وبلىس اكىمى مارات سۇلتانعازيەۆ جينالعان قاۋىمدى جاڭا دەنساۋلىق ساقتاۋ مەكەمەسىنىڭ اشىلۋىمەن قۇتتىقتاپ, زاماناۋي تالاپتارعا ساي جابدىقتالعان ەمحانادا تۇرعىندارعا ساپالى مەديتسينالىق قىزمەت كورسەتۋگە تولىق مۇمكىندىك بارىن اتاپ ايتتى.
«دەنساۋلىق ساقتاۋ جۇيەسىن دامىتۋ – مەملەكەتتىك ساياساتتىڭ باسىم باعىتتارىنىڭ ءبىرى. مەملەكەت باسشىسى اسىرەسە وڭىرلەردە العاشقى مەديتسينالىق-سانيتارلىق كومەكتى نىعايتۋدىڭ ماڭىزدىلىعىن بىرنەشە رەت اتاپ وتكەن بولاتىن. وسى جوبانىڭ جۇزەگە اسىرىلۋى – سول جۇيەلى جۇمىستىڭ ناقتى ناتيجەسى. بۇل ەمحانادا مەديتسينا قىزمەتكەرلەرىنىڭ ساپالى ءارى ناتيجەلى جۇمىس ىستەۋى ءۇشىن بارلىق قاجەتتى جاعداي جاسالعان. سونىڭ ارقاسىندا, ءاربىر تۇرعىنعا ساپالى مەديتسينالىق كومەك ۋاقىتىلى كورسەتىلىپ, اۋرۋلاردىڭ الدىن الۋ, ەرتە انىقتاۋ جانە ءتيىمدى ەمدەۋ تولىق قامتاماسىز ەتىلەتىنىنە سەنىمدىمىن», دەگەن ءوڭىر باسشىسى ەمحانانىڭ قۇرىلىسىن ساپالى ءارى ۋاقتىلى جۇرگىزگەن مەردىگەر «AK Construction» كومپانياسىنا زور العىسىن ءبىلدىردى.
زاماناۋي جاڭا ەمحانا اۋداننىڭ 200 مىڭنان استام حالقىنا قىزمەت كورسەتۋگە لايىقتالعان. كۇنىنە 250 ادام قابىلداۋعا قاۋقارلى. زاماناۋي مەديتسينالىق قۇرال-جابدىقتارمەن تولىق قامتىلعان جانە العاشقى مەديتسينالىق-سانيتاريالىق كومەك كورسەتۋدىڭ بارلىق تالاپتارىنا ساي كەلەدى. مۇندا جوعارى تەحنولوگيالى دياگنوستيكالىق اپپاراتتار, تسيفرلىق رەنتگەن, ۋلترادىبىستىق زەرتتەۋ قۇرىلعىلارى, زەرتحانالىق تالداۋ جۇيەلەرى, تەلەمەديتسينا مۇمكىندىكتەرى جانە جەدەل مەديتسينالىق كومەككە ارنالعان زاماناۋي جابدىقتار ورناتىلعان. مەكەمەنىڭ شتاتتىق قۇرامىندا بارلىعى 324 قىزمەتكەر بار. ونىڭ ىشىندە 98-ءى دارىگەرلىك پەرسونال بولسا, ولاردىڭ 66-سى بەيىندى ماماندار. ورتا مەديتسينالىق پەرسونال سانى – 194 ادام, كىشى مەديتسينالىق پەرسونال – 24. سونىمەن قاتار, وزگە باعىتتاعى 8 قىزمەتكەر ەڭبەك ەتەدى.
قازىرگى ۋاقىتتا الماتى وبلىسىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 38 دەنساۋلىق ساقتاۋ نىسانىنىڭ قۇرىلىسى جوسپارلانعان. ونىڭ ىشىندە 13 دارىگەرلىك امبۋلاتوريا, 14 فەلدشەرلىك-اكۋشەرلىك پۋنكت جانە 11 مەديتسينالىق پۋنكت بار. جوبالاردىڭ جالپى قۇنى 8,2 ملرد تەڭگەدەن اسادى. بۇگىندە 38 نىساننىڭ 12-ءسى پايدالانۋعا بەرىلدى, قالعانىن جىل سوڭىنا دەيىن بەرۋ جوسپارلانۋدا.
الماتى وبلىسى
