىرعان وزگە مەملەكەتتى جارىق كۇندە شىراق الىپ ىزدەسەڭىز دە تاپپايسىز.
مىسالعا ايتار بولسام, ورال ءوڭىرى اۋماعىندا ۇيعىرلاردىڭ وتباسى وزگە ۇلت وكىلدەرىمەن بىرگە قويان-قولتىق ەڭبەك ەتىپ ءجۇر. بالالارىمىز مەكتەپتە, كوشەدە قازاق جانە ورىس تىلدەرىندە ءسويلەگەنىمەن, ءوز انا ءتىلىن دە ۇمىتپايدى. مەنىڭ قانداستارىم اتا-باباسىنىڭ سالتىمەن ءار وتباسىندا كەم دەگەندە 4-5 بالا بولۋىن نازاردا ۇستايدى. جاپىراق جايىپ ءوسىپ-وركەندەۋىمىزگە ورتاق وتانىمىز – قازاقستاندا بارلىق جاعداي جاسالعان.
بۇدان جيىرما جىل بۇرىن پرەزيدەنتىمىزدىڭ سارابدال ساياساتىنىڭ ارقاسىندا بەيبىتشىلىك پەن كەلىسىمنىڭ, ەتنوسارالىق تولەرانتتىلىق پەن قوعامدىق ۇيلەسىمنىڭ قازاقستاندىق ۇلگىسىنىڭ ەڭ بىرەگەي جانە ايقىن جولى رەتىندە قازاقستان حالقى اسسامبلەياسى قۇرىلدى. بۇل قوعامدىق قۇرىلىم بۇگىندە ەلىمىزدىڭ حالقىن ءبىر ماقساتقا توپتاستىرا الاتىن بەلسەندى قوعامدىق ينستيتۋتقا اينالعان.
اسسامبلەيا وتانىمىزداعى بارلىق ەتنوستاردىڭ رۋحاني تۇرعىدا قايتا جاڭعىرۋى مەن دامۋىن قامتاماسىز ەتۋدە, دەموكراتيالىق ۇستانىمدارعا, مەملەكەتتىك ۇلتتىق ساياساتتا بارلىق ەتنوستاردىڭ مۇددەسىنە دەگەن قۇرمەتكە نەگىزدەلگەن ۇلتارالىق قاتىناس مادەنيەتىن ارتتىرۋدا تەڭدەسى جوق قىزمەت اتقارىپ كەلەدى. ينستيتۋتتىڭ تمد-نىڭ وزگە ەلدەرىنە تيگىزگەن ىقپالى ايتارلىقتاي. سونىڭ ناتيجەسىندە قازاقستاندىق ۇلگى بويىنشا كورشىلەس رەسەي مەن قىرعىزستاندا حالىق اسسامبلەيالارى قۇرىلدى.
ءسوزىمنىڭ سوڭىندا مەن مەملەكەت باسشىسىنىڭ ەلىمىزدە ۇلتارالىق تاتۋلىق پەن ىنتىماقتى نىعايتۋ باعىتىنداعى ۇستانعان ساياساتى مەن وسى تۇرعىدا تىندىرعان ۇلان-عايىر ىستەرى ءۇشىن دە ونىڭ قولىنا سەنىم مانداتىن ۇستاتۋىمىز كەرەك دەپ سانايمىن.
ءاسيام ۇسەنوۆا,
قازاقستان حالقى اسسامبلەياسىنىڭ مۇشەسى, «قازاقستان ۇيعىرلارىنىڭ رەسپۋبليكالىق مادەنيەت ورتالىعى» قوعامدىق بىرلەستىگىنىڭ ورال قالاسىنداعى فيليالىنىڭ جەتەكشىسى.
باتىس قازاقستان وبلىسى.
دەر كەزىندە جاسالۋىمەن قۇندى
قازاقستان تاۋەلسىزدىك العان 1991 جىلدان ءبۇگىنگى كۇنگە دەيىن 23 جىل ۋاقىت ءوتىپتى. وسى 23 جىلدىڭ ىشىندە ەلباسىمىز ن.نازارباەۆتىڭ كورەگەن ساياساتىنىڭ, بىلىكتى باسشىلىعىنىڭ ارقاسىندا عاسىر كولەمىندە اتقارىلاتىن جۇمىستار ىستەلدى.
