فوتو: تجم
وسى ۋاقىتقا دەيىن قازاقستاننىڭ ۇلان-عايىر اۋماعىنا بايلانىستى ءاربىر وڭىردە ۋقت (ۋلتراقىسقا تولقىن) راديوبايلانىس جۇيەسى دەربەس قالىپتاسىپ كەلدى. الايدا تەحنيكالىق شەشىمدەردىڭ بىتىراڭقىلىعى مەن بىرىڭعاي ستاندارتتىڭ بولماۋى توتەنشە جاعدايلاردا بولىمشەلەردى باسقارۋ تيىمدىلىگىن تومەندەتكەن ەدى.
بايلانىستىڭ ورنىقتىلىعى مەن جەدەلدىگىنە قويىلاتىن جوعارى تالاپتار رەسپۋبليكالىق دەڭگەيدەگى بىرىڭعاي ورتالىقتاندىرىلعان جۇيەنى قۇرۋعا نەگىز بولدى. وسى ماقساتتا توتەنشە جاعدايلار مينيسترلىگى, ۇلتتىق ۇلان جانە ىشكى ىستەر مينيسترلىگى وكىلدەرىنەن قۇرالعان ۆەدومستۆوارالىق جۇمىس توبى قۇرىلدى.
جاڭا جەلى قالاي جۇمىس ىستەيدى؟
جۇمىس توبى راديوقامتۋدىڭ باسىم ايماقتارىن, ينفراقۇرىلىم وبەكتىلەرىن ورنالاستىرۋدى جانە جوبانى ىسكە اسىرۋدىڭ كەزەڭدىلىگىن ەگجەي-تەگجەيلى پىسىقتادى. جىل بويى جۇرگىزىلگەن مونتاجداۋ جۇمىستارىنىڭ ناتيجەسىندە نەگىزگى ەلدى مەكەندەر مەن باستى كولىك باعىتتارى بىرىڭعاي راديوجەلىگە بىرىكتىرىلدى.
«قابىلدانعان شەشىمدەردىڭ قورىتىندىسى بويىنشا ەلىمىزدىڭ بارلىق وڭىرلەرى بىرىڭعاي راديوجەلىسىنە بىرىكتىرىلدى. بۇل جۇيەنى ودان ءارى كەڭەيتۋگە, ونىڭ ىشىندە شالعايداعى اۋدان ورتالىقتارى مەن جەتۋگە جولى قيىن اۋماقتاردى قامتۋعا تولىق جاعداي جاسادى», دەپ حابارلادى توتەنشە جاعدايلار مينيسترلىگى.
جۇيەنى دامىتۋدىڭ كەلەسى كەزەڭدەرى دە ناقتى بەلگىلەنگەن:
2026 جىلى استانا, رەسپۋبليكالىق ماڭىزى بار قالالار مەن وبلىس ورتالىقتارىندا تۇراقتى راديوسيگنالدى قامتاماسىز ەتۋ ءۇشىن قوسىمشا بازالىق ستانتسيالار ساتىپ الىنادى.
SmartOne ديسپەتچەرلىك پلاتفورماسىن قولدانا وتىرىپ, اۋداندىق بولىمشەلەردىڭ رەترانسلياتورلارىن ترانكينگتىك جەلىگە بىرىكتىرۋ جوسپارلانعان. بۇل شالعايداعى نىسانداردا, اۆتوجولدار مەن ورمان القاپتارىندا ساپالى بايلانىس ورناتۋعا مۇمكىندىك بەرەدى.
دامۋدىڭ ماڭىزدى كەزەڭى – HyTalk كوممۋتاتسيالىق جابدىعىن پايدالانۋ. بۇل تەحنولوگيا ترانكينگتىك جەلىلەردى, 3G/4G/LTE كەڭ جولاقتى جەلىلەرىن جانە ينتەرنەتتى بىرىڭعاي كوممۋنيكاتسيالىق كەڭىستىكتە توعىستىرادى.
