فوتو: الماتى قالاسى اكىمدىگى
الماتى ءماسليحاتىنىڭ وتىرىسىندا قالالىق تسيفرلاندىرۋ باسقارماسى باسشىسىنىڭ ورىنباسارى مەيرام دۇيسەكوۆ بايانداما جاسادى. ونىڭ ايتۋىنشا, «سەرگەك» جۇيەسىنىڭ جەتكىزۋشىسى – «كوركەم تەلەكوم» جشس-مەن كەلىسىمشارت 2017 جىلى جاسالعان. مەملەكەت قابىلداعان مىندەتتەمەلەردىڭ جالپى سوماسى 9,9 ملرد تەڭگەنى قۇرادى.
بۇگىندە قالادا 1 641 بەينەباقىلاۋ كەشەنى جۇمىس ىستەپ تۇر.
سونىمەن قاتار, 2025 جىلى «كوركەم تەلەكوم» جشس-مەن جاسالعان كەلىسىمشارتتىڭ مەرزىمى اياقتالۋى ءتيىس بولعان. وسىعان بايلانىستى وتكەن جىلدىڭ قازان ايىندا قالا بيلىگى جاڭا كامەرا جەتكىزۋشىسىن تاڭداۋ ءۇشىن جۇمىس توبىن قۇرعان. ۇمىتكەرلەر قاتارىندا Presight, Infodata, «بايلانىس» جانە باسقا دا كومپانيالار بولعان. تالداۋ 2 اي بويى جۇرگىزىلگەنىمەن, جۇمىس توبى ناقتى شەشىمگە كەلە الماعان. ناتيجەسىندە «سەرگەك» جۇيەسىن 2025 جىلدىڭ 31 جەلتوقسانىنا دەيىن قالدىرۋ ۇسىنىلدى.
سونداي-اق جەكە سەرىكتەس ەسەبىنەن كەشەندەر سانىن ارتتىرۋ ۇسىنىلدى: قالا قاجەتتىلىكتەرىنە سايكەس قوسىمشا 350 «سەرگەك» اپپاراتتىق-باعدارلامالىق كەشەنىن ورناتۋ جوسپارلانىپ وتىر. بۇل رەتتە قىزمەت كورسەتۋ تاريفتەرىن كوتەرۋ كوزدەلمەگەن.
الماتىدا «سەرگەك» جۇيەسىن ساقتاپ قالۋدى ءماسليحات دەپۋتاتى الماسحان سماتلاەۆ قولدادى.
«بۇل – قالا ءۇشىن اسا ماڭىزدى جوبا. كەم دەگەندە 1 جىلعا ۇزارتۋدى قولدايسىزدار دەپ ۇمىتتەنەمىن. بولاشاقتا سەرىكتەسكە 1 جىل ەمەس, 3-4 جىلدىق مەرزىم بەرۋ قاجەت دەپ سانايمىن. كەز كەلگەن بيزنەس ۇزاق مەرزىمدى ستراتەگيا قۇرۋعا مۇمكىندىك الۋى ءتيىس. قۇرمەتتى دەپۋتاتتار, قولداۋلارىڭىزدى سۇرايمىن», دەدى ول وتىرىس بارىسىندا.
ناتيجەسىندە كەلىسىمشارتتى ۇزارتۋعا 29 دەپۋتات داۋىس بەرىپ, بىرەۋى قارسى بولدى. شەشىم «سەرگەك» جۇيەسىنىڭ پايداسىنا قابىلداندى.