1991 جىلى تۇڭعىش پرەزيدەنت بولىپ سايلانىپ, ەل تىزگىنىن قولعا العاندا نۇرسۇلتان ءابىش ۇلىنا دا وڭاي بولعان جوق. يمپەريالىق كسرو تاراپ, ەكونوميكالىق بايلانىستار ءۇزىلدى. قازاقستاننىڭ ەكونوميكاسى تەك قانا شيكىزاتقا نەگىزدەلگەندىكتەن, ءوندىرىس ورىندارى بولمادى. ەندى نە ىستەيمىز دەپ حالىق داعدارعاندا ەلباسى «الدىمەن – ەكونوميكا, سودان كەيىن ساياسات» اتتى ءوزىنىڭ تاريحي باعىتىن ۇسىنىپ, ىسكە كىرىستى. 1997 جىلى حالىققا «قازاقستان-2030» ستراتەگياسىن جولدادى. بۇگىنگى كۇنى وسى باعىتتىڭ دۇرىس ەكەندىگىن ومىردەن كورىپ وتىرمىز. ەكونوميكامىز قارىشتاپ دامىپ, ەلدىڭ جاعدايى جاقساردى. «قازاقستان-2030» ستراتەگياسى مەرزىمىنەن بۇرىن ورىندالىپ, دامىعان 50 ەلدىڭ قاتارىنا ەندىك.
قازاقستاندى بۇكىل الەم ەلدەرى, ونىڭ ىشىندە ۇلى دەرجاۆالار امەريكا, قىتاي, رەسەي, ەۋروپا ەلدەرى مويىنداپ, ءبىزدىڭ پرەزيدەنتىمىزبەن ساناسىپ, كۇردەلى ساياسي ماسەلەلەر ءجونىنەن اقىلداساتىن بولدى. بۇل ەلباسىمىزدىڭ ولشەۋسىز, جانكەشتى ەڭبەگىنىڭ ناتيجەسى دەپ ۇعۋىمىز كەرەك.
نۇرسۇلتان ءابىش ۇلىنىڭ ەڭ نەگىزگى جەتىستىگى 130-داي ۇلت پەن ۇلىس مەكەندەيتىن قازاقستاندا تىنىشتىق پەن تاتۋلىقتى ساقتاۋى, قانتوگىسكە جول بەرمەۋى دەر ەدىم. مىنە, وسىنداي «قوي ۇستىنە بوزتورعاي جۇمىرتقالاعان» زاماندى ءارى قاراي جالعاستىرۋ ءۇشىن, ەلىمىزدىڭ بولاشاعى جارقىن بولۋى ءۇشىن ءبىز نۇرسۇلتان ءابىش ۇلىن كەزەكتەن تىس سايلاۋ وتكىزىپ, قايتادان سايلاپ الۋىمىز كەرەك, حالايىق!
الدىمىزدا بۇكىلالەمدىك ەكونوميكالىق داعدارىس كەلە جاتىر. پرەزيدەنتىمىز بۇل داعدارىستىڭ الدىن الىپ وتىر. ونىڭ دالەلى ەلباسىنىڭ «نۇرلى جول – بولاشاققا باستار جول» اتتى جولداۋى بولدى. 11 اقپان كۇنگى ۇكىمەتتىڭ كەڭەيتىلگەن وتىرىسىندا سويلەگەن سوزىندە مەملەكەت باسشىسى «قازاقستاندا ەكونوميكالىق داعدارىس جوق, تەك قانا سىرتقى فاكتورلاردىڭ اسەرى بار», دەپ اتاپ كورسەتتى. سوندىقتان ءاربىر قازاقستاندىق مەملەكەتتىڭ داعدارىستىڭ الدىن الۋعا بولگەن قارجىنىڭ ءاربىر تيىنىنىڭ قالاي جۇمسالىپ جاتقاندىعىن باقىلاۋعا الۋ كەرەك دەپ ويلايمىن.
مەرزىم بويىنشا 2016 جىلى پرەزيدەنتتىك جانە پارلامەنتتىك سايلاۋلار قاتار كەلىپ تۇر. الەمدىك ەكونوميكالىق داعدارىستىڭ شارىقتاۋ شەگى 2016 جىلعا كەلەدى دەگەن بولجام بار. سوندىقتان پرەزيدەنتتىك سايلاۋدى 2015 جىلى وتكىزۋ جونىندەگى قازاقستان حالقى اسسامبلەياسىنىڭ ۇسىنىسىن تولىقتاي قولداي وتىرىپ, حالىقتى دا قولداۋعا شاقىرامىن.
ەرجان قۇتتىباەۆ,
شىعىس قازاقستان وبلىستىق ءماسليحاتىنىڭ دەپۋتاتى, اۋداندىق ازاماتتىق اليانستىڭ جەتەكشىسى.
