ايماق باسشىسى ءورتتىڭ شىعۋ وشاعىن, سەبەبىن جانە شىعىن كولەمىن انىقتاۋ ءۇشىن ارنايى كوميسسيا قۇرىلعانىن حابارلادى.
– تۇرعىن ۇيگە نىسانالى توتەنشە جاعداي جاريالاندى. ءار پاتەر بويىنشا كەلتىرىلگەن شىعىن ەسەپتەلىپ, زاڭ تالاپتارىنا سايكەس قالپىنا كەلتىرۋ جۇمىستارى جۇرگىزىلەدى. زارداپ شەككەن تۇرعىندارعا قاجەتتى كومەك كورسەتىلەدى, – دەدى وبلىس اكىمى.
قازىرگى تاڭدا مەردىگەرلەر شاتىر جابىندىلارىن الىپ, قالپىنا كەلتىرۋ جۇمىستارىن باستاپ كەتتى. پاتەرلەردى جوندەۋ ءتيىستى كوميسسيانىڭ ناقتىلاۋ, انىقتاۋ شارالارىنان كەيىن جۇزەگە اسادى.
وبلىس اكىمى زەردەلەۋ كومميسيانىڭ جۇمىسىنا تۇرعىنداردى دا تارتۋ قاجەتتىگىن باسا ايتىپ, قالا باسشىلىعىنا ناقتى تاپسىرمالار جۇكتەدى. سونداي-اق, تۇرعىنداردى سابىرلىق تانىتۋعا, ساقتىق شارالارىن قاتاڭ ساقتاۋعا شاقىردى.
ەسكە سالا كەتەيىك, 2025 جىلعى 31 جەلتوقساندا ساعات 22:18-دە اتالعان تۇرعىن ءۇيدىڭ بالكونىنان ءورت شىعىپ, جالىن شاتىرعا تاراعان.
توتەنشە جاعدايلار دەپارتامەنتىنىڭ كۇشىمەن 100 ادام, ونىڭ ىشىندە 30 بالا ەۆاكۋاتسيالاندى. ساعات 00:13-تە ءورت تولىق ءسوندىرىلدى. زارداپ شەككەندەر جوق.
وقيعا ورنىنا 62 ادام جانە 22 تەحنيكا جۇمىلدىرىلدى. كوپقاباتتى تۇرعىن ءۇيدىڭ بىرقاتار تۇرعىندارى قوناقۇيگە ورنالاستىرىلدى.
ايماق باسشىسىنىڭ تاپسىرماسىنا سايكەس وقيعا ورنىندا وبلىس اكىمىنىڭ ورىنباسارى التاي ءالى مەن تاراز قالاسىنىڭ اكىمى باقىتجان ورىنبەكوۆ جۇمىس جۇرگىزىپ جاتىر.
