ماۋلەن اشىمباەۆ كەزدەسۋگە قاتىسۋشىلارعا ءىلتيپات ءبىلدىرىپ, وتكەن جىل سپورتتىق ءىس-شارالارعا تولى بولعانىن جانە قازاقستاندىق اتلەتتەر جارقىن جەڭىستەرگە قول جەتكىزگەنىن اتاپ ءوتتى. بۇل جەتىستىك سپورتشىلار مەن جاتتىقتىرۋشىلاردىڭ ۇيلەسىمدى جۇمىسىنىڭ جانە وتباسىلار مەن جانكۇيەرلەردىڭ قولداۋىنىڭ ناتيجەسى ەكەنى ايتىلدى.
ء«وتىپ بارا جاتقان 2025 جىل وتاندىق بوچچا ءۇشىن ناتيجەلى بولدى جانە ەلىمىزدە بۇل سپورتتىڭ دامۋىنا سەرپىن بەرگەن جاڭا مۇمكىندىكتەرگە جول اشتى. قازاقستاندا العاش رەت Astana World Boccia Challenger حالىقارالىق ءتۋرنيرى ۇيىمداستىرىلدى. بۇل ەلىمىزدىڭ پاراسپورت تاريحىنداعى ەڭ ماڭىزدى وقيعالاردىڭ ءبىرى بولدى. سونداي-اق پارااتلەتتەرىمىز حالىقارالىق جارىستاردا توپ جارىپ, جۇلدەگە ىلىكتى. سپورتشىلارىمىزدىڭ جىگەرى مەن تاباندىلىعىنىڭ ارقاسىندا قازىر قازاقستان قۇراماسى بوچچادان الەمدىك رەيتينگتە 18-ورىندا تۇر. ال ورتالىق ازيادا ءابسوليۋتتى كوشباسشىمىز. بۇل جەتىستىكتە بوچچانى سەرىك ەتكەن ارقايسىڭىزدىڭ ۇلەسىڭىز بار. ءبىز سىزدەردى ماقتان تۇتامىز جانە قولداۋدى جالعاستىرا بەرەمىز. الدىمىزدا وڭىرلەردە بوچچانى دامىتۋ, جاڭا جارىستار, ونىڭ ىشىندە ەلىمىزدە بوچچادان الەم كۋبوگى جولىنداعى سايىس وتكىزۋ, قازاقستاننىڭ الەمدىك رەيتينگتەگى پوزيتسياسىن ودان ءارى نىعايتۋ سياقتى جاڭا مىندەتتەر تۇر», دەپ سەنات توراعاسى سپورتشىلارعا, جاتتىقتىرۋشىلارعا, اتا-انالارعا جانە جانكۇيەرلەرگە العىس ءبىلدىردى.
م.اشىمباەۆ اتاپ وتكەندەي, مەملەكەت باسشىسى ەلىمىزدە مۇگەدەكتىگى بار ازاماتتار ءۇشىن تەڭ مۇمكىندىكتەر قالىپتاستىرۋعا ۇنەمى باسا ءمان بەرىپ كەلەدى. بۇل باعىتتا كەشەندى رەفورمالار ىسكە اسىرىلىپ, مۇددەلى تاراپتارمەن جۇيەلى جۇمىس جۇرگىزىلۋدە. ينكليۋزيۆتى قوعام قۇرۋ جولىنداعى وسىنداي ءوزارا ءىس-قيمىلدىڭ ماڭىزدى جەتىستىكتەرى مەن ناتيجەلەرىنىڭ ءبىرى استانادا ينكليۋزيۆتى سپورت ورتالىعىنىڭ اشىلۋى ەكەنى ءسوزسىز. جاڭا كەشەن ەرەكشە قاجەتتىلىگى بار بالالارعا ءوز مۇمكىندىگىن جۇزەگە اسىرىپ, جاڭا دوستار تابۋعا ىقپال ەتەدى جانە ورتاعا, ەرەسەك ومىرگە بەيىمدەلۋگە جول اشادى.
«مەملەكەت باسشىسىنىڭ باستاماسىمەن سالىنعان ينكليۋزيۆتى سپورت ورتالىعى جاي سپورت نىسانى عانا ەمەس. بۇل – تەڭ مۇمكىندىكتەر, دامۋ, قارىم-قاتىناس جانە ءوزارا قولداۋ كەڭىستىگى. وتكەن اپتادا ورتالىققا پرەزيدەنت قاسىم-جومارت توقاەۆ كەلدى. سونىڭ ناتيجەسىندە ەلىمىزدىڭ بارلىق وڭىرىندە وسىنداي ينكليۋزيۆتى سپورت ورتالىقتارىن قۇرۋ تۋرالى تاپسىرما بەرىلدى. بۇل – ءبىز, ياعني پاراسپورتشىلار, اتا-انالار, جاتتىقتىرۋشىلار, فەدەراتسيا مۇشەلەرى مەن سەرىكتەستەر ءۇشىن ۇلكەن جەتىستىك. وسى رەتتە سىزدەرگە ەلىمىزدەگى ينكليۋزيۆتى سپورتتى دامىتۋعا قوسقان ۇلەستەرىڭىز بەن قاجىرلى ەڭبەكتەرىڭىز ءۇشىن تاعى دا العىس ايتامىن. بارشاڭىزدى جاڭا جىل مەرەكەسىمەن شىن جۇرەكتەن قۇتتىقتايمىن! كەلە جاتقان 2026 جىل ەلىمىزگە جاڭا جەتىستىكتەر مەن جەڭىستەر اكەلسىن», دەدى سەنات توراعاسى.