شىعىس قازاقستان وبلىسى,
تارباعاتاي اۋدانى,
اقسۋات اۋىلى.
ورىندى جاسالعان ۇسىنىس
بۇگىندە ءبىز اقپارات قۇرالدارى ارقىلى الەمدە بولىپ جاتقان ءتۇرلى جايلاردان حاباردارمىز. الەمدى شارپىعان داعدارىستىڭ, مۇناي باعاسىنىڭ قۇلدىراۋى مەن رەسەيگە سالىنعان سانكتسيالاردىڭ ءبىزدىڭ ەلگە دە تيگىزەر كەرى اسەرىن باعامدايمىز. بۇل داعدارىستىڭ الدىن الۋ ماقساتىندا ەلباسىمىز «نۇرلى جول – بولاشاققا باستار جول» اتتى جولداۋىن ارناپ, الدا اتقارىلۋى ءتيىس بىرقاتار مىندەتتەردى ايقىنداپ بەردى. دەسە دە, داعدارىستىڭ ۇزاققا سوزىلار ءتۇرى بار. سوعان بايلانىستى ەلىمىزدە مەرزىمىنەن بۇرىن پرەزيدەنتتىك سايلاۋ وتكىزۋ تۋرالى ۇسىنىستى استانادا وتكەن قازاقستان حالقى اسسامبلەياسىنىڭ كەڭەسى كوتەردى.
قاراپ وتىرساق, بارشامىز جاھاندىق ەكونوميكا تۇراقسىزدىعىنىڭ كۋاسىمىز. الەمدىك ەكونوميكا دامۋىنىڭ 2015-2016 جىلدارعا ارنالعان بولجامدارى كوڭىلگە دەمەۋ بولا المايدى. مەتالل مەن مۇنايعا الەمدىك باعا ايتارلىقتاي قۇلدىراۋدا. 2016 جىلى الەمدىك قارجى-ەكونوميكالىق داعدارىس شىرقاۋ شەگىنە جەتەدى دەگەن ساراپشىلاردىڭ بولجامى بار. نەگىزىنەن, پرەزيدەنتتىك سايلاۋ مەن پارلامەنتتىك سايلاۋ 2016 جىلى قاتار ءوتۋى كەرەك-ءتى. بىراق داعدارىس جاعدايىندا ءبىر جىلدا ەكى سايلاۋدى قاتار وتكىزۋ ەل ەكونوميكاسىنا اۋىر تيەتىنى ايتىلۋدا. ەڭ الدىمەن, ءبىز ەل پرەزيدەنتىن سايلاۋدى مەرزىمىنەن بۇرىن وتكىزىپ الساق, جاڭا سايلانعان پرەزيدەنت بارلىق نازارىن قازاقستاننىڭ دامۋىنا, ەكونوميكانىڭ داعدارىسقا ۇشىراماۋىنا بۇرادى دەپ سەنەمىز.
مەن اۋداندىق ءماسليحات دەپۋتاتى, «نۇر وتان» پارتياسى مۇشەسىنىڭ ءبىرى رەتىندە الەمدەگى كۇشەيىپ كەلە جاتقان ەكونوميكالىق داعدارىس جاعدايىندا قازاقستان پرەزيدەنتىن سايلاۋدى كەزەكتەن تىس وتكىزۋ يدەياسىن تولىق قولدايمىن. بۇل ەلباسى باستاعان «نۇرلى جول» مەن ەل دامۋىنىڭ ۇزاق مەرزىمدى باعدارلامالارىن ىسكە اسىرۋدى ۇزدىكسىز جالعاستىرۋعا مۇمكىندىك بەرەدى دەپ سانايمىن.
كەرىمقۇل بەگاليەۆ,
«زىليحا» شارۋا قوجالىعىنىڭ توراعاسى, جۋالى اۋداندىق ءماسليحاتىنىڭ دەپۋتاتى.
جامبىل وبلىسى,
جۋالى اۋدانى.
