كوكتەمدە كورەرمەندەر «وپەراليا» حالىقارالىق فەستيۆالىنىڭ مازمۇندى پرەمەرالىق باعدارلاماسىن تاماشالادى. وندا رولان پەتيدىڭ ءۇش حورەوگرافيالىق جاۋھارى – «ارلەزيانكا», «بوزبالا جانە ءولىم», «كارمەن» بالەتتەرى تانىستىرىلدى. ودان كەيىن پەتر چايكوۆسكيدىڭ «ۇيقىداعى ارۋ» اۋقىمدى قويىلىمى ۇسىنىلسا, جىلدىڭ قورىتىندى پرەمەراسى دج.ۆەرديدىڭ «ريگولەتتو» وپەراسى بولدى. بالەت ترۋپپاسى لەو دەليبتىڭ «كوپپەلياسىن» كەرەمەت ورىنداپ, ماسكات كورولدىك وپەرا تەاترىنىڭ ساحناسىن باعىندىردى.
مادەنيەت جانە اقپارات مينيسترلىگىنىڭ قولداۋىمەن «وپەراليا» فەستيۆالى يتاليا, فرانتسيا, قىتاي, موڭعوليا, رەسەي مەن قازاقستاننان ارتىستەر قاتىسقان 30-دان استام شارانى بىرىكتىردى. بۇل ۋاقىتتا قازاقستاندىق ورىنداۋشىلاردىڭ الەمدىك ساحنالارداعى جەتىستىكتەرى تەاتردىڭ شىعارماشىلىق بەدەلىن نىعايتا ءتۇستى. مۇنداي تابىستاردىڭ قاتارىندا جەتەكشى سوليست باقتيار ادامجاننىڭ حالىقارالىق ونەر كورسەتۋلەرى, تەنور ءاليحان زەينوللانىڭ ءروسسينيدىڭ «كۇلبيكەسىندەگى» حانزادا دون راميرو پارتياسىندا يتاليالىق دەبيۋتى بار. سونداي-اق دياس قۇرمانعازى ۋفادا رۋدولف نۋرەەۆ اتىنداعى فەستيۆالعا قاتىستى, ال لەيلا الامانوۆا ءروسسينيدىڭ «رەيمسكە ساياحات» سپەكتاكلىندەگى جۇمىسى ءۇشىن يتاليالىق سىنشىلاردىڭ جوعارى باعاسىنا يە بولدى. يتاليادا تەاتردى ءبىرىنشى سكريپكا – وركەستر كونتسەرتمەيستەرى باعدات ءابىلحانوۆ تا ويداعىداي تانىستىردى.
جاس تەنور نۇرسۇلتان انۋاربەك بىرنەشە كەزەڭنەن تۇراتىن كۇردەلى ىرىكتەۋدەن ءوتىپ, ۇلكەن تەاتردىڭ جاستار وپەرا باعدارلاماسىنىڭ قاتىسۋشىسى اتاندى. مۇنداي تابىستار «استانا وپەرانىڭ» حالىقارالىق ارەناداعى بەدەلىن نىعايتىپ, تەاتر ارتىستەرى قازاقستاننان تىس جەرلەردە دە تانىمال ءارى باسەكەگە قابىلەتتى ەكەنىن كورسەتتى.
گاسترول تاريحىنداعى جارقىن پاراقتار سانكت-پەتەربوردا وتكەن Dance Open فەستيۆالىمەن دە بايلانىستى. وندا ەۋروپاداعى ەڭ ءىرى بالەت الاڭدارىنىڭ بىرىندە «استانا وپەرا» بالەت ترۋپپاسىنىڭ ورىنداۋىندا رولان پەتيدىڭ «كوپپەلياسى» ۇسىنىلعان ەدى.
سونىمەن قاتار تەاتر ەلىمىزدە حالىقارالىق بايلانىستاردى دامىتۋ بويىنشا بەلسەندى جۇمىس اتقاردى. ۇلكەن زال مەن ك.بايسەيىتوۆا اتىنداعى كامەرالىق زال ساحنالارىندا ابايدىڭ 180 جىلدىعىنا ارنالعان اۋقىمدى ءىس-شارالار ءوتىپ, وزبەكستان ۇلتتىق بالەتىنىڭ گاسترولدەرى ۇيىمداستىرىلدى, ال رۋمىنيانىڭ «مادريگال – مارين كونستانتين» حورى العاش رەت قازاقستاندا, «استانا وپەرادا» ونەر كورسەتتى. بۇدان كەم تۇسپەيتىن تاعى ءبىر جارقىن وقيعا – «باح جانە ونىڭ زامانداستارى» باروككو مۋزىكاسى فەستيۆالى بولدى. ول تەاتر حورىن, وركەسترى مەن سوليستەرىن بىرىكتىرگەن مازمۇندى باعدارلامامەن اشىلدى.
جىلدىڭ شىعارماشىلىق بوياۋىن باسقا دا حالىقارالىق جوبالار تولىقتىردى: كامەرالىق زالدا «كورەيا مۋزىكاسى, بيلەرى مەن اندەرى» كونتسەرتى ءوتتى, سونداي-اق وزگە ەلدەردىڭ ءداستۇرى مەن مادەنيەتى ارقىلى كورەرمەندەر مەن ورىنداۋشىلاردى بىرىكتىرگەن ەستون مۋزىكاسىنىڭ كونتسەرتى ۇسىنىلدى.
بۇل باستامالار جىلدىڭ جالپى كورىنىسىمەن ۇيلەسىمدى جاراسىپ, تەاتردىڭ مادەني ديالوگتى كەڭەيتۋ ءارى جاڭا كورەرمەندەردى تارتۋ ماقساتىندا ءوز ساحناسىن قالاي پايدالاناتىنىن كورسەتىپ بەردى.
ەلىمىزدىڭ قالالارىنا گاسترولدىك ساپارلار جوعارىدا اتالعان وقيعالاردان اۋقىمدى بولماسا, كەم تۇسپەدى. كونتسەرتتەر مەن سپەكتاكلدەر اقتوبە, حرومتاۋ, رۋدنىي جانە پاۆلودار قالالارىندا ءوتتى. تەاتر ەلوردالىق ساحنادان تىس جەرلەرگە شىعاتىن ءداستۇرىن جالعاستىرىپ, ءوز ونەرىن ءوڭىر تۇرعىندارىمەن ءبولىستى, زاۋىتتاردا ونەر كورسەتىپ, مۋزىكالىق كوللەدجدەردە شەبەرلىك ساباقتار بەردى.
جاڭا قويىلىمدار, حالىقارالىق تانىمالدىلىق, گاسترول گەوگرافياسىنىڭ كەڭەيۋى جانە الەۋمەتتىك باستامالار مازمۇندى شىعارماشىلىق كەلبەتتى قالىپتاستىردى.
