كوللاجدى جاساعان امانگەلدى قياس, «EQ»
بۇگىندە ەكىنشى دەڭگەيلى بانكتەردە بالالارعا ارنالعان جيناقتاۋشى شوتتار اشۋعا مۇمكىندىك بار. اتا-انالار وسى بويىنشا ءتيىستى بانكتەردەن نەمەسە قارجى ورتالىعىنان كەڭەس الا الادى. جيناقتاۋ ۇدەرىسى بالا 18 جاسقا تولعانعا دەيىن جۇرگىزىلەدى, ەڭ باستىسى – اتا-انا مەن بانك اراسىندا جاسالاتىن تيپتىك شارت تالاپتارىن ساقتاۋ. وسى مەرزىم ىشىندە قاجەتتى قاراجات جينالىپ, ول كەيىن بالانىڭ ءبىلىم الۋىنا باعىتتالادى. باعدارلامانىڭ باستى ارتىقشىلىعى – ەگەر اتا-انالار شارت تالاپتارىن بۇزباي قاراجات جيناسا, بۇل قارجىعا «ۇلتتىق قور – بالالارعا» جوباسى اياسىندا جينالعان قاراجاتتى قوسۋعا مۇمكىندىك بار. وسىلايشا, ەكى كوزدەن جينالعان قاراجاتتى بىرىكتىرىپ, ءبىلىم الۋعا تولىق پايدالانۋعا بولادى.
مەملەكەت تاراپىنان ءتۇرلى بالاما مۇمكىندىك تە قاراستىرىلعان. ەگەر بالا مەملەكەتتىك ءبىلىم بەرۋ گرانتىنا تولىقتاي يە بولسا, جيناقتالعان قاراجاتتى باۋىرىنا نەمەسە وتباسىنىڭ وزگە مۇشەسىنە ءبىلىم الۋ ءۇشىن اۋدارۋعا بولادى, نە بولماسا جيناقتى ءارى قاراي ساقتاپ قالۋعا مۇمكىندىك بار. ال جوعارى ءبىلىم تۋرالى ديپلوم العاننان كەيىن بۇل قاراجاتتى تۇرعىن ءۇي جاعدايىن جاقسارتۋعا پايدالانۋ تەتىگى دە كوزدەلگەن. قازىرگى تاڭدا ەلىمىز بويىنشا بالالارعا ارنالعان وسىنداي جيناقتاۋشى شوتتاردىڭ سانى 64 مىڭعا جەتكەن.
جوعارى ءبىلىم الۋدىڭ تاعى ءبىر ماڭىزدى قارجىلىق قۇرالى – جەڭىلدەتىلگەن ءبىلىم بەرۋ نەسيەسى. بۇل تەتىك قاناتقاقتى رەدىمدە ەنگىزىلىپ, اتا-انالار تاراپىنان ايتارلىقتاي قىزىعۋشىلىق تۋدىرعان. جىلدىق مولشەرلەمەسى 2–3 پايىزدى قۇرايتىن مۇنداي نەسيە ارقىلى ستۋدەنتتەر جوعارى ءبىلىم الۋعا مۇمكىندىك الادى. سونىمەن قاتار, ديففەرەنتسيالدى گرانت جۇيەسى دە ىسكە اسىرىلىپ جاتىر. بۇل جاعدايدا گرانتتىڭ ءبىر بولىگىن مەملەكەت وتەيدى, ال قالعان بولىگىن اتا-انالار نەمەسە دەمەۋشىلەر قارجىلاندىرا الادى. اتالعان جوبا سىناق رەتىندە ەنگىزىلگەن كەزدە اتا-انالاردان 31 مىڭنان استام ءوتىنىم تۇسكەن. بۇل اتا-انالاردىڭ بالاسىنىڭ بولاشاعى ءۇشىن بىلىمگە قارجى سالۋعا دايىن ەكەنىن كورسەتەدى.
