شاراينا
نيگەريادا بەس ادامدى مەرت ەتىپ, جيىرماعا جۋىق تۇرعىندى جاراقاتتاعان تەررورلىق ارەكەتتى جەتى جاستاعى قىز بالا جاساعان. قايعىلى جاعداي پوتيسكۋم بازارىندا بولىپتى.
«فرانس-پرەسس» اقپارات اگەنتتىگىنىڭ حابارلاۋىنشا, بازارعا كىرەر كەزدە كۇزەتشىلەر قىزدان تەكسەرۋدەن ءوتۋدى سۇراعان. سول ساتتە ول جارىلعىش زاتتى ىسكە قوسقان. بۇل تەررورلىق ارەكەتتى ەشقانداي ۇيىم ءوز جاۋاپكەرشىلىگىنە ءالى العان جوق. دەگەنمەن, نيگەريا بيلىگى ادام ولىمىنە سوقتىرعان اتالعان ارەكەتكە «بوكا حارام» راديكالدى توبىنىڭ قاتىسى بار بولۋى مۇمكىن دەگەن بولجام جاساپ وتىر. وسىدان ءبىر اپتاداي ۋاقىت بۇرىن وسى ەلدە ءبىر ءجاسوسپىرىم قىز اۆتوبۋستا جارىلىس جاساپ, سونىڭ سالدارىنان 16 ادام قازا تاپقانىن ايتا كەتەيىك.
پاروم اپاتىنىڭ سالدارى اۋىر
بانگلادەش اۋماعىندا جولاۋشىلار پارومىنىڭ اپاتقا ۇشىراۋى سالدارىنان 60-تان استام ادام وپات بولدى. وقيعا پادما وزەنىندە ورىن العان.
اقپارات قۇرالدارىنىڭ جازۋىنا قاراعاندا, پاروم وزەندە قارسى كەلە اتقان تراۋلەرمەن سوقتىعىپ, اۋدارىلىپ كەتىپتى. وندا 150-دەن استام جولاۋشى بولعان ەكەن. كوز جۇمعانداردىڭ كوپشىلىگى ايەلدەر مەن بالالار سياقتى. ەل بيلىگى بولعان جاعدايدى تەكسەرۋدى بىردەن قولعا العان. پاروممەن سوقتىعىسقان تراۋلەردىڭ كاپيتانى مەن ەكى كوماندا مۇشەسى تۇتقىندالدى. اتاپ وتەيىك, بۇل ەلدە وسىنداي اپاتتار ءجيى ورىن الادى. سەبەبى, بانگلادەش اۋماعىن ەكى جۇزگە جۋىق وزەن باسىپ وتەدى.
سودىرلار 10 مىڭ كىتاپتى ورتەپ جىبەردى
«يسلام مەملەكەتى» توپتارىنىڭ سودىرلارى يراكتىڭ موسۋل قالاسىنداعى ورتالىق كىتاپحانانى جارىپ جىبەردى. سونىڭ كەسىرىنەن 10 مىڭعا جۋىق كىتاپ جانىپ كەتكەن.
«ەلاف» ينتەرنەت-پورتالىنىڭ حابارلاۋىنشا, جارىلىستان ءۇش قاباتتان تۇراتىن كىتاپحانا عيماراتى وتقا ورانعان. ال كىتاپحانا ديرەكتورىنىڭ ايتۋىنا قاراعاندا, يسلامشىلار كىتاپحانا اۋلاسىندا يراك ەلىنىڭ مادەني مۇرالارى بولىپ تابىلاتىن كىتاپتار مەن كونە قولجازبالاردى ءۇيىپ قويىپ ورتەپتى. جويىلعان باسىلىمدار ىشىندە مادەنيەت, تاريح پەن فيلوسوفياعا قاتىستى وتە سيرەك كەزدەسەتىن كىتاپتار دا بار ەكەن. انبار پروۆينتسياسى كەڭەسىنىڭ مۇشەسى ادال ءال-فاحداۋي سوڭعى اپتالاردا راديكالدار بىرنەشە كىتاپحانانى تالقانداپ, ولاردا ساقتالعان 100 مىڭنان استام كىتاپتى جويعانىن اتادى.
قىسقا قايىرىپ ايتقاندا:
*نيجني نوۆگورود (رەسەي) قالاسىنىڭ تۇرعىنى, 28 جاستاعى يرينا شۋتوۆا ءتورت ءسابيدى امان-ەسەن دۇنيەگە اكەلدى. سابيلەردىڭ بىرەۋى ۇل, قالعانى قىز بالالار. نارەستەلەردىڭ ارقايسىسىنىڭ سالماعى 1,5 كيلوعا جۋىق ەكەن.
*كاسىپقوي بوكسشىلار فلويد مەيۆەزەر مەن مەنني پاكياونىڭ جەكپە-جەگىنەن تۇسەتىن تابىس 400 ميلليون اقش دوللارىنا جەتۋى مۇمكىن. بۇل اقشانىڭ جارتىسى ەكى بوكسشىعا بەرىلەدى. بوكس تاريحىندا ءالى بىردە-ءبىر بوكسشى وسىنداي كولەمدە سىياقى الىپ كورمەپتى.
*وڭتۇستىك سۋداندا مەكتەپتە ەمتيحان تاپسىرىپ جاتقان كەزدە سودىرلار 89 وقۋشىنى ۇرلاپ كەتكەن. ولاردىڭ ەڭ كىشىسىنىڭ جاسى 13-تە سياقتى. وقيعانى قاندايدا ءبىر ۇيىم مويىندارىنا العان جوق.
*گرۋزيا پرەزيدەنتى گەورگي مارگۆەلاشۆيلي ىزدەۋدە جۇرگەن ەلدىڭ ەكس-پرەزيدەنتى ميحايل سااكاشۆيليدىڭ ۋكراينا باسشىسى پەتر پوروشەنكوعا كەڭەسشى بولىپ تاعايىندالۋى كيەۆ پەن تبيليسي اراسىنداعى قاتىناستارعا اسەر ەتپەيتىنىن مالىمدەدى.
شاح كەسەنەسى قاۋىپسىز جەردە
تۇرىك رەسپۋبليكاسى ءوزىنىڭ ەلى اۋماعىنان تىسقارى جاتقان, ستراتەگيالىق نىسانى رەتىندە سانالاتىن سيرياداعى سۇلەيمەن شاح كەسەنەسىن قاۋىپسىز جەرگە كوشىردى.
كوشىرۋ وپەراتسياسى كەشە كەشكىسىن جۇزەگە اسىرىلدى. وعان تۇركيا قارۋلى كۇشتەرىنىڭ 39 تانكىسى مەن 100-دەن استام اسكەري كولىگى, سونداي-اق, 750 اسكەريى قاتىسقان. سونىڭ ناتيجەسىندە كەسەنەدەگى مەملەكەتتىك تۋلار مەن بەلگىلەر جانە ءدىني جورالعىلاردى ساقتاي وتىرىپ, كەسەنەدەگى زيراتتان ءۇش تابىت قازىلىپ الىندى. بۇدان بولەك, سۇلەيمەن شاح كەسەنەسىن سەگىز ايدان بەرى كۇزەتىپ كەلگەن كۇرەڭ بەرەتتى 44 سارباز امان-ەسەن ەلىنە ورالدى. ال قازىر كەسەنە سيريانىڭ ەشمەسي اتالاتىن ەلدى مەكەنىنە جەتكىزىلدى. 1921 جىلدىڭ 20 قازانىندا تۇركيا مەن فرانتسيا ۇكىمەتتەرىنىڭ كەلىسىمىمەن وسمان يمپەرياسىنىڭ نەگىزىن قالاۋشى وسمان گازيدىڭ اتاسى سۇلەيمەن شاح كەسەنەسى جانە وعان تيەسىلى جەر اۋماعى تولىعىمەن تۇركيانىڭ يەلىگى دەپ تانىلعان بولاتىن. سوندىقتان ەل اۋماعىنان تىس جاتقان كەسەنەنى تۇركيانىڭ قارۋلى كۇشتەرى وسى كەزگە دەيىن سالتاناتتى قاراۋىل قويىپ, كۇزەتىپ كەلگەن ەدى.
