مەموريالدى تاقتا الماتى قالالىق اكىمدىگىنىڭ قولداۋىمەن جاسالىپ, قالامگەردىڭ قازاق ادەبيەتى مەن عىلىمىنا قوسقان ولشەۋسىز ەڭبەگىنە قۇرمەت رەتىندە اشىلدى. تاقتانى اشۋ راسىمىنە قاتىسقان زيالى قاۋىم وكىلدەرى ورازانباي ەگەۋباەۆتىڭ پاراساتى مەن ۇلت رۋحانياتىنداعى تۇلعالىق ورنىن ايرىقشا اتاپ ءوتتى.
م.اۋەزوۆ اتىنداعى ادەبيەت جانە ونەر ينستيتۋتىنىڭ ۇيىمداستىرۋىمەن جانە جازۋشىلار وداعىنىڭ قولداۋىمەن وتكەن كونفەرەنتسياعا ايتۋلى عالىمدار, جازۋشىلار, ورازانباي جۇماعۇل ۇلىنىڭ تۋىستارى قاتىستى. ءىس-شارانى م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى, اكادەميك كەنجەحان ماتىجانوۆ جۇرگىزىپ, ورازانباي ەگەۋباەۆتىڭ قازاق ادەبيەتى مەن فولكلورىن زەرتتەۋ ىسىنە قوسقان ولشەۋسىز ۇلەسىن, شەتەلدەگى قازاق مۇراسىن جۇيەلەۋدەگى قايراتكەرلىك قىزمەتىنە كەڭىنەن توقتالدى.
جيىن بارىسىندا شەتەل قازاقتارىنىڭ رۋحاني مۇراسىن زەرتتەۋدىڭ وزەكتى ماسەلەلەرى جاڭا قىرىنان قاراستىرىلىپ, جازۋشىنىڭ عىلىمي مۇراسىنىڭ ماڭىزى تالداندى. سونىڭ نەگىزىندە قازاق ادەبيەتىنىڭ تاريحى, شەتەل قازاقتارىنىڭ مۇرالارى, تاڭجارىقتانۋ جانە ورازانباي ەگەۋباەۆتىڭ عىلىمي مۇراسى جونىندە مازمۇندى باياندامالار مەن ەستەلىكتەر تىڭدالدى.
اتاپ ايتقاندا, اقىن سۆەتقالي نۇرجان «ۇلت تاعدىرىن تۇعىرلاعان تۇلعا», جازۋشىلار وداعى توراعاسىنىڭ ورىنباسارى عالىم قاليبەك ۇلى – «قازاق ادەبيەتىندەگى ۇلتتىق قاھارماندار», فيلولوگيا عىلىمدارىنىڭ دوكتورى گۇلجاھان وردا – «كوكبورى نەمەسە تاعدىر تالكەگى» رومان-ەسسەسىندەگى ۇلت قاسىرەتى», فيلولوگيا عىلىمدارىنىڭ كانديداتى اقەدىل تويشان ۇلى – «تاڭجارىقتانۋدىڭ نەگىزىن قالاۋشى», فيلولوگيا عىلىمدارىنىڭ كانديداتى جۇماشاي راقىش – «حالىق مۇراسىنىڭ جاناشىرى», جازۋشىنىڭ ۇلى ايدىن ەگەۋباەۆ – «اكە تۋرالى ءسوز» تاقىرىبىندا بايانداما جاسادى. سونداي-اق تاريحشى الىمعازى داۋلەتحان, اقىن ەربول الشىنباي, مەملەكەت جانە قوعام قايراتكەرى تالعات ماماشەۆ جازۋشى مۇراسىنىڭ بۇگىنگى ادەبيەتتانۋ مەن رۋحانياتتاعى ورنى تۋرالى پىكىر ءبىلدىردى.
كونفەرەنتسيا اياسىندا جازۋشى ءسالي سادۋاقاس ۇلىنىڭ ورازانباي جۇماعۇل ۇلىنا ارنالعان «قايران, ورەكەم-اي» اتتى جاڭا كىتابىنىڭ تۇساۋكەسەرى ءوتتى.
«بۇل كىتاپ – مەرەيتوي يەسىنىڭ تۇلعالىق بولمىسىن, ادامي قاسيەتىن, شىعارماشىلىق جانە عىلىمي جولىن جان-جاقتى اشاتىن ەستەلىك-ەسسە جانرىنداعى قۇندى تۋىندى. اۆتور وندا ورازانباي ەگەۋباەۆتىڭ قىتايداعى قازاق ادەبيەتىن زەرتتەۋ ساپارلارىنداعى ىزدەنىستەرىن, ارحيۆتەر مەن قولجازبالار اراسىنداعى تىنىمسىز ەڭبەگىن, سونداي-اق تاڭجارىقتانۋ باعىتىن قالىپتاستىرۋداعى ءرولىن كەڭىنەن باياندايدى. مەرەيتويعا ارنالعان عىلىمي-تەوريالىق كونفەرەنتسيا مەن مەرەيتوي اياسىندا جۇزەگە اسقان ءىس-شارالار جازۋشىنىڭ ۇلتتىق رۋحانياتتاعى ورنىن جان-جاقتى ايقىنداپ, ونىڭ شەتەلدەگى قازاقتاردىڭ ادەبي جانە فولكلورلىق مۇراسىن جيناۋداعