پرەزيدەنتتىڭ تاپسىرماسىمەن قازاقستاندا سالىقتىق امنيستيا جاريالانادى. امنيستيا 2026 جىلعا دەيىن قالىپتاسقان سالىق بەرەشەگىنە قاتىستى قولدانىلادى جانە ميكرو, شاعىن بيزنەس سۋبەكتىلەرىنىڭ ءوسىمپۇلدارى مەن ايىپپۇلدارىن تولىق ەسەپتەن شىعارۋدى قاراستىرادى. سونداي-اق جىل باسىنداعى اكىمشىلىك قۇقىق بۇزۋشىلىق تۋرالى كودەكس اياسىندا تىركەلگەن ايىپپۇلدار دا كەشىرىلەدى.
امنيستيا مەرزىمى شەكتەۋلى. كاسىپكەرلەر 2026 جىلدىڭ 1 قاڭتارى مەن 31 ناۋرىزى ارالىعىندا نەگىزگى قارىز سوماسىن تولىق وتەگەن جاعدايدا, ايىپپۇلدار مەن ءوسىمپۇلدار اۆتوماتتى تۇردە ەسەپتەن شىعارىلادى. قوسىمشا ءوتىنىم بەرۋدىڭ قاجەتى جوق, ءراسىم ەلەكتروندى جۇيە ارقىلى جۇرگىزىلەدى.
قارجى ۆيتسە-ءمينيسترى اسەت تۇرىسوۆ بۇل قادام بيزنەستى جاڭا سالىقتىق كەزەڭگە قارىزسىز باستاۋعا جول اشاتىنىن ايتتى. ونىڭ سوزىنشە, امنيستيا قارجىلىق ءتارتىپتى كۇشەيتىپ, ەسەپ جۇرگىزۋدى جەڭىلدەتەدى جانە ەل كولەمىندەگى مىڭداعان ميكرو ءارى شاعىن كاسىپكەرگە تىنىس بەرەدى.
سونىمەن قاتار, نارىقتىڭ جاڭا تالاپتارعا بەيىمدەلۋىنە ۋاقىت قاجەت ەكەنى ەسكەرىلدى. ۇلتتىق تاۋارلار كاتالوگىنداعى كودتاردىڭ بولماۋىنا بايلانىستى سىناق كەزەڭىندە ەشقانداي بۇعاتتاۋ نەمەسە سانكتسيا قولدانىلمايدى.
ايتا كەتەيىك, جەلتوقسان ايىنىڭ باسىندا مەملەكەت باسشىسى ۇكىمەتكە جاڭا سالىق كودەكسىنىڭ جەكەلەگەن نورمالارىن ىسكە اسىرۋعا قاتىستى بيزنەس وكىلدەرىنىڭ وتىنىشتەرىن مۇقيات تالداۋدى تاپسىرعان ەدى. ۇكىمەت پەن «اتامەكەن» پالاتاسى جىل سوڭىنا دەيىن جاڭا تالاپتاردى كاسىپكەرلىككە سالماق سالماي ەنگىزۋدى قامتاماسىز ەتۋى ءتيىس.
ساراپشىلاردىڭ پىكىرىنشە, امنيستيا شارتتارىن ۋاقىتىلى ورىنداۋ كاسىپكەرلەرگە جاڭا جىلدى قارىزسىز باستاۋعا ناقتى مۇمكىندىك بەرەدى.