كەنشىلەردىڭ بارلىعى قۇتقارىلدى
«رەيتەر» اقپارات اگەنتتىگى بۇدان ەكى كۇن بۇرىن التىن ءوندىرۋشى «Harmony Gold» كومپانياسىنىڭ شاحتادا ءورت شىعۋىنا بايلانىستى جەر استىندا قالعان 486 كەنشىنىڭ 287-ءسى قۇتقارىلعانىن حابارلاعان ەدى.
كەشەگى كۇنگى دەرەك بويىنشا, جەر استىندا قالعان كەنشىلەردىڭ بارلىعىن وڭتۇستىكافريكالىق قۇتقارۋشىلار جەر ۇستىنە الىپ شىققان. الدىن الا جاسالعان مالىمەتتەرگە قاراعاندا, كەنشىلەردىڭ ەشقايسىسى جاراقاتتانباعان. ولاردىڭ بارلىعى مەديتسينالىق تەكسەرۋدەن وتەتىن بولادى. قۇتقارۋ وپەراتسياسىنا جەتى قۇتقارۋ بريگاداسى قاتىسقان. قازىرگى كەزدە شاحتاداعى ءورت تولىعىمەن ءسوندىرىلدى. يوحاننەسبۋرگ قالاسىنان 70 شاقىرىمداي جەردەگى شاحتادان ءورت جەكسەنبى كۇنى تەحنيكالىق جۇمىستار بارىسىندا شىققان بولاتىن. ال ءورتتىڭ سەبەپ-سالدارى قازىرگە انىقتالعان جوق.
ارۋناچال-پرادەش كىمنىڭ اۋماعى؟
قىتاي ۇكىمەتى ءۇندىستان پرەمەر-ءمينيسترى نارەندرا ءموديدىڭ داۋلى ايماق سانالاتىن ارۋناچال-پرادەش شتاتىنا بارۋىنا بايلانىستى نارازىلىق نوتاسىن جولدادى.
دەرەك كوزدەرىنە قاراعاندا, رەسمي بەيجىڭ بۇل ايماقتى تيبەتكە تيەسىلى دەپ سانايدى. ال قىتايلىق باق-تاردىڭ حابارلاۋىنشا, قحر سىرتقى ىستەر مينيسترلىگى وسىدان بىرەر كۇن بۇرىن ءۇندىستاننىڭ قىتايداعى ەلشىسىن شاقىرىپ, ەگەر ءۇندىستاننىڭ ۇكىمەت باسشىسى اتالعان ايماققا باراتىن بولسا, قىتايدىڭ شەكارالىق تۇتاستىعىن بۇزعان بولىپ ەسەپتەلەتىندىگىن ەسكەرتىپتى. الايدا, نارەندرا مودي بۇعان قاراماي, وتكەن جۇما كۇنى ارۋناچال-پرادەش اۋماعىنا شتات مارتەبەسى بەرىلگەنىنىڭ 28 جىل تولۋىنا وراي ۇيىمداستىرىلعان شارالارعا قاتىسۋ ءۇشىن بارعان. وقىرماندار ەسىنە سالا كەتەيىك, وسى داۋلى ايماققا بايلانىستى 1962 جىلى قىتاي مەن ءۇندىستان اراسىندا قارۋلى قاقتىعىس بولعان ەدى.
ينتەرنەت ماتەريالدارى نەگىزىندە ازىرلەندى.
