فوتو: دانيار جولدوشبەكتىڭ كارتيناسى
جارلىققا سايكەس المازبەك اتامباەۆ «قىرعىز رەسپۋبليكاسىنىڭ باتىرى» ەڭ جوعارى ەرەكشەلىك دارەجەسىنەن, II دارەجەلى «ماناس» وردەنىنەن, «داناكەر» وردەنىنەن جانە «داڭق» مەدالىنەن ايىرىلدى. سونىمەن قاتار وسى ناگرادالاردى بەرۋ تۋرالى بۇرىن قابىلدانعان بىرقاتار پرەزيدەنتتىك قۇجاتتاردىڭ كۇشى جويىلدى.
اتاپ ايتقاندا, 1999 جىلعى 22 ساۋىردەگى «داڭق» مەدالىنە, 2007 جىلعى 27 قاراشاداعى «دانەكەر» وردەنىنە, 2011 جىلعى 30 قاراشاداعى مەملەكەتتىك ناگرادالار تۋرالى جارلىقتىڭ ءبىر تارماعىنا جانە 2017 جىلعى 27 قاراشادا «قىرعىز رەسپۋبليكاسىنىڭ باتىرى» اتاعىن بەرۋ جونىندەگى قۇجاتقا قاتىستى شەشىمدەر كۇشىن جويدى.
جارلىققا سايكەس باس پروكۋراتۋرا جانىنداعى سوت ورىنداۋشىلارى قىزمەتىنە اتالعان ناگرادالار مەن ولاردى راستايتىن قۇجاتتاردى الىپ, مەملەكەتتىك ناگرادالار قورىنا وتكىزۋ تاپسىرىلدى. قۇجات 29 جەلتوقساننان باستاپ كۇشىنە ەندى.
بۇعان دەيىن المازبەك اتامباەۆ سوت ۇكىمىمەن 11 جىل 3 ايعا باس بوستاندىعىنان ايىرىلىپ, مۇلكىن تاركىلەۋ جانە مەملەكەتتىك ناگرادالارىنان ايىرۋ جازاسىنا كەسىلگەن ەدى. ول بىشكەك جىلۋ ەلەكتر ورتالىعىن جاڭعىرتۋ كەزىندە زاڭسىز بايۋ, 2019 جىلعى 7–8 تامىزدا قوي-تاش اۋىلىندا بولعان جاپپاي تارتىپسىزدىكتەر جانە جەر تەلىمدەرىن زاڭسىز الۋ ايىپتارى بويىنشا كىنالى دەپ تانىلدى.
بۇل ءىس بويىنشا بۇرىنعى جوگوركۋ كەنەش دەپۋتاتتارى, پرەزيدەنت اپپاراتىنىڭ ەكس-باسشىسى فاريد نيازوۆ, بىشكەكتىڭ بۇرىنعى اكىمى البەك يبرايموۆ, ىشكى ىستەر مينيسترلىگىنىڭ ەكس-باسشىسى ابدىلدا سۋرانچيەۆ جانە باسقا دا تۇلعالار ءارتۇرلى مەرزىمگە سوتتالعان. سوت پروتسەسى بەس جىلدان استام ۋاقىتقا سوزىلعان.
