تاراز گورنيزونىندا بەس ەگىز جۇپ قىزمەت ەتەدى

الماتى وبلىسىنان شىققان 22 جاستاعى ەگىزدەر دياس پەن ءىلياس تولەپبەرگەندەر مەرزىمدى اسكەري قىزمەتكە شامامەن ءبىر جىل بۇرىن شاقىرىلعان. تارازداعى قىزمەت بارىسىندا ساربازدار جاقسى ناتيجەلەر كورسەتتى. سونىڭ ارقاسىندا اعايىندىلاردىڭ ءبىرى – دياس جوعارى وقۋ ورنىندا تەگىن ءبىلىم الۋعا ارنالعان ءبىلىم گرانتىن يەلەنەتىن بولدى.

ء«بىز اسكەري بورىشىمىزدى ابىرويمەن اتقارىپ, تۇرعىنداردىڭ تىنىشتىعىن كۇزەتىپ ءجۇرمىز. اسكەردە قىزمەت ەتۋ – ءاربىر ەر ازاماتتىڭ مىندەتى. وسكەلەڭ ۇرپاققا ۇلگى بولامىز دەپ ويلايمىن», دەدى مەرزىمدى اسكەري قىزمەت ساربازى دياس تولەپبەرگەن. 

ەگىزى ءىلياس تولەپبەرگەن تەك اسكەري قىزمەت اتقارىپ قانا قويماي, پوليتسيا قىزمەتكەرلەرىنە قوعامدىق ءتارتىپتى ساقتاۋعا كومەكتەسەتىنىن اتاپ ءوتتى. 

تۇركىستان وبلىسىنان كەلگەن امان مەن ەسەن قونار, سونداي-اق نۇرسۇلتان مەن ەرسۇلتان بەركىشوۆتەر تۇزەۋ مەكەمەسىندەگى تارتىپكە جاۋاپتى. سىرت كەلبەتتەرى ۇقساس بولعانىمەن, مىنەزدەرى ءارتۇرلى بۇل جىگىتتەردى توپتىق رۋح پەن قىزمەتكە دەگەن جاۋاپكەرشىلىك بىرىكتىرەدى.

ولارمەن ءبىر بولىمدە ەلحان مەن ەلشان نۇريەۆتەر دە قىزمەت ەتەدى. جىگىتتەر قول كۇرەسكە قىزىعادى جانە جەتىستىكتەرىن بىرگە قىزمەت اتقاراتىن ارىپتەستەرىنە كورسەتىپ ءجۇر.

اقتوبەدەن تارازعا كەلگەن اقنيەت پەن ادىلەت تورەمۇراتوۆتار جاڭا اسكەري ورتاعا تەز بەيىمدەلدى. قازىر ولار تاراز گارنيزونىنىڭ بايلانىس پولكىندە ەكىنشى اي قىزمەت اتقارىپ ءجۇر. اقنيەت پەن ادىلەت ءاردايىم بىرگە: ءبىر سىنىپتا وقىعان, ءبىر پارتادا وتىرعان, ەندى اسكەردە دە قاتار ءجۇر, تەك مەكتەپ داپتەرلەرىنىڭ ورنىن اسكەري كونسپەكتىلەر الماستىرعان.

«اسكەري قىزمەت بىزگە ۇنايدى. ءار كۇنىمىز قىزىقتى وتەدى. ارمياعا ءوز ەركىمىزبەن كەلدىك. مىنەز بەن ءتارتىپ ءدال وسى جەردە قالىپتاسادى دەپ ويلايمىن», دەدى مەرزىمدى اسكەري قىزمەت ساربازى ادىلەت تورەمۇراتوۆ.

باتالون كومانديرىنىڭ ورىنباسارى راحىمجان ارىنتاەۆتىڭ ايتۋىنشا, اتا-انالار كوبىنە ۇلدارىن اسكەرگە جىبەرۋگە قورقادى. ال مۇندا ءبىر وتباسىدان بىردەن ەكى بالا قىزمەت ەتىپ ءجۇر. ولاردىڭ جاۋاپكەرشىلىگى مول ءارى اشىق-جارقىن.

«ەگىز بولعاندىقتان, ولاردى بولمەۋ تۋرالى شەشىم قابىلداندى. ءوزارا قولداۋدىڭ ارقاسىندا ولار ۇجىمعا تەز ءسىڭىستى», دەپ جاۋاپ بەردى ول 24.kz باعدارلاماسىنا. 

2025 جىلدىڭ كۇزىندە وڭىرلىك «وڭتۇستىك» قولباسشىلىعىنىڭ اسكەري بولىمدەرىنە مەرزىمدى اسكەري قىزمەتتى وتەۋ ءۇشىن شامامەن 2 مىڭ سارباز كەلگەن. قىزمەت قورىتىندىسى بويىنشا ۇزدىك اتانعاندار ەلدەگى 70 جوعارى وقۋ ورنىنان تەگىن ءبىلىم الۋعا ارنالعان ءبىلىم گرانتتارىنا يە بولادى.