تاريحي تامىرمەن تابىسقان ءسات

بۇل – جاي عانا كوشى-قون ەمەس, ەلگە ەلدىڭ قوسىلۋى, ءۇمىت پەن ءۇمىتتىڭ جالعانۋى. بيىلعى قانداستاردىڭ باسىم بولىگى كورشىلەس مەملەكەتتەردەن قونىس اۋداردى. مىسالى, 44,5%-ى وزبەكستاننان, 43,6% – قىتايدان, 4,1% – تۇرىكمەنستاننان, 3% – مونعوليادان 2,5% – رەسەيدەن جانە 2,3 باسقا ەلدەردەن كەلگەن. ولاردىڭ اراسىندا ەڭبەككە قابىلەتتى جاستاعىلار دا, جاسوسپىرىمدەر مەن زەينەت جاسىنداعى ازاماتتار دا بار. دەمەك كوش – ەلدىڭ دەموگرافيالىق قانا ەمەس, الەۋمەتتىك بولاشاعىنا دا اسەر ەتەتىن ماڭىزدى ۇدەرىس. ءبىلىم دەڭگەيى جاعىنان دا قانداستار ءارتۇرلى. اراسىندا جوعارى ءبىلىمدى ماماندار, كاسىبي-تەحنيكالىق سالادا شىڭدالعان ازاماتتار, سونداي-اق جالپى ورتا بىلىممەن كەلگەندەر دە كەزدەسەدى. ولار ەكونوميكا مەن ەڭبەك نارىعى ءۇشىن ۇلكەن مۇمكىندىك. ويتكەنى ءبىلىمى مەن تاجىريبەسىن ەلىمىزدىڭ دامۋىنا جۇمساۋعا دايىن.

قونىس اۋدارعان قازاقتار اقمولا, اباي, قوستاناي, پاۆلودار, اتىراۋ, باتىس, شىعىس جانە سولتۇستىك قازاقستان وبلىستارىنا قونىستاندىرىلدى. اسىرەسە ەڭبەك كۇشى تاپشى سولتۇستىك جانە شىعىس ايماقتارعا باسىمدىق بەرىلدى. بۇل وڭىر­لەردە قانداستاردى قابىلداۋ ءۇشىن ارنايى كۆوتا بەلگىلەنىپ, ونى جۇزەگە اسىرۋ باعىتىندا جۇيەلى جۇمىس جۇرگىزىلىپ جاتىر. مەملەكەت تاراپىنان كورسەتىلىپ جاتقان قولداۋ دا ايتارلىقتاي. قانداستاردى جۇمىسپەن قامتۋ, جاڭا ورتاعا بەيىمدەۋ, تۇرعىن ءۇي ماسەلەسىن شەشۋ باعىتىندا ناقتى تەتىكتەر ىسكە قوسىلدى. سونىڭ ءبىرى – تۇرعىن ءۇي الۋعا نەمەسە سالۋعا ارنالعان قايتارىمسىز قارجىلاي قولداۋ. بۇل باستاما كوشىپ كەلگەن وتباسىلارعا جاڭا ءومىردى نىق قاداممەن باستاۋعا مۇم­كىندىك بەرىپ وتىر. قانداستاردىڭ ەلگە ورالۋى – ستاتيستيكا عانا ەمەس, سانادان وشپەگەن ساعىنىش, ۇلتتىڭ ىشكى تۇتاستىعىن كۇشەيتەتىن رۋحاني ۇدەرىس. ءاربىر ورالعان قانداستىڭ جانارىندا ءبىر ءۇمىتتىڭ شامى جانىپ تۇرعانى شىندىق.