فوتو: اشىق دەرەككوز
زەينەتاقى مەن جاردەماقىلار 10 پايىزعا وسەدى
«2026–2028 جىلدارعا ارنالعان رەسپۋبليكالىق بيۋدجەت تۋرالى» زاڭعا سايكەس 2026 جىلعى 1 قاڭتاردان باستاپ مەملەكەتتىك جاردەماقىلاردىڭ بارلىق ءتۇرى, سونداي-اق بازالىق جانە ىنتىماقتى زەينەتاقىلار ۇلتتىق بانك ايقىندايتىن ينفلياتسيانىڭ بولجامدى دەڭگەيىنە ساي 10 پايىزعا وسەدى.
بازالىق زەينەتاقىنى كەزەڭ-كەزەڭىمەن ارتتىرۋ
مەملەكەت باسشىسىنىڭ تاپسىرماسىنا وراي 2023 جىلدان باستاپ بەس جىل ىشىندە بازالىق زەينەتاقىنىڭ ەڭ تومەنگى مولشەرىن ەڭ تومەنگى كۇنكورىس دەڭگەيىنىڭ 70 پايىزىنا دەيىن, ال ەڭ جوعارى مولشەرىن 120 پايىزىنا دەيىن كەزەڭ-كەزەڭىمەن ارتتىرۋ جۇزەگە اسىرىلىپ كەلەدى.
بازالىق زەينەتاقىنىڭ جاڭا مولشەرى
وسىعان سايكەس 2026 جىلعى 1 قاڭتاردان باستاپ بازالىق زەينەتاقىنىڭ ەڭ تومەنگى مولشەرى 35 596 تەڭگەگە جەتەدى. بۇل ەڭ تومەنگى كۇنكورىس دەڭگەيىنىڭ 70 پايىزىنا تەڭ. ال ەڭ جوعارى مولشەرى كۇنكورىس دەڭگەيىنىڭ 110 پايىزىنان 118 پايىزىنا دەيىن ءوسىپ, 60 005 تەڭگەنى قۇرايدى.
قاڭتار ايىندا زەينەتاقى ەرتە تۇسە مە؟ مينيسترلىك ماڭىزدى مالىمدەمە جاسادى
ماسەلەن, 2019 جىلى زەينەتكەرلىككە شىققان 70 جاستاعى ازاماتتىڭ 2025 جىلى بيۋدجەتتەن الاتىن زەينەتاقىسى 171 588 تەڭگە بولدى. ونىڭ ىشىندە بازالىق زەينەتاقى 50 851 تەڭگەنى, ىنتىماقتى زەينەتاقى 120 737 تەڭگەنى قۇرادى. 2026 جىلعى 1 قاڭتاردان باستاپ جۇرگىزىلەتىن ارتتىرۋدى ەسكەرسەك, وسى زەينەتكەردىڭ جالپى زەينەتاقى مولشەرى 192 816 تەڭگەگە دەيىن ۇلعايادى. ونىڭ 60 005 تەڭگەسى بازالىق, 132 811 تەڭگەسى ىنتىماقتى زەينەتاقىعا تيەسىلى. بۇل سوماعا بىرىڭعاي جيناقتاۋشى زەينەتاقى قورىنان تولەنەتىن قاراجات كىرمەيدى.
بالا تۋىنا بايلانىستى جاردەماقىلار
2026 جىلدان باستاپ مەملەكەتتىك جاردەماقىلاردىڭ وسۋىنە قاتىستى بىرقاتار وزگەرىس قاراستىرىلعان. ءبىرىنشى, ەكىنشى جانە ءۇشىنشى بالا تۋعان كەزدە بەرىلەتىن بىرجولعى جاردەماقى 149 416 تەڭگەدەن 164 350 تەڭگەگە دەيىن ارتادى. ءتورت جانە ودان دا كوپ بالا تۋعان جاعدايدا بۇل تولەم 247 716 تەڭگەدەن 272 475 تەڭگەگە دەيىن وسەدى.
زەينەتاقى 10%-عا وسەدى: 2026 جىلى زەينەتكەرلەر قانشا تەڭگە الادى؟
كوپبالالى وتباسىلارعا قولداۋ كۇشەيەدى
كوپبالالى وتباسىلارعا بالا سانىنا قاراي تولەنەتىن جاردەماقى دا ۇلعايادى. ءتورت بالاسى بار وتباسىلار 63 030 تەڭگەنىڭ ورنىنا 69 330 تەڭگە الادى. ال ون بالاسى بار وتباسىلار ءۇشىن تولەم مولشەرى 157 280 تەڭگەدەن 173 000 تەڭگەگە دەيىن كوبەيەدى.
مۇگەدەكتىگى بار ازاماتتارعا تولەمدەر
مۇگەدەكتىگى بار ازاماتتارعا بەرىلەتىن جاردەماقىلار دا ارتادى. ءبىرىنشى توپتاعى مۇگەدەكتىگى بار ادامدارعا تولەنەتىن جاردەماقى 101 702 تەڭگەدەن 111 872 تەڭگەگە دەيىن, ەكىنشى توپتاعىلارعا 81 362 تەڭگەدەن 89 498 تەڭگەگە دەيىن, ءۇشىنشى توپتاعىلارعا 55 474 تەڭگەدەن 61 021 تەڭگەگە دەيىن وسەدى.
جاڭا جىلعا دەيىن زەينەتاقى جيناعىنان قالاي اقشا الىپ قالۋعا بولادى؟
الەۋمەتتىك ساقتاندىرۋ قورىنان تولەمدەر
سونىمەن بىرگە مەملەكەتتىك الەۋمەتتىك ساقتاندىرۋ قورىنان تولەنەتىن اسىراۋشىسىنان ايىرىلۋ جانە ەڭبەككە قابىلەتتىلىگىنەن ايىرىلۋ بويىنشا الەۋمەتتىك تولەمدەر دە 10 پايىزعا ۇلعايادى. بۇل تولەمدەر مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا بيۋدجەت ەسەبىنەن بەرىلەتىن مەملەكەتتىك جاردەماقىلارعا قوسىمشا تولەنەدى.
تولەم مولشەرى قالاي ەسەپتەلەدى؟
اتالعان تولەمدەردىڭ مولشەرى ءار ازامات ءۇشىن جەكە ەسەپتەلەدى. ول سوڭعى ەكى جىلدا مەملەكەتتىك الەۋمەتتىك ساقتاندىرۋ قورىنا اۋدارىلعان الەۋمەتتىك جارنالارعا, ورتاشا ايلىق تابىسقا, ەڭبەككە قابىلەتتىلىگىنەن ايىرىلۋ دەڭگەيىنە, اسىراۋىنداعى ادامدار سانىنا جانە الەۋمەتتىك ساقتاندىرۋ جۇيەسىنە قاتىسۋ وتىلىنە بايلانىستى ايقىندالادى.
