سونىمەن قاتار اق ءۇي باسشىسى حاماس قارۋىن تاستاۋى ءتيىس ەكەنىن تاعى دا تالاپ ەتىپ, كەرىسىنشە جاعدايدا «وتە قاتاڭ سالدارى» بولاتىنىن ايتتى. ترامپ جۋرناليستەرگە پالم-بيچتەگى مار-ا-لاگو رەزيدەنتسياسىندا پىكىر ءبىلدىردى. ونىڭ ايتۋىنشا, اقش-تىڭ ماۋسىم ايىنداعى سوققىسىنان كەيىن يران جاڭا نىسانداردا زىمىران جانە يادرولىق ازىرلەمەلەرىن قايتا جانداندىرۋى مۇمكىن دەگەن اقپارات بار.
«ولاردىڭ قارۋلانۋدى قايتا كۇشەيتىپ جاتقانى تۋرالى وقىدىم. ەگەر سولاي بولسا, ءبىز جويعان نىسانداردا ەمەس, باسقا جەرلەردە ىستەپ جاتقان بولۋى مۇمكىن. ءبىز ولاردىڭ قايدا بارىپ, نە ىستەپ جۇرگەنىن ناقتى بىلەمىز. ولار مۇنى ىستەمەسە ەكەن دەيمىن, ويتكەنى B-2 ۇشاعىمەن بەكەر وتىن جاعۋدى قالامايمىز. ونداي ۇشۋ بارىپ-قايتۋعا 37 ساعات كەتەدى», دەدى ترامپ.
وسى ۋاقىتتا يراندا ۇلتتىق ۆاليۋتا – ريالدىڭ كۇرت قۇنسىزدانۋى مەن ينفلياتسيانىڭ ءوسۋى تىركەلدى. 29 جەلتوقساندا اشىق نارىقتا دوللار باعامى شامامەن 1,39 ملن ريالعا جەتكەن. يراندىق باق تەگەران, يسفاحان, شيراز جانە مەشحەد قالالارىندا, سونىڭ ىشىندە دۇكەن يەلەرى قاتىسقان نارازىلىقتار وتكەنىن جازدى. Reuters بۇل جاعدايدىڭ نەگىزگى سەبەپتەرى رەتىندە 2018 جىلى اقش قايتا ەنگىزگەن سانكتسيالاردى جانە ەكونوميكانى ىرىقتاندىرۋعا قاتىستى سوڭعى شەشىمدەر اياسىندا ۆاليۋتا نارىعىنا تۇسكەن قىسىمدى اتايدى.
ەلدىڭ ورتالىق بانكىنىڭ توراعاسى موحامماد رەزا فارزين وتستاۆكاعا كەتكەن. ونىڭ ءوتىنىشى پرەزيدەنت ماسۋد پەزەشكياننىڭ ماقۇلداۋىن كۇتىپ وتىر.
