ابىلاي الاڭىنان –  ۇلىتاۋعا

بيىلعى مەرەكەلى جىلى كوكشە جۇرت­­شىلىعى قوعامدىق ءومىردىڭ بارلىق سالاسىندا يگى باستامالارىمەن ەل نازارىن اۋدارۋدا. سونىڭ ءبىرى رەتىندە سپورتشى مۇعالىمدەر قاليبەك ءابىلوۆ پەن بالعاباي قۇلپەيىسوۆتىڭ قازاق حاندىعىنىڭ 550 جىلدىعى قۇرمەتىنە 550 شاقىرىمدىق ساپار باستاۋىن ايتار ەدىك. مارافونشى ازاماتتار تالىمدىك شارا اياسىندا بۋرابايداعى ابى­لاي حان الاڭىنان قاراعاندى وبلى­سىنداعى « ۇلىتاۋ» ۇلتتىق تاري­حي-مادەني جانە تابيعي قورىق مۇرا­جايىنا دەيىن جاياۋ ءجۇرىپ وتپەك. تاۋەلسىز قازاقستان رەسپۋبلي­كاسىنىڭ جانە «نۇر وتان» پارتيا­سىنىڭ تۋلارىن اسقاق كوتەرگەن جىگىتتەردى اقمولا وبلىسىنىڭ تانىمال تۇلعالارى مەن «جاس وتان» ­جاستار قاناتىنىڭ بەلسەندىلەرى, قالىڭ جۇرتشىلىق ايرىقشا سالتاناتپەن شىعارىپ سالدى. – «نۇر وتان» پارتياسى ءوز ەلىنىڭ تاريحىن دارىپتەۋمەن قاتار, سالاماتتى ءومىر سالتىن قالىپتاستىرۋدى ناسيحاتتاپ جۇرگەن ازاماتتاردى ارقاشان قولداپ, دەمەۋشىلىك كومەك كورسەتىپ وتىرادى, – دەدى پارتيانىڭ اقمولا فيليالى «جاس وتان» قاناتىنىڭ جەتەكشىسى جانارگۇل ءجۇنىسوۆا. – مۇنداي تانىمدىق شارالار جاستار بويىندا پاتريوتتىق رۋحتى قالىپتاستىرىپ, تاريحي وقي­عانىڭ ماڭىزىن قالىڭداتا تۇسەدى. مارافونشىلار ساپار بارىسىندا قازاق حاندىعىنىڭ قالىپتاسۋىندا وزىندىك تاريحي ورنى بار ەلدى مەكەندەردە بولىپ, تۇرعىندارمەن كەزدەسۋلەر وتكىزەدى. ولار الدىمەن اقمولا وبلىسىنىڭ بۇلاندى, شورتاندى, تسەلينوگراد, قورعالجىن اۋداندارىنداعى مادەني-كوپشىلىك شارالارعا قاتىسىپ, استانا, شۇبار­كول, جەزقازعان, ساتباەۆ قالالا­رىنىڭ تۇرعىندارىمەن قاۋىشادى. ۇلىتاۋعا جاسالعان ۇلى ساپار ءساتتى اياقتالاتىنىنا سەنىم مول. ءويت­كەنى, كوكشەلىك قوس جەلاياق بۇ­عان دەيىن قۇرمانعازى, اباي, بوگەن­باي باتىر مەرەيتويلارىنا, تۇركى­ستاننىڭ 1500 جىلدىعىنا, قازاق­ستان تاۋەلسىزدىگىنىڭ 10 جىل­دىعىنا جانە ابىلاي حاننىڭ 300 جىلدىعىنا ارنالعان مارافوندىق مەرەيلى مەجەگە ابىرويمەن جەتكەنى ەل ەسىندە. باقبەرگەن امالبەك, «ەگەمەن قازاقستان». اقمولا وبلىسى.