فوتو: اشىق دەرەككوز
«قازاقستان – الەۋمەتتىك مەملەكەت. دەنساۋلىق ساقتاۋ, الەۋمەتتىك قامسىزداندىرۋ, عىلىم جانە مادەنيەت سالاسىنا قاتىستى بارلىق مىندەتتەمە تولىق ورىندالادى. شەتەلدىكتەر, اسىرەسە, كورشى مەملەكەتتەردىڭ تۇرعىندارى ءبىزدىڭ ەلدەگى الەۋمەتتىك قىزمەتتىڭ سونشالىقتى دامىعانىنا قىزىعا دا, قىزعانا دا قارايدى. سونىڭ ىشىندە كەپىلدىك بەرىلگەن تەگىن مەديتسينالىق كومەك جانە ازاماتتارعا ارنالعان كوپتەگەن جەڭىلدىك بار. ءتىپتى, قازاقستاندى «كوممۋنيزم ورناعان» ەل دەپ اتاي باستادى», دەدى پرەزيدەنت.
سونىمەن بىرگە مەملەكەت باسشىسى ءبىلىم بەرۋ مەن مەديتسينا سالاسىنداعى «جان باسىنا سايكەس قارجىلاندىرۋ» جۇيەسى تۇبەگەيلى قايتا قاراۋدى قاجەت ەتەتىنىن ايتتى. ونىڭ سوزىنشە, بۇرمالانعان ءتارتىپ بيۋدجەتكە سالماق ءتۇسىرىپ, بەي-بەرەكەت جاعداي قالىپتاستىرعان.
«بۇل سالانى مەملەكەتتەن قارجىلاندىرۋ جۇيەسىنىڭ ءوزىن رەفورمالاۋ كەرەك. مينيسترلىكتىڭ بۇرىنعى باسشىلارى ەنگىزگەن بۇگىنگى بۇرمالانعان ءتارتىپ بەي-بەرەكەتتىككە اكەپ سوقتىرادى, سەبەبى, قازىردىڭ وزىندە قاراجات جەتپەي جاتىر. بارلىعى اشىق بولۋعا ءتيىس, وسى سالاداعى ءۇردىستىڭ ءبارىن تسيفرلاندىرعان ءجون», دەپ اتاپ ءوتتى قاسىم-جومارت توقاەۆ.
پرەزيدەنت الەۋمەتتىك جەڭىلدىكتەردى تەرىس پايدالانۋ, جالعان مارتەبە ارقىلى كومەك الۋ فاكتىلەرىنە دە قاتاڭ توقتالدى. ونىڭ ايتۋىنشا, بۇل ماسەلە الەۋمەتتىك ادىلدىككە تىكەلەي قاۋىپ توندىرەدى.
«زاڭسىز ارەكەتتەر از ەمەس. سوندىقتان, ۇكىمەت پەن قۇقىق قورعاۋ ورگاندارىنا وسى سالادا ءتارتىپ ورناتۋدى تاپسىردىم. ءبىز وركەنيەتتى, ادىلەتتى مەملەكەت قۇرىپ جاتىرمىز. قازاقستاندا بارلىق ازاماتتىڭ قۇقىعى بىردەي, ەشكىمگە ەشقانداي ارتىقشىلىق نەمەسە باسىمدىق بەرىلمەيدى», دەدى مەملەكەت باسشىسى.
سۇحباتتا قانداستار ماسەلەسى دە قوزعالدى. پرەزيدەنت تاريحي وتانىنا ورالعان اعايىننىڭ ەل ومىرىنە دۇرىس كىرىگۋى ءۇشىن جۇيەلى جۇمىس قاجەت ەكەنىن اتاپ ءوتتى. ونىڭ ايتۋىنشا, بۇل باعىتتا ورتالىق جانە جەرگىلىكتى بيلىك پەن قۇقىق قورعاۋ ورگاندارى بىرلەسە ارەكەت ەتۋگە ءتيىس.
