سۋرەت وبلىستىق توتەنشە جاعدايلار دەپارتامەنتىنەن الىندى
وڭىرلىك توتەنشە جاعدايلار دەپارتامەنتىنىڭ حابارلاۋىنشا, ەرتىس وزەنىنىڭ پاۆلودار وبلىسى بولىگىندە مۇز وتكەلدەرى ازىرگە اشىلعان جوق. قىسقى ۋاقىتتا وزەن جاعالاۋىنداعى اۋىلدارعا جەمشوپ, وتىن تاسۋعا پايدالانىلاتىن مۇز جولدارى ادەتتە التى بىردەي اۋداندا جۇمىس ىستەيدى. اۋداندار اراسى جاقىنداي ءتۇسىپ, الىس-بەرىس ارتادى.
– ىشكى ىستەر مينيسترلىگىنىڭ 2015 جىلعى 19 قاڭتارداعى №34 بۇيرىعىنا سايكەس, مۇزدىڭ قالىڭدىعى 25 سانتيمەتردەن اسسا اۆتوكولىكتەردىڭ وتۋىنە, 10 سانتيمەتردەن اسسا جاياۋ ادامنىڭ جۇرۋىنە رۇقسات بەرىلەدى. انىقتاعانىمىزداي, بارلىق جەردە مۇز قاباتى بەلگىلەنگەن نورماتيۆتىك قالىڭدىققا جەتە قويماعان. اۋا تەمپەراتۋراسىنىڭ تۇراقتى تۇردە تومەندەۋىنە, سۋ ايدىندارىندا مۇز قاتۋ ۇدەرىسىنىڭ ءارى قاراي جالعاسۋىنا بايلانىستى وڭىردە مۇز وتكەلدەرىن كەزەڭ-كەزەڭىمەن اشۋ جوسپارلانعان. دەپارتامەنت جەرگىلىكتى اتقارۋشى ورگاندارمەن بىرلەسىپ مۇز وتكەلدەرىن ۇيىمداستىرۋ, اشۋعا ارنالعان ورىنداردى ايقىندايدى. ازىرگە بۇل مۇمكىن ەمەس, – دەپ مالىمدەدى دەپارتامەنتتەن.
2024–2025 جىلى قىس كەزەڭىندە وبلىس اۋماعىندا 13 مۇز وتكەلى جۇمىس ىستەگەن. ونىڭ 8-ءى اۆتوكولىككە, وزگەسى جاياۋ جۇرگىنشىلەر مەن جۇك كولىكتەرىنە ارنالعان. اتاپ ايتقاندا, ماي اۋدانىندا – 2, اققۋلىدا – 1, تەرەڭكولدە – 4, ەرتىستە – 1, جەلەزيندە – 4, پاۆلودار اۋدانىندا 1 وتكەل اشىق بولعان.
ءاربىر مۇز وتكەلىن اشۋ ۋاكىلەتتى مەكەمەلەردىڭ مۇز قالىڭدىعىن ولشەۋ, تەكسەرۋ جۇمىسىن جۇرگىزىپ, ءتيىستى رۇقساتىن العاننان كەيىن عانا جۇزەگە اسىرىلادى. رەسمي تۇردە اشىلعانعا دەيىن اتالعان جەرلەردە مۇز ۇستىنە شىعۋعا قاتاڭ تىيىم سالىنادى. مينيسترلىك بەكىتكەن ارنايى بۇيرىقتا وتكەلدەردەن تۇسەتىن جەرلەردە ەكى جاقتان دا ورناتىلعان قالقانداردا ارنايى قىسقى قۇرال-جابدىقتار (ىلگەكتەر, ساتىلار, قۇتقارۋ شەڭبەرلەرى, بورەنەلەر) قويىلۋى كەرەكتىگى ەسكەرتىلگەن. بۇعان قوسا كىرەبەرىستەردە وتكەلدىڭ اتاۋى, جۇمىس ۋاقىتى, ونى قۇرۋ مەن ۇستاۋعا جاۋاپتىلاردىڭ دەرەكتەرى كورسەتىلگەن ماڭدايشالار ورناتىلادى. سول تۇرعىدا بارلىعى تالاپقا ساي بولماسا, مۇز وتكەلدەرى اشىلمايتىنىن ەسكەرۋ كەرەك. بۇل جۇمىستارعا جەرگىلىكتى اتقارۋشى ورگاندار جاۋاپتى.
قۇتقارۋ قىزمەتتەرى تۇرعىندارعا مۇز وتكەلدەرىنىڭ اشىلۋ مەرزىمى اۋا رايى جاعدايىنا, مۇزدىڭ قالىپتاسۋ قارقىنىنا تىكەلەي بايلانىستى ەكەنىن ەسكەرتەدى. كەرەكۋ وڭىرىندە جەلتوقسان ايىندا قاتتى ايازدار بولا قويعان جوق. قاڭتار ايازدى بولسا, ەرتىس وزەنىنىڭ مۇزى قالىڭداپ, وتكەلدەرمەن جولاۋشىلاردىڭ ءارلى-بەرلى قاتىناۋىنا مۇمكىندىك تۋادى.
پاۆلودار وبلىسى
