فوتو: «اەس ءشۇلبى گەس» اق فوتومۇراعات
ءشۇلبى سەس سەمەي قالاسىنان 70 شاقىرىم جەردە ورنالاسقان جانە ەرتىس كاسكادىنداعى سۋ ەلەكتر ستانتسيالارىنىڭ ءۇشىنشى بۋىنى سانالادى. ورناتىلعان قۋاتى — 702 مۆت. بۇل كورسەتكىش بويىنشا ول قازاقستانداعى ەڭ ءىرى سۋ ەلەكتر ستانتسياسى بولىپ قالا بەرەدى. الايدا باستى قۇندىلىق — ستانتسيانىڭ ۇزدىكسىز جۇمىسىن قامتاماسىز ەتىپ وتىرعان ادامدار.
ستانتسيا قۇرىلىسى 1976 جىلى باستالىپ, 1987 جىلى العاشقى گيدرواگرەگات ىسكە قوسىلدى. وسى ۋاقىتتان باستاپ ءشۇلبى سەس ەنەرگەتيكالىق ينفراقۇرىلىم نىسانىمەن قاتار, كاسىبي اۋلەتتەر قالىپتاسقان, تاجىريبە مەن ءبىلىم ساباقتاستىعى ورنىققان ەڭبەك ورداسىنا اينالدى. قازىرگى تاڭدا مۇندا 204 قىزمەتكەر ەڭبەك ەتەدى.
ۇجىمنىڭ نەگىزىن گيدرواگرەگات ماشينيستەرى, ەلەكترمونتەرلەر, جابدىق جوندەۋ سلەسارلارى, ينجەنەرلەر, ەڭبەك قاۋىپسىزدىگى جانە اۆتوكولىك قىزمەتىنىڭ ماماندارى قۇرايدى. ولار كۇردەلى جابدىقتاردىڭ سەنىمدى جۇمىسىن قامتاماسىز ەتىپ, تەحنيكالىق پارامەترلەردى باقىلايدى, جوسپارلى جانە اپاتتىق جوندەۋ جۇمىستارىن جۇرگىزەدى, قاۋىپسىزدىك پەن ەكولوگيالىق تالاپتاردىڭ ساقتالۋىنا جاۋاپ بەرەدى.
ءشۇلبى سەس-تەگى جۇمىسشى ماماندىق — تەك مىندەت اتقارۋ ەمەس, جوعارى جاۋاپكەرشىلىك پەن تۇراقتى كاسىبي دامۋدى تالاپ ەتەتىن ەڭبەك. قىزمەتكەرلەر جۇيەلى تۇردە وقۋدان ءوتىپ, نۇسقامالار مەن اتتەستاتسيادان وتەدى, جاڭا تەحنولوگيالاردى مەڭگەرەدى. وندىرىستە قاۋىپسىزدىك مادەنيەتىنە ەرەكشە ءمان بەرىلگەن: زاماناۋي ەڭبەكتى قورعاۋ جۇيەلەرى ەنگىزىلىپ, نولدىك جاراقاتتانۋعا باعىتتالعان Vision Zero تۇجىرىمداماسى جۇزەگە اسىرىلۋدا. سونىمەن قاتار جاساندى ينتەللەكت ەلەمەنتتەرى بار بەينەباقىلاۋ جۇيەلەرى مەن ەلەكتروندى مەديتسينالىق تەكسەرۋلەر قولدانىلۋدا.
بۇگىندە ءشۇلبى سۋ ەلەكتر ستانتسياسى دامۋىن جالعاستىرىپ, جابدىقتاردى جاڭعىرتىپ, ەكولوگيالىق جانە تسيفرلىق شەشىمدەردى ەنگىزۋدە. بۇل رەتتە ەڭ باستى قاعيدا — جۇمىسشى ماماندىققا جانە كۇن سايىن ستانتسيانىڭ تۇراقتى جۇمىسىن قامتاماسىز ەتەتىن ادامدارعا دەگەن قۇرمەت ساقتالادى.
جۇمىسشى ماماندىقتار جىلى تاعى ءبىر مارتە ەسكە سالادى: سەنىمدى ەنەرگەتيكا ەسەپ پەن مەگاۆاتتتان ەمەس, ءوز ىسىنە ادال ادامداردان باستالادى. ءدال وسىنداي مامانداردىڭ ەڭبەگى ءشۇلبى سەس-ءتىڭ جانە ەل ەنەرگەتيكاسىنىڭ تىرەگى بولىپ وتىر.
