مەملەكەت باسشىسىنىڭ اباي وبلىسىن قۇرۋ تۋرالى شەشىمى وڭىرگە ۇلكەن مۇمكىندىك بەرگەنى راس. بۇگىندە وڭىردەگى كوپتەگەن ءوندىرىس ورىندارى قايتا جاندانا باستادى. جاڭادان ىسكە قوسىلعان وندىرىستىك جەلى – ەۋرازيالىق ەكونوميكالىق وداق پەن ورتالىق ازيا كەڭىستىگىندە حالىقارالىق «Tetra Pak» ستاندارتتارى بويىنشا سەرتيفيكاتتالعان قاپتاما ماتەريالدارىن شىعاراتىن جالعىز كەشەن. جوبانىڭ جالپى ينۆەستيتسيالىق قۇنى – 6 ملرد تەڭگە.
جاڭا جەلى 20-عا جۋىق تۇراقتى جۇمىس ورنىن اشۋعا مۇمكىندىك بەرمەك. تسەحتىڭ جوبالىق قۋاتى ايىنا 25 ملن دانا قاپتامانى قۇرايدى. بيىل كومپانيا وندىرىستىك قۋاتتاردى جاڭارتۋدا اۋقىمدى مودەرنيزاتسيانى اياقتاعان. ەۋروپالىق ستاندارتتارعا سايكەس زاماناۋي جابدىقتار ساتىپ الىنىپ, ورناتىلىپتى. بۇل ءوندىرىس كولەمىن شامامەن ءتورت ەسە ارتتىرۋعا جانە تاپسىرىستاردى جەدەل ورىنداۋعا بولادى دەگەن ءسوز.
كاسىپورىن ورتالىق ازيادا كوپتەگەن قاپتاما ماتەريالدارى تۇرلەرىن وندىرەدى جانە ەل اۋماعىنداعى سۇرانىستى تولىق قامتاماسىز ەتەدى. «كازپوليگراف» جشس وندىرەتىن كارتون قاپتاما ونىمدەرىنىڭ 30 پايىزى رەسەيگە, قىرعىزستانعا, وزبەكستانعا جانە باسقا دا نارىقتارعا ەكسپورتتالادى. كاسىپورىننىڭ وندىرىستىك قۋاتى جىلىنا 30 مىڭ توننا قاعاز جانە كارتون قاپتاماسىن, 2 مىڭ توننا جابىندى قاعازدى, 1,5 مىڭ توننا پوليمەرلىك پلەنكادان جاسالعان قاپتاما بۇيىمدارىن جانە 1 مىڭ توننا باسقا قاعاز بەن كارتون تۇرلەرىنەن وندىرىلەتىن سىعىمدالعان ونىمدەردى جاساۋعا قاۋقارلى. وندىرىستە 700-گە جۋىق ادام ەڭبەك ەتەدى.
وندىرىستىك جەلىنىڭ اشىلۋ سالتاناتىندا ءسوز سويلەگەن ايماق باسشىسى بەرىك ءۋالي جاڭا زاۋىت ءوڭىردىڭ يندۋستريالىق دامۋىنا, ەكسپورتتىق مۇمكىندىكتەردىڭ كەڭەيۋىنە جانە ءوندىرىستىڭ يننوۆاتسيالىق دەڭگەيىنىڭ ارتۋىنا باعىتتالعان ناقتى قادام ەكەنىن ايتتى.
«كازپوليگراف» كومپانياسى جاڭا ينۆەستيتسيالىق جوبالاردى جۇزەگە اسىرىپ, وڭىردە جاڭا جۇمىس ورىندارىنىڭ اشىلۋىنا ايتارلىقتاي ۇلەس قوسىپ كەلەدى. بۇگىنگى وقيعا – تەك جاڭا وندىرىستىك جەلىنىڭ ىسكە قوسىلۋى عانا ەمەس, ءوڭىرىمىزدىڭ يندۋستريالىق دامۋىنا, ەكسپورتتىق مۇمكىندىكتەردىڭ كەڭەيۋىنە جانە ءوندىرىستىڭ يننوۆاتسيالىق دەڭگەيىنىڭ ارتۋىنا باعىتتالعان ناقتى قادام», دەدى وبلىس اكىمى.
بيىل وڭىردە ءوندىرىس سالاسى قارقىندى دامىپ كەلەدى. ماسەلەن, «Qazaq Astyq Group» جشس 2026 جىلدىڭ ءبىرىنشى توقسانىندا جىلىنا 72 مىڭ توننا تازارتىلعان كۇنباعىس مايىن وندىرەتىن زاۋىتتى ىسكە قوسۋدى جوسپارلاپ وتىر.
ال جاڭاسەمەي اۋدانىندا ءىرى قارا, قوي جانە جىلقى ەتىن وڭدەيتىن ەت كومبيناتىنىڭ قۇرىلىسى ءجۇرىپ جاتىر. سونىمەن قاتار 2028 جىلعا دەيىن جىلىنا 250 مىڭ دانا تەرى وڭدەيتىن «Eastern Protein» جشس كاسىپورنى مەن جىلىنا 36 مىڭ توننا ءسۇتتى قايتا وڭدەيتىن «ەرتىس ونىمدەرى» جشس زاۋىتى ىسكە قوسىلماق. بۇعان قوسا, مايلى داقىلداردى قايتا وڭدەۋگە باعىتتالعان ءۇش اگروجوبا جۇزەگە اسىرىلادى دەپ جوسپارلانىپ وتىر.
اباي وبلىسى
