Orda.kz
اكتەر ءارى ستسەناريست نۇرلان سەگىزباەۆپەن قوشتاسۋ راسىمىنە مارقۇمنىڭ جاقىندارى, دوستارى, ارىپتەستەرى, كينو جانە تەاتر اكتەرلەرى جينالدى.
قوشتاسۋ راسىمىندە ءسوز العان مارقۇمنىڭ دوسى, بەلگىلى رەجيسسەر بولات قالىمبەتوۆتىڭ ءسوزى جينالعانداردىڭ قابىرعاسىن قايىستىردى. ول نۇرلاننىڭ ونەر جولىنداعى بيىكتىگىن عانا ەمەس, ىشكى جان دۇنيەسىندەگى ايتىلماعان وكپەسى مەن ارمانىن دا اقتاردى.
«ول – اتى اڭىزعا اينالعان فۋتبولشى تيمۋر سەگىزباەۆتىڭ تۋعان ءىنىسى ەدى. بىراق ول ەشقاشان بىرەۋدىڭ تاساسىندا قالعان جوق. نۇرلاننىڭ ەڭ باستى قاسيەتى – جانىنىڭ تازالىعى. «قازاقفيلم» توقىراپ, ءالى ەش سەريال تۇسىرىلمەي تۇرعان شاقتا, ەڭ العاشقى «پەرىشتە» تۋىندىسى ءدال وسى نۇرلاننىڭ ستسەناريىمەن جارىق كوردى», دەپ ەسكە الدى بولات قالىمبەتوۆ.
رەجيسسەردىڭ ايتۋىنشا, تالانتتى اكتەر سوڭعى جىلدارى وزىنە لايىقتى قولداۋدىڭ جوقتىعىنا ىشتەي رەنجىپ وتكەن. كەرەمەت ستسەناريلەرى قاعاز جۇزىندە قالىپ, ۇلكەن ەكرانعا جولداما الا الماعانى ونىڭ جانىنا باتقان.
«جاسىراتىن نەسى بار؟! بىزگە كىشكەنە رەنجىدى عوي. سەبەبى وعان دۇرىس كوڭىل بولىنگەن جوق. كەرەمەت ستسەناريلەرى ىسكە اسپاي قالدى. ول ءوزىنىڭ ءومىرىنىڭ از قالعانىن سەزدى. «ماعان قاشان مۇمكىندىك بەرەدى؟» دەيتىن. «مەن قايدان بىلەمىن. ءوزىم تۇسىرە الماي ءجۇرمىن» دەيتىنمىن», دەدى دوسى.
نۇرلان سەگىزباەۆ تەك شىعارماشىلىقتىڭ عانا ەمەس, تاعدىردىڭ دا قاتال سىناعىنا تاپ بولعان ەدى. بيىلعى ناۋرىز ايىندا دارىگەرلەر وعان وكپەنىڭ اۋىر دەرتى (حوبل, 4-ءشى ساتىسى) دەگەن دياگنوز قويدى.
