فوتو: pinterest.com
2025 جىلى قازاقستانعا «استانا» حالىقارالىق قارجى ورتالىعى ارقىلى 6 ملرد اقش دوللارى كولەمىندە ينۆەستيتسيا تارتىلدى. بۇل وتكەن جىلمەن سالىستىرعاندا شامامەن 3 ملرد دوللارعا ارتىق. ينۆەستيتسيالىق وسىمگە نەگىزىنەن پورتفەلدىك سالىمدار سەرپىن بەردى.
جالپى تارتىلعان قارجىنىڭ 4 ملرد دوللارى پورتفەلدىك ينۆەستيتسيالارعا تيەسىلى بولسا, تاعى 2 ملرد دوللار احقو قاتىسۋشىلارىنىڭ تىكەلەي سالىمدارى ەسەبىنەن قالىپتاستى. ساراپشىلاردىڭ پىكىرىنشە, بۇل كورسەتكىشتەر حالىقارالىق ينۆەستورلاردىڭ قازاقستاننىڭ قارجى ينفراقۇرىلىمىنا دەگەن سەنىمى نىعايىپ كەلە جاتقانىن اڭعارتادى.
ينۆەستيتسيالىق اعىننىڭ ۇلعايۋى احقو-نىڭ كىرىس بولىگىنىڭ وسۋىنە دە تىكەلەي اسەر ەتتى. اتاپ ايتقاندا, كوميسسيالىق تولەمدەر, تىركەۋ جانە سەرۆيستىك الىمدار, سونداي-اق بيرجالىق وپەراتسيالار ورتالىقتىڭ قارجىلىق كورسەتكىشتەرىن ايتارلىقتاي جاقسارتتى.
بۇل ۇدەرىستە احقو جانىنداعى حالىقارالىق قور بيرجاسىنىڭ ءرولى ەرەكشە. 2025 جىلى بيرجاداعى ساۋدا اينالىمى 2 ملرد دوللارعا جەتتى. بۇل كاپيتال نارىعى قۇرالدارىنا, سونىڭ ىشىندە اكتسيالار مەن وبليگاتسيالارعا دەگەن سۇرانىستىڭ ارتقانىن كورسەتەدى.
جالپى العاندا, 2018 جىلدان بەرى احقو ارقىلى قازاقستان ەكونوميكاسىنا 20 ملرد اقش دوللارى كولەمىندە ينۆەستيتسيا تارتىلعان. بۇل قارجى ەلدىڭ قارجى سەكتورىن دامىتۋعا, ينۆەستيتسيالىق كليماتتى جاقسارتۋعا جانە حالىقارالىق كاپيتالمەن ىقپالداستىقتى كۇشەيتۋگە باعىتتالعان ماڭىزدى رەسۋرس سانالادى.
