ەكونوميكانىڭ قۇرىلىمى 2025 جىلى ءبىرشاما تەڭگەرىمدى سيپات الدى. نەگىزگى ءوسىم قىزمەت كورسەتۋ سالاسىنىڭ ۇلەسىنە تيەسىلى بولعانىمەن, تاۋار ءوندىرىسى دە ءوز پوزيتسياسىن ساقتاپ قالدى. ونەركاسىپ تاۋارلىق سەكتورداعى ەڭ ءىرى قۇرامداس بولىك رەتىندە قالىپ وتىر. مۇنداي قۇرىلىم ءبىر عانا سالاعا تاۋەلدىلىكتى ازايتىپ, سىرتقى كۇيزەلىستەرگە يكەمدى جاۋاپ بەرۋگە مۇمكىندىك بەرەدى. ەكونوميكانى ءارتاراپتاندىرۋ ءىس جۇزىندە جۇزەگە اسىپ كەلە جاتقانىن وسى كورسەتكىشتەر ايعاقتايدى.
ينۆەستيتسيالىق بەلسەندىلىك تە نەگىزگى تىرەكتەردىڭ ءبىرى بولدى. رەسمي دەرەكتەرگە سايكەس, 2025 جىلدىڭ قاڭتار-قاراشا ايلارىندا نەگىزگى كاپيتالعا سالىنعان ينۆەستيتسيالار كولەمى شامامەن 18,5 ترلن تەڭگەنى قۇراپ, جىلدىق ەسەپتە 13 پايىزعا جۋىق ءوستى. جەكە ينۆەستيتسيالار اعىنى دا شامامەن 10 پايىزعا ارتتى. سونىمەن قاتار جىل بويى وتكەن حالىقارالىق كەلىسسوزدەر ناتيجەسىندە جالپى سوماسى 70 ميلليارد دوللاردان اساتىن كوممەرتسيالىق كەلىسىمدەر جاسالعانى ايتىلدى. ورتالىق ازياعا تارتىلعان ينۆەستيتسيالاردىڭ 60 پايىزدان استامى قازاقستاننىڭ ۇلەسىنە تيەسىلى ەكەنى دە اتاپ ءوتىلدى.
جالپى العاندا, قازاقستان جىل سايىن ورتا ەسەپپەن 20 ميلليارد دوللاردان استام تىكەلەي شەتەلدىك ينۆەستيتسيا تارتىپ كەلەدى. 2025 جىلدىڭ العاشقى جارتىجىلدىعىندا بۇل كورسەتكىش شامامەن 10,1 ميلليارد دوللار دەڭگەيىندە باعالاندى. بۇل ەلدىڭ ينۆەستيتسيالىق تارتىمدىلىعىنىڭ ساقتالىپ وتىرعانىن كورسەتەدى.
ينۆەستورلار ءۇشىن ينستيتۋتسيونالدىق جاعدايدى جاقسارتۋ دا كۇن تارتىبىنەن تۇسكەن جوق. ارنايى ەكونوميكالىق ايماقتارداعى سالىقتىق جانە كەدەندىك جەڭىلدىكتەر, احقو اياسىنداعى ەرەكشە قۇقىقتىق رەجيم مەن بولجامدى ەرەجەلەر شەتەلدىك كاپيتال ءۇشىن ماڭىزدى فاكتورعا اينالدى. بۇعان قوسا, 2025 جىلى ينۆەستيتسيالىق ۆيزا نەمەسە 10 جىلعا دەيىنگى تۇرۋعا رۇقسات بەرۋ تەتىگى جاريالاندى. بۇل مۇمكىندىك كومپانيا كاپيتالىنا نەمەسە جەرگىلىكتى بيرجالىق قۇرالدارعا كەمىندە 300 مىڭ دوللار كولەمىندە ينۆەستيتسيا سالعان تۇلعالارعا قاراستىرىلدى.
ناقتى سەكتوردا دا قوزعالىس بايقالدى. ەلدە 33 جاڭا زاۋىت ىسكە قوسىلىپ, شامامەن 150 ءوندىرىس ورنى جاڭعىرتۋدان ءوتتى. بۇل ەكونوميكالىق ءوسىمنىڭ تەك ستاتيستيكالىق ەمەس, ناقتى وندىرىستىك نەگىزگە سۇيەنىپ وتىرعانىن كورسەتەدى. جاڭا قۋاتتار, جەتكىزۋ تىزبەكتەرى مەن جۇمىس ورىندارى وسى ۇدەرىستىڭ تىكەلەي ناتيجەسىنە اينالدى.
استانا قالاسىنىڭ ءرولى دە كۇشەيە ءتۇستى. مەملەكەت باسشىسىنىڭ ەلوردانى دامىتۋ ماسەلەلەرى بويىنشا وتكەن كەڭەستە ايتقان باعالاۋىنا سايكەس, 2025 جىلدىڭ قورىتىندىسى بويىنشا قالانىڭ جالپى وڭىرلىك ءونىمى شامامەن 34 ميلليارد دوللاردى قۇراۋى مۇمكىن.
الەۋمەتتىك كورسەتكىشتەر دە ءبىرشاما وڭ سەرپىن كورسەتتى. 2025 جىلدىڭ ەكىنشى توقسانىندا ورتاشا اتاۋلى جالاقى 448 620 تەڭگەگە جەتىپ, جىلدىق ەسەپتە 11,3 پايىزعا ءوستى. استانادا جالاقى ءوسىمى ينفلياتسيا دەڭگەيىنەن جوعارى بولىپ, 15,4 پايىزدى قۇرادى. ال مەديانالىق جالاقى شامامەن 317 512 تەڭگە دەڭگەيىندە قالىپتاسىپ, 2024 جىلمەن سالىستىرعاندا 11,1 پايىزعا ارتتى.
جالپى العاندا, 2025 جىل قازاقستان ەكونوميكاسى ءۇشىن جوعارى ءوسىم قارقىنىمەن, تۇراقتى ينۆەستيتسيالىق اعىنمەن جانە وندىرىستىك الەۋەتتىڭ ناقتى كەڭەيۋىمەن ەرەكشەلەندى. مەملەكەتتىك ساياساتتىڭ باسىمدىعى شيكىزاتتان تىس سالالارعا, ينفراقۇرىلىمعا, وڭدەۋ ونەركاسىبىنە جانە قىزمەت كورسەتۋ سەكتورىنا كاپيتال تارتۋعا باعىتتالعانى ايقىن كورىندى.
