بۇل جەردە تاراز گارنيزونىنىڭ تاۋ قورىقشىلارى جەكە پولكى ورنالاسقان. داڭقتى قولباسشى, كەڭەس وداعىنىڭ باتىرى, حالىق قاھارمانى باۋىرجان مومىش ۇلىنىڭ 115 جىلدىعىنا ارنالعان سالتاناتتى جيىندا پولك باسشىلىعى, جەكە قۇرامى, شاقىرىلعان قوناقتار جانە قارۋلى كۇشتەردىڭ ارداگەرلەرى بوي كورسەتتى.
قورعانىس ءمينيسترى اۆياتسيا گەنەرال-لەيتەنانتى داۋرەن قوسانوۆ ءوز سوزىندە جامبىل وبلىسى الىشەر قىرىقباي ۇلى, اۋەسباي كومەكباي ۇلى, ءامىر جاڭاباي ۇلى, ماقسات تۇرار ۇلى, مۇحيت بالماعامبەت ۇلى, تىلەۋجان قۋاتجان ۇلى جانە ماقسات قۇرمانعازى ۇلى سىندى باتىرلارىمەن ماقتانا الاتىنىن اتاپ ءوتتى.
ونىڭ ايتۋىنشا, بۇل باتىرلار – ءوز حالقىنا ادال قىزمەت ەتكەن, وتان قورعاعان ناعىز پاتريوتتار. قازاقستاندىقتار ەرجۇرەك جاۋىنگەرلەر مەن باۋىرجان مومىش ۇلىنىڭ ەرلىگىن ۇمىتپايدى. وعان حالىق قاھارمانى اتاعىنىڭ بەرىلۋى – حالىقتىڭ باتىردىڭ ەرلىگىنە دەگەن زور قۇرمەتىنىڭ ايقىن كورىنىسى.
ەسكە سالساق 25 جەلتوقساندا ۇلى وتان سوعىسىنداعى كورسەتكەن ەرلىگى مەن باتىلدىعى ءۇشىن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ جارلىعىمەن باۋىرجان مومىش ۇلىنا (قايتىس بولعاننان كەيىن) حالىق قاھارمانى اتاعى بەرىلىپ, ەرەكشە ايىرىم بەلگىسى – التىن جۇلدىز بەن «وتان» وردەنى تاپسىرىلدى.
