قاراعاندى وبلىسىندا جول قوزعالىسى مادەنيەتىن قالىپتاستىرۋ جانە قاۋىپسىزدىكتى ارتتىرۋ ماقساتىندا «ۇلگىلى جۇرگىزۋشى» ناۋقانى ۇيىمداستىرىلدى. ءىس-شارا اياسىندا پاترۋلدىك پوليتسيا قىزمەتكەرلەرى قوعامدىق ءتارتىپتى ساقتاپ, جولداعى «جۇگەنسىز» جۇرگىزۋشىلەرگە ۇلگى كورسەتىپ جۇرگەن ازاماتتاردى توقتاتىپ, العىس ءبىلدىرىپ, سىيلىق تابىستادى.
وسىنداي قۇرمەتكە يە بولعانداردىڭ ءبىرى – وتىز جىل بويى كولىك تىزگىندەپ ءجۇرىپ, بىردە-ءبىر رەت جول ەرەجەسىن بۇزباعان سۆەتلانا شۆاچكينا. ول وسى ۋاقىت ىشىندە ايىپپۇل ارقالاماعان, بىردە-ءبىر جول-كولىك وقيعاسىنا قاتىسپاي, ەرەجە دە بۇزباعان. پوليتسيا قىزمەتكەرلەرى مۇنداي كورسەتكىشتىڭ سيرەك ەكەنىن اتاپ ءوتتى.
سۆەتلانا شۆاچكينا – تەك تاجىريبەلى جۇرگىزۋشى عانا ەمەس, قوعام بەلسەندىسى ءارى ۇستاز. بۇگىندە ول قاراعاندى قالاسىنداعى №95 مەكتەپ گيمنازياسىندا جاس ينسپەكتورلار ۇيىرمەسىن باسقارىپ, وقۋشىلاردىڭ جول قاۋىپسىزدىگىنە قاتىستى ءبىلىمىن ارتتىرۋمەن اينالىسادى.
«قازىر قالا جولدارىندا كولىك كوپ, قاربالاس تا از ەمەس. وسىنداي جاعدايدا ەڭ باستىسى – سابىر مەن جاۋاپكەرشىلىك. جولداعى مادەنيەت ادامنىڭ ىشكى مادەنيەتىن كورسەتەدى. سوندىقتان دا بالالارعا قاۋىپسىزدىك نەگىزدەرىن مەكتەپ قابىرعاسىنان باستاپ ءتۇسىندىرۋ وتە ماڭىزدى», دەيدى ۇلگىلى جۇرگىزۋشى سۆەتلانا.
ونىڭ ايتۋىنشا, جاس ينسپەكتورلار ۇيىرمەسىنە قاتىساتىن بالالار جول بەلگىلەرىن تانىپ-ءبىلىپ قانا قويماي, ارنايى ءىس-شارالارعا قاتىسىپ, پوليتسيا قىزمەتكەرلەرىمەن بىرلەسىپ, جولدا ءجۇرۋ ەرەجەلەرىن ناسيحاتتاۋعا اتسالىسادى. بۇل – بولاشاقتا سانالى, ءتارتىپتى جۇرگىزۋشىلەردىڭ قالىپتاسۋىنا ىقپال ەتەتىن باستاما.
قاراعاندى وبلىستىق پوليتسيا دەپارتامەنتىنىڭ دەرەگىنشە, اكتسيا باستالعالى بەرى تەك وبلىس ورتالىعىندا 100-گە جۋىق جۇرگىزۋشىگە ءدال وسىنداي قۇرمەت كورسەتىلگەن. جول ساقشىلارى جۇرگىزۋشىلەردى توقتاتىپ, ولاردىڭ جول ەرەجەسىن ساقتاۋ دەڭگەيىن تەكسەرىپ قانا قويماي, قاۋىپسىزدىك جونىندە كەڭەس بەرىپ, العىسحاتتار تابىستاۋدا.
ىزگى جوبا «قاۋىپسىز جول» جەدەل-پروفيلاكتيكالىق ءىس-شاراسى اياسىندا ۇيىمداستىرىلعان. ونىڭ باستى مىندەتى – جول-كولىك وقيعالارىنىڭ الدىن الۋ, قالا كوشەلەرىندەگى ءتارتىپتى نىعايتۋ جانە جۇرگىزۋشىلەردىڭ نازارىن جول قاۋىپسىزدىگىنىڭ ماڭىزىنا اۋدارۋ.
«ەرەجەنى قاتاڭ ساقتاڭىزدار! جىلدامدىقتى اسىرۋ – ۇلكەن قاتەر. قارسى باعىتقا شىعۋ – كوپتەگەن قايعىلى جاعدايدىڭ سەبەبى. جولدا وزىڭمەن بىرگە وتىرعان جولاۋشىلاردىڭ عانا ەمەس, بەيتانىس ادامداردىڭ ءومىرى دە سەنىڭ شەشىمىڭە بايلانىستى», دەدى ءتارتىپتى جۇرگىزۋشى.
پاترۋلدىك پوليتسيا باتالونى كومانديرىنىڭ ورىنباسارى سۇڭعات ابىلقاس مۇنداي ءىس-شارالار جۇرگىزۋشىلەردىڭ ءتارتىپ ساقتاۋعا دەگەن ىنتاسىن ارتتىرىپ قانا قويماي, قالاداعى جالپى جول مادەنيەتىنىڭ جاقسارۋىنا ىقپال ەتەتىنىن اتاپ ءوتتى.
ستاتيستيكاعا سۇيەنسەك, جىل باسىنان بەرى ءوڭىر جولدارىندا ماس كۇيىندە كولىك باسقارۋ جانە مەديتسينالىق كۋالاندىرۋدان وتۋدەن باس تارتۋدىڭ 220 دەرەگى تىركەلگەن. سونداي-اق 73 جۇرگىزۋشى جالعان مەملەكەتتىك ءنومىر قولدانعان, 53 ادام كولىك جۇرگىزۋ قۇقىعىنان ايىرىلسا دا رولگە وتىرعان. بۇعان قوسا زاڭسىز جولاۋشى تاسىمالداۋدىڭ 53 فاكتىسى, جولدىڭ قارسى باعىتىنا شىعۋدىڭ 133 دەرەگى انىقتالعان.
جۇرگىزۋشى قاۋىم مۇنداي يگى باستاما كوپشىلىككە وي سالىپ, اسىرەسە جاس بۋىننىڭ جول قوزعالىسىنا دەگەن كوزقاراسىن جاقسارتاتىنىنا سەنەدى. اكتسيا جىل سوڭىنا دەيىن جالعاسادى. پوليتسيا اركەز حالىقتى جولدا ساق بولۋعا شاقىرادى. جول قاۋىپسىزدىگى – كەزدەيسوقتىققا جول بەرمەيتىن اسا جاۋاپتى سالا, ال سۆەتلانا شۆاچكينا سياقتى جۇرگىزۋشىلەر – شىن مانىسىندە دە قاۋىپسىز جولدىڭ كەپىلى.
قاراعاندى وبلىسى