جاستار سەنىمى نىق
ءبىز, جاستار تاۋەلسىز مەملەكەتىمىزدىڭ تۇعىرى بيىكتەپ, ابىروي-بەدەلى ءوسىپ, حالقىمىزدىڭ بىرلىگى جاراسىپ, تۇرمىسى جىلدان-جىلعا جاقسارۋىنا ەلباسىمىز ن.ءا.نازارباەۆتىڭ ەڭبەگى ولشەۋسىز ەكەنىن بىلەمىز. قازىرگى كۇنى الەمدەگى اۋىر ەكونوميكالىق احۋالعا قاراماستان سۇيىكتى قازاقستانىمىزدىڭ دامۋدىڭ داڭعىل جولىنان تايقىماي العا ۇمتىلۋىنا بارلىق جاعدايدىڭ جاسالۋىنا كوزىمىز جەتىپ وتىر. قيىندىقتار بۇدان دا كۇردەلەنە ءتۇسۋى مۇمكىن ەكەنى دە جاسىرىن ەمەس. وسىنداي سىندارلى ساتتە ىنتىماعىمىزدى ساقتاپ, «نۇرلى جول – بولاشاققا باستار جول» جولداۋىندا قويىلعان ماقسات-مىندەتتەردى جۇمىلدىرۋ بۇعان دەيىن دە تالاي ايعاقتالعانداي تۇڭعىش پرەزيدەنتىمىزدىڭ عانا قولىنان كەلەتىندىگى انىق. سوندىقتان مەرزىمىنەن بۇرىن سايلاۋدىڭ ءوتۋى تۋرالى حالىق تىلەگىن تولىق قولدايمىز.
مەن ءبىراز جىلدان بەرى ەلباسى ەڭبەك جولىن باستاعان الىپ كاسىپورىندا جۇمىس ىستەپ كەلەمىن. شىندىعىن ايتقاندا, بۇگىندە جاعداي جەڭىل ەمەس, ءونىم وتكىزۋ قيىندادى, تابىس كوزى تومەندەدى. بۇعان الاڭداپ, ءىس-قيمىلىمىزدى بوساڭسىتىپ جاتقانىمىز جوق. قالاي بولعاندا دا, مۇنداي ماڭىزدى ءوندىرىس تىنىسىن تارىلتپاۋ – ەڭ الدىمەن بىزگە سىن. ويتكەنى, ونىڭ قالىپتى جۇمىسى ەل ەكونوميكاسىنا ۇلكەن دەمەۋ. وسىنى تۇسىنە ءبىلىپ, ىشكى وكپە-رەنىشتى شەگەرە تۇرىپ, ەڭبەككە بەلسەندىلىكتى باسەڭدەتپەۋشى ارىپتەستەرىمە ريزالىعىم شەكسىزدىگىن ايتا كەتكىم كەلەدى.
ءبارىمىزدىڭ ماقسات-مۇددەمىزدىڭ بىرلىگىن, ەلىمىز كەلەشەگى ءۇشىن تۇتاستىعىمىزدى, نامىس-جىگەرىمىزدى, قايرات قايراۋىمىزدى تانىتار ءسات تۋىپ وتىر. بارشا قازاقستاندىق زامانداستىرىمنىڭ نۇرسۇلتان ءابىش ۇلى نازارباەۆتىڭ مەملەكەت باسقارۋىن قولدايتىندىعىنا سەنەمىن. ەل ومىرىندەگى جاۋاپتى وتكەلدە اركىمنىڭ ازاماتتىق پارىزى سولاي بولۋعا ءتيىس دەپ ويلايمىن.
الىبەك الپىسباەۆ,
«ارسەلور ميتتال تەمىرتاۋ» اق مەتاللۋرگيالىق كومبيناتىنىڭ گورنوۆويى.
تەمىرتاۋ.
باياندى بولاشاققا بەتبۇرىس
قازاقستان حالقى اسسامبلەياسى كەڭەسىنىڭ كوتەرگەن باستاماسى وتە ورىندى. ءبىز, جاستار, تولقىمالى كەزەڭدە ەلدىڭ بىرلىگىن, مەملەكەتتىڭ بىرتۇتاستىعىن ساقتاۋ ماڭىزدى, ول كورەگەن كوشباسشى, سارابدال ساياساتكەر ەلباسىمىز نۇرسۇلتان ءابىش ۇلىنىڭ عانا قولىنان كەلەدى دەپ سانايمىز. سوندىقتان دا پرەزيدەنتتىك سايلاۋدى مەرزىمىنەن بۇرىن وتكىزۋ قاي جاعىنان العاندا دا ماڭىزدى جانە ۋاقىت تالابى دەپ بىلەمىز.
