اۋماعى 1200 گەكتارعا جەتەتىن الىپ كەشەننىڭ جىلدىق قۋاتى 1 گيگاۆاتت. ينجەنەرلەر تەڭىز بەتىنە 3 مىڭعا جۋىق فوتوەلەكترلى پانەلدىك مودۋل ورناتقان. ناتيجەسىندە ەنەرگيا ءوندىرۋ تيىمدىلىگى بىرنەشە ەسە ارتقان.
ءبىر قاراعاندا, سۋ ۇستىنە پانەل ورناتۋ تەحنيكالىق تۇرعىدان تىم كۇردەلى شارۋا سەكىلدى. ويتكەنى تەڭىز – تۇراقسىز ورتا, ياعني تولقىن, تۇزدى سۋ, جەل, تايفۋن قاۋپى, كورروزيا, قاۋىپسىزدىك ماسەلەسى بار. بىراق ءدال وسى «قيىندىق» قىتاي ينجەنەرلەرىن جاڭا شەشىم تابۋعا جەتەلەگەندەي. قۇرىلىس كەزىندە جويقىن تايفۋندارعا توتەپ بەرەتىن ارنايى ءتاسىل قولدانىلعان. ال تەڭىز سۋى پانەلدەردى تابيعي تۇردە سالقىنداتىپ, شامادان تىس قىزۋدان قورعايدى.
سوڭعى جىلدارى الەمنىڭ كوپتەگەن ەلىندە كۇن ەنەرگەتيكاسى قارقىندى دامىپ كەلەدى. دەگەنمەن كۇن پانەلدەرىن كەڭ كولەمدە ورنالاستىرۋ ءۇشىن ۇلكەن اۋماق قاجەت. قالا ماڭىندا جەر باعاسى قىمبات, اۋىل شارۋاشىلىعى القابىن قىسقارتۋ دا وڭاي شەشىم ەمەس. وسى تۇستا سۋ بەتى – بۇرىن نازاردان تىس قالىپ كەلگەن «كەڭىستىك». قىتايدىڭ تەڭىزدەگى ستانتسياسى بۇل باعىتتىڭ ەندى تەك تاجىريبە ەمەس, ءىرى وندىرىستىك دەڭگەيگە وتكەنىن اڭعارتادى.
جوبانىڭ ەرەكشەلىگى – تەڭىز ۇستىندەگى ينجەنەرلىك قۇرىلىمنىڭ توزىمدىلىگى مەن تيىمدىلىگى قاتار ويلاستىرىلعانى. تەڭىزدە پانەلدى جاي عانا قالقىتىپ قويۋ جەتكىلىكسىز. ءار بولشەك جەل جۇكتەمەسىنە, تولقىن سوققىسىنا, تۇزدى ورتاعا شىداۋى كەرەك. سوندىقتان مۇنداي نىسان – ءبىر مەزەتتە ەنەرگەتيكا, كەمە جاساۋ, قۇرىلىس جانە ماتەريالتانۋدىڭ توعىسقان تۇسى.
«سۋ تۇبىندەگى قادالار يننوۆاتسيالىق تەحنولوگيامەن ورناتىلدى. فوتوەلەكترلى پانەلدەردىڭ ەنى 35, ۇزىندىعى 60 مەتر بولادى. ءبىز ولاردى 15 گرادۋس قيعاش ورناتتىق. بۇل ءتاسىل جويقىن تەڭىز داۋىلدارىنا توتەپ بەرۋ ءۇشىن جاسالدى. سونداي-اق قاڭقاسىنا جۇمسالاتىن بولات تەمىردى 10 پايىزعا دەيىن ۇنەمدەۋگە مۇمكىندىك بەردى. ءدال وسى تاجىريبە ەندىگى جوبالاردا جاپپاي قولدانىلادى», دەدى كۇن ەلەكتر ستانتسياسى باسشىسىنىڭ ورىنباسارى چجان بو.
