ىسكەر ايەلدەر ىشكى تۇراقتىلىق جاعىندا

قۇرىلعانىنا بيىل 20 جىل بولعان قازاقستاننىڭ ىسكەر ايەلدەرى قاۋىمداستىعى ءباسپاسوز ءماسليحاتىن وتكىزدى. قىز قۇرتقا مەن نازىمنىڭ, ءنۇريلا مەن ۇلپاننىڭ سايىن دالادا سار جەلىسكە سالىپ, شىرەي تارتىپ ساداعىن, اتويلاپ ۇران سالعاندا تىك كوتەرگەن الاشىن ەسىل ەرلەردىڭ ەڭسەسىن بيىكتەتۋدە ءۇر قىزىنداي ءۇرىپ العان كوركىمەن, سالقىندا  وسكەن ولەڭدەي مايدا جىبەك جانىمەن, ۇلتىنىڭ ەرتەڭى ءۇشىن  ءارىن دە, اقىلىن دا, بارىن دا سالعان اپالاردىڭ جالعاسى, بۇگىنگى عاسىرداعى ەركىن تىنىس­تى قازاق قىزى. قالىبىندا ەرىن سىيلاپ, ەرتەڭىن ويلاپ, بولاشاق ۇرپاعىنىڭ قامىن جەگەن سول انالار مەن اپالارىنىڭ جالعاسى – قازاقستاننىڭ ىسكەر ايەلدەرى قاۋىمداستىعى ەلدى ءبىر جاعادان باس, ءبىر جەڭنەن قول شىعارۋعا شاقىردى. بىزدەر, ايەلدەر ءۇشىن وتباسى­مىزدىڭ اماندىعى, بەرەكەلى تىرشىلىگى, ەلىمىزدىڭ تىنىشتىعى مەن وركەندەپ دامۋى – ەڭ ماڭىزدى ماسەلە. تاۋەلسىزدىكتىڭ تاڭى اتقان العاشقى قيىن كەزەڭدەردە بەلىمىزدى تاس ءتۇيىن ەتىپ بۋىپ, ساۋداعا شىعىپ, تاۋەكەل ەتكەنىمىز دە سوندىقتان. ەلباسى بىردە ايەلدەر سول كەز­دەرى وتباسىلارىن عانا ەمەس, مەملەكەتتى دە ساقتاپ قالدى دەگەنى بار ەدى, ەندەشە بىزدەر, ىسكەر ايەلدەر قازىرگىدەي الەمدى داعدارىس جەلى تۇرىپ, شايقالتىپ جاتقان تۇستا دا قاراپ وتىرا المايمىز. ءوزىمىزدىڭ ازاماتتىق پوزيتسيالارىمىزدى ايقىنداپ, قحا كوتەرگەن باستامانى قول­دايمىز, دەگەن قازاقستاننىڭ ىسكەر ايەلدەرى قاۋىمداستىعىنىڭ پرەزيدەنتتىك سايلاۋدى راۋشان سارسەمباەۆا پرەزيدەنت سايلاۋىن وتكىزۋ يدەياسىنىڭ  دەر كەزىندە كوتەرىلىپ وتىرعانىن ايتتى. «سايلاۋ ءبىزدىڭ قوعامىمىزدى تۇتاستىرا تۇسەدى, جاس ءۇشىن دە,  جاسامىس ءۇشىن دە, اقساقالدار مەن اقجاۋلىقتى اجەلەر ءۇشىن دە ىرىسى مول بەرەكەلى تىرشىلىكتى, تىنىشتىقتى ساقتاپ, ەلىمىزدى العا قاراي وركەندەتۋ ماڭىزدى. ويتكەنى, ول – بولاشاق, ەرتەڭگى جارقىن كۇندەرىمىزدىڭ كەپىلى. ال ايەلدەر وسىنداي ماڭىزدى ىستەن تىس قالمايدى», دەدى. «قازىرگى ۋاقىتتا ءىستىڭ باسىندا, ۇلكەن ۇجىمنىڭ تىزگىنىن ۇستاپ, باسشىلىق اتقارىپ جۇرگەنىمىزبەن, ءبىزدىڭ جۇرەگىمىز – ايەل جۇرەگى. ەلدە بولىپ جاتقان ءاربىر جاقسى-جاماندى وقيعالاردىڭ بارلىعىن جۇرەك ارقىلى وتكىزۋ – ايەلدەردىڭ جاراتىلىس بەرگەن سىيى. ءبىزدىڭ ويىمىزشا, پرەزيدەنتتىك سايلاۋدى بيىل وتكىزۋ جايىندا باستاما كوتەرىلۋى دە وسىنداي ءىس. جانە وتە ءبىر ۋاقتىلى كوتەرىلگەن يدەيا. ول ءبارىمىزدى بىرىكتىرىپ, بارلىعىمىزدى ءبىر ساناعا جيناپ, جۇمىلدىرىپ, ەلدىڭ جارقىن ەرتەڭىنە باستايدى, سايلاۋ ءوزىنىڭ اسىل ميسسياسىن ورىندايدى دەپ سەنەمىن», دەدى «اتلانت ينجينيرينگ» جسس باس ديرەكتورى گۇلزادا ءومىرباي. ال «اۆرورا NS» جسس ديرەكتورى جانە «تيفليس» مەيرامحاناسىنىڭ قوجايىنى نادەجدا سەيىتوۆا «ايەل – وتباسىنىڭ ۇيىتقىسى. اسىرەسە, كۇردەلى كەزەڭدە ايەل­دىڭ وسىنداي قاسيەتتەرى اي­قىن كورىنەدى. سوندىقتان دا ايەل­دەر قاۋىمى وتانىمىزدا كوتە­رىلىپ جاتقان سايلاۋعا قاتىستى ۇسىنىستاردى قولداپ, ءوز ۇندەرىن جەتكىزۋدى پارىزدارى سانايدى», دەپ ىسكەر ايەلدەردىڭ كوشباسشىلارى جينالعان جۋرناليستەردەن وسى پىكىرلەرىن حالىققا جەتكىزۋدى سۇرادى. ءيا, ەجەلدەن قازاق قىزىن ەركەلەتىپ, بەتىن وزگەلەردەي تۇم­شالاپ بۇركەمەلەمەي, رەتتى جەرىندە ويىنا دا تۇساۋ سالماي ەركىن وسىرگەن. بالكىم, عاسىرلاردىڭ ۇزىن-سونار, سالقار كوشىندە كەيدە باسەڭ, كەيدە اسقاقتاعان وسى رۋح تاۋەلسىز ەلدەگى قىزدارىمىزدىڭ بويىنان تەبىندەپ سىرتقا شىعىپ تۇرعانداي كورىنەدى. انار تولەۋحانقىزى, «ەگەمەن قازاقستان». استانا.