قازىرگى كەزدە جەر ءجۇزى, الەم كەڭىستىگى قيىن كەزەڭدەردى باستان كەشىرۋدە. ەكونوميكالىق داعدارىس, مەملەكەت ىشىندەگى ساياسي داۋ-جانجالدار, ءدىني, ۇلتارالىق قاقتىعىستار الەمنىڭ كوپتەگەن مەملەكەتتەرىنىڭ قابىرعاسىن قاۋساتىپ, ىرگەسىن سوككەنى بارشامىزعا ءمالىم. بۇل تۇرعىدان كەلگەندە, ءبىزدىڭ وتانىمىزدىڭ تاتۋلىق پەن تىنىشتىقتىڭ, كەمەل كەلىسىمنىڭ بەسىگى, ازيانىڭ كىندىك مەملەكەتى ەكەندىگى الەمگە بەلگىلى, بارشاعا ايان, دالەلدەۋدى قاجەت ەتپەيتىن اكسيوما.
وسى ورايدا: «سان ۇلتتىڭ باسىن بىرىكتىرگەن, جاھاننىڭ توعىزىنشى تەرريتورياسى – قازاقستان تاۋەلسىزدىك العان شيرەك عاسىرعا تولار-تولماس ۋاقىت بەدەرىندە مۇنداي جەتىستىكتەرگە قالاي قول جەتكىزدى؟» دەگەن ساۋالدىڭ تۋىندارى زاڭدى. بۇل ساۋالعا «ەل تاريحىنىڭ بەتبۇرىس كەزەڭىندە مەملەكەت مۇددەسىن ەل بولاشاعىن بارىنەن جوعارى قويعان كوشباسشى فاكتورى مەن جۇدىرىقتاي جۇمىلعان ەلىمىزدىڭ بىرلىگىنىڭ ناتيجەسى» دەپ جاۋاپ بەرسەك, ورىندى دەپ ويلايمىن.
بۇگىنگى تاڭدا قازاقستان جاستارىنىڭ جان-جاقتى دامۋىنا بارلىق جاعداي جاسالعان. ءبىلىمگە قۇشتار جاستىڭ مەملەكەت ەسەبىنەن جوعارى ءبىلىم الىپ, ءوز ءبىلىمىن ماگيستراتۋرا مەن دوكتورانتۋرادا شىڭداۋىنا, ونەرلى ازاماتتىڭ شىعارماشىلىقپەن, سپورتشى جاستاردىڭ سپورتپەن اينالىسۋىنا نە قاجەتتىڭ ءبارى بار. مۇنان وزگە, ءۇستىمىزدەگى جىلى قابىلدانعان «مەملەكەتتىك جاستار ساياساتى تۋرالى» زاڭ جاستاردىڭ ءتۇرلى جەڭىلدىكتەر مەن الەۋمەتتىك كومەك, باسپانا الۋىنا دا سەپتىگىن تيگىزەدى.
«باق باعالاعاننىڭ باسىنا قونادى» دەيدى دانا حالقىمىز. قولدا بارىمىزدى قادىرلەپ, باقتى باعالاي بىلسەك, ەل تاريحىنىڭ جاۋاپتى كەزەڭىندە تىزگىنىمىزدى مەملەكەتىمىزدى تالاي سىنداردان سۇرىندىرمەي وتكىزگەن ەلباسى نۇرسۇلتان نازارباەۆقا سەنىپ تاپسىرساق, بولاشاعىمىزدىڭ باياندى, كەلەشەگىمىزدىڭ كەمەل بولارىنا سەنىمدىمىن.
ايبول ارعىنعازينوۆ,
ل.ن.گۋميلەۆ اتىنداعى ەۇۋ
ستۋدەنتتىك عىلىمي قوعامىنىڭ توراعاسى, «جىل ستۋدەنتى-2014» رەسپۋبليكالىق بايقاۋىنىڭ جەڭىمپازى.
استانا.
تاريحي سالماعى باسىم باستاما
– قازاقستان حالقى اسسامبلەياسىنىڭ مۇشەلەرى كەزەكتەن تىس پرەزيدەنتتىك سايلاۋ وتكىزۋ جونىندە باستاما كوتەردى. ەلىمىزدىڭ ساياسي ومىرىندە ءمان-ماڭىزى جوعارى جاڭالىقتى وتاندىق تەلەارنالارىمىزدان ەستىدىم. اتالعان ۇسىنىستىڭ اسسامبلەيا ينستيتۋتى وكىلدەرىنىڭ تاراپىنان جولدانۋى قۇپتارلىق جايت. ويتكەنى, ەلباسى نۇرسۇلتان نازارباەۆ – ەلىمىزدەگى بارشا ۇلت پەن ۇلىستىڭ قامقورشىسى, اكەسى ىسپەتتى. ول ءوزىنىڭ بارلىق باعدارلاماسىندا قازاقستان حالقىنىڭ قۇقىعىن تەڭ دارەجەدە قورعاۋعا ايرىقشا ءمان بەرەتىنى ءمالىم.
بيىل ەلىمىزدە قازاقستان حالقى اسسامبلەياسىنىڭ جىلى جاريالاندى. وسى ورايدا قوعامدىق كەلىسىم مەن تۇراقتىلىقتىڭ باستاۋىندا تۇرعان اسسامبلەيا ينستيتۋتىنىڭ 20 جىلدىق مەرەيتويىمەن بىرگە ەلىمىزدەگى ەڭ جوعارى ساياسي وقيعانىڭ ءوتۋى دە ۇيلەسىمدى دۇنيە دەپ ويلايمىن. بۇل – ءبىزدىڭ قازاقستاندىق قوعامنىڭ ءبىر جاعادان باس, ءبىر جەڭنەن قول شىعارىپ, توننىڭ ىشكى باۋىنداي بولعان تاتۋلىعىنىڭ رياسىز كورىنىسى ىسپەتتى.
ەلباسى – ەلىمىزدەگى جەتەكشى تۇلعا. مەملەكەت باسشىسىنىڭ بارلىق باستاماسى ۇنەمى ءوزارا كەلىسىم, بىرلىك جانە تاتۋلىق قاعيداتتارىمەن ءورىلىپ وتىراتىنى تەگىن بولماسا كەرەك. پرەزيدەنتىمىزدىڭ پاراساتتى, سۇڭعىلا ساياساتىنىڭ ارقاسىندا ىشكى تىنىشتىعىمىز بەن ەكونوميكالىق تۇراقتىلىعىمىزدى ساقتاپ, بەرەكە-بىرلىكتە ءومىر ءسۇرۋىمىز ءۇشىن كەزەكتەن تىس سايلاۋدىڭ تاريحي ماڭىزى ەرەكشە.
ەلىمىزدەگى ءىرى كاسىپورىنداردىڭ ءبىرى سانالاتىن «كازتسينك» جشس ۇجىمى پرەزيدەنتتىڭ ساياساتىنا ءار كەز جوعارى دەڭگەيدە قولداۋ كورسەتىپ كەلەدى. ءبىز ءاردايىم ەلباسى جۇكتەگەن ۇلكەن مىندەتتەردىڭ ۇدەسىنەن شىعۋعا تىرىسامىز. سوندىقتان مەرزىمىنەن بۇرىن پرەزيدەنتتىك سايلاۋ وتكىزۋ ەلىمىزدىڭ ءارى قاراي دامۋىنا تىڭ سەرپىلىس بەرەدى دەگەن ويدامىن.
يۋري گۋسەۆ,
«كازتسينك» جشس باس ديرەكتورى.
وسكەمەن.
ۇزاق مەرزىمدى باعدارلامالار – كەلەشەكتىڭ كەپىلى
قازاقستان حالقى اسسامبلەياسىنىڭ مەرزىمىنەن بۇرىن پرەزيدەنتتىك سايلاۋ وتكىزۋ باستاماسىن «سارىاعاش» كۋرورتىنىڭ 400-گە جۋىق قىزمەتكەرى ءبىراۋىزدان قۇپتايدى. ول تۋرالى ارنايى جيىندا دا ايتىلدى.
ءبىز شەكارالىق وڭىردە تۇرامىز. ماڭايىمىزداعى كورشىلەرىمىزدىڭ جاعدايى بەس ساۋساقتاي بەلگىلى. كورشىلەرىمىز وسىدان ونشاقتى جىل بۇرىن-اق: «سىزدەردىڭ پرەزيدەنتتەن جولدارىڭىز بولعان. نۇرسۇلتان نازارباەۆ قازاقستان مەملەكەتىن كوتەردى. دۇنيەجۇزى ەلدەرىڭىزدى بىلەدى, ساناسادى. كوپتەگەن مەملەكەتتەر «ەرتەڭگى كۇنىمىز قانداي بولادى؟» دەپ ويلانىپ جۇرگەندە استاناداي الىپ, ادەمى قالانى سالىپ الدىڭىزدار. الەۋمەتتىك جاردەم جاقسى, سىزدەردىڭ زەينەتكەرلەرىڭىز العان زەينەتاقىنى بىزدە جىگىتتەر سىرت مەملەكەتتەرگە بارىپ, جۇمىس جاساپ زورعا اكەلىپ ءجۇر. باقىتتىسىزدار عوي», دەگەن. مۇنداي اڭگىمەنى كوپ ەستىپ ءجۇرمىز.
قۇدايعا شۇكىر, قازاقستاننىڭ جەرگە قارايتىنداي جاعدايى جوق. الەمدىك داعدارىس مىقتى دەگەن مەملەكەتتەردىڭ ءوزىن قاقپاقىلعا سالىپ جاتقاندا ءبىزدىڭ وتانىمىز ونشالىقتى سەزىنە قويعان جوق. يندۋستريالاندىرۋ باعدارلاماسىنان بولەك اۋىل شارۋاشىلىعىنا قىرۋار قارجى سالىندى.
شارۋالار مەن ديقاندار ۇكىمەتتەن جاساعان جۇمىسىنا وراي سۋبسيديا الىپ, اياعىنان نىق تۇرىپ الدى. قورا سال, شىڭىراۋدان قۇدىق قاز, مەملەكەت شىعارعان شىعىنىڭنىڭ جارتىسىن ءوز قالتاسىنان وتەپ بەرەدى. قازىر وڭتۇستىك قازاقستان وبلىسى اكىمدىگى ون, ون بەس ساۋىن سيىر, بورداقىعا ءىرى قارا بايلاعان ورتا شارۋاعا سۋبسيديا, جەڭىل نەسيە الىپ بەرىپ جاتىر. ورتا شارۋا حالىقتىڭ جارتىسىنان كوبىن قۇرايتىنىن ەسكەرسەك, ەلدىڭ ەرتەڭىن ويلاعان ەلباسىنىڭ كورەگەندىلىگى وسىنداي ءىرى ىستەردەن ايقىن كورىنەدى.
«قازاقستان-2050» ستراتەگياسى, ءۇميد باعدارلاماسى, «نۇرلى جول – بولاشاققا باستار جول» جولداۋى سىندى مەملەكەتتىڭ الداعى ءومىرىن, كەلەشەگىن ايقىندايتىن ۇزاق مەرزىمدى باعدارلامالاردى اياعىنا دەيىن ورىنداۋعا مەملەكەت باسشىسى نۇرسۇلتان نازارباەۆتىڭ باسشىلىعى كەرەك. ويتكەنى, بۇل باعدارلامالار ەلباسىنىڭ تىكەلەي باستاماسىمەن دۇنيەگە كەلدى.
ءبىزدىڭ مەملەكەتتىڭ ماقساتى ۇلكەن, كەلەشەگى كەمەل, سول جاقسى كۇندەردى جاقىنداتاتىن, داعدارىس تولقىندارىنا سوقتىرمايتىن ۇزاق مەرزىمدى ستراتەگيالىق باعدارلامالارى بار.
قازاقستان حالقى اسسامبلەياسى وتانداستارىمىزدىڭ ورتاق پىكىرىن ءبىلىپ, وسىنداي باستاما كوتەردى دەپ بىلەمىز. نۇرسۇلتان ءابىش ۇلىن مەرزىمنەن بۇرىن سايلاپ الىپ, مەملەكەتتىك ماسەلەلەردى ۋاقتىلى شەشۋىنە مۇمكىندىك بەرۋىمىز كەرەك.
باعلان باتىرشاەۆ,
«سارىاعاش ەوك» جشس
باس ديرەكتورى, وبلىستىق ءماسليحاتتىڭ دەپۋتاتى.
شىمكەنت.
ۋاقىت تالابى وسى
قازاقستان حالقى اسسامبلەياسىنىڭ پرەزيدەنتتىك سايلاۋدى مەرزىمىنەن بۇرىن وتكىزۋ تۋرالى ۇندەۋىن تەلەديداردان كورىپ, تىڭدادىق, كەيىن باسپاسوزدەن وقىدىق. مەنىڭ ويىمشا بارشا قازاقستاندىقتاردىڭ بىرلىگىن بەكەمدەپ وتىرعان اسسامبلەيا كەڭەسى مۇشەلەرىنىڭ بۇل باستاماسى باياندىلىعىمەن قۇندى دەۋ ورىندى. اتا زاڭىمىزعا سايكەس, 2016 جىلى پرەزيدەنتتىك جانە پارلامەنتتىك سايلاۋلار قاتار وتكىزىلۋى ءتيىس. قازىرگىدەي الەمدىك وقيعالاردىڭ شاپشاڭ دامۋى جاعدايىندا ءبىر جىلدا ەكى بىردەي سايلاۋ وتكىزۋدىڭ وزىندىك اۋىرتپاشىلىقتارى بولاتىنىن بىلاي قويعاندا, بۇلاي قوسارلاپ سايلاۋ وتكىزۋ وسى كونستيتۋتسيا قاعيداتتارىمەن دە قيىسپايدى ەكەن. سوندىقتان پرەزيدەنتتىك سايلاۋدى مەرزىمىنەن بۇرىن وتكىزۋدىڭ رەتى كەلىپ-اق تۇر.
قازاقستان حالقى اسسامبلەياسىنىڭ بۇل باستاماسىن مەن دە قولدايمىن, بارشا قازاقستاندىقتار دا سولاي ەتەتىنىنە سەنىمىم مول. قازىر ىرعالىپ-جىرعالاتىن كەز ەمەس, تەز شەشىم قابىلداپ, ەلدىكتىڭ ەرتەڭىن ايقىندايتىن قادامدار جاساۋ قاجەت. الەمدىك ەكونوميكالىق داعدارىس پەن كۇردەلى ساياسي جاعداي ەكى بۇيىردەن قىسىپ تۇرعان كۇردەلى كەزەڭ وسىلاي قيمىلداۋعا يتەرمەلەيدى. قازاقستاننىڭ كوپۇلتتى حالقى ەلباسىمىز نۇرسۇلتان نازارباەۆتىڭ سارابدال ساياساتىنىڭ ارقاسىندا بىرلىگى مەن ىنتىماقتاستىعىن پاش ەتتى, سونىمەن قاتار, قازاقستان ىشكى جانە سىرتقى ساياساتتا جۇرگىزىلەتىن باعىتتاردى قولداي وتىرىپ, ەكونوميكاسى جەتىك دامىعان 50 ەلدىڭ قاتارىنا الدەقايدا ەرتە ەنىپ ۇلگەردى.
الايدا, ۋاقىت العا جاڭا سىن-قاتەرلەردى تارتۋدا, سونى مىندەتتەردى بەلگىلەۋدە. ەڭ باستىسى, «نۇرلى جول – بولاشاققا باستار جول» اتتى باعدارلاماسىن جانە «قازاقستان-2050» ستراتەگياسىن جۇزەگە اسىرۋدا دا ەلباسى باسىم باعىتتاردى ايقىنداپ قانا قويماي, ولاردى جۇزەگە اسىرۋدىڭ جولدارىن ناقتىلاپ بەردى. پرەزيدەنتتىك سايلاۋدى 2015 جىلى مەرزىمىنەن بۇرىن وتكىزۋ ارقىلى ءبىز ەلباسىنا ءوزىنىڭ ۇزاق مەرزىمدى سارابدال ساياساتىن تولىق جۇزەگە اسىرۋعا مۇمكىندىك بەرەمىز.
راس, وتكەن كەزەڭدە ەل ەكونوميكاسىندا ايتارلىقتاي ىلگەرىلەۋ بولدى, يندۋستريالىق-يننوۆاتسيالىق ءىرى جوبالار جۇزەگە اسىرىلىپ, اۋىلدىڭ اجارى كىردى. مۇنىڭ پرەزيدەنتتىڭ سارابدال ساياساتىنىڭ ارقاسىندا مۇمكىن بولعانىن قازاقستاندىقتار بىلەدى جانە تەرەڭ تۇسىنەدى. سوندىقتان دا داعدارىستى دا دامۋ تەتىگىنە اينالدىرۋعا باعىت ۇستاعان پرەزيدەنتتەن حالىق كوپ ءۇمىت كۇتەدى.
«الەمدە تۇراقسىزدىق ورىن العان جاڭا ءارى كۇردەلى كەزەڭدە ەلىمىز ستراتەگيالىق باعىتىنان اينىماي, قازاقستاندى جاڭعىرتۋ جانە دۇنيەجۇزىنىڭ وزىق 30 ەلىنىڭ قاتارىنا ەنۋى ءۇشىن ەلباسى ن.ءا.نازارباەۆقا سەنىم ءبىلدىرۋ قاجەت. سونىمەن قاتار, ەلباسىنا سەنىم مانداتىن ءبىلدىرۋ ارقىلى الەمدىك دامۋدىڭ جاڭا كەزەڭىندە حالقىمىزدى بىرىكتىرىپ, مەملەكەتتى دامىتۋداعى ماڭىزدى ماسەلەلەرگە دەن قويۋعا مۇمكىندىك الامىز», دەلىنگەن ۇندەۋدە. ءبىز دە سولاي ويلايمىز, سوندىقتان دا بۇل باستامانى قىزۋ قولدايمىز.
تىلەپجان يبراگيموۆ,
«قازاقستاننىڭ 30 جىلدىعى» جشس ديرەكتورى, وبلىستىق ءماسليحاتتىڭ دەپۋتاتى.
اقتوبە وبلىسى,
قوبدا اۋدانى.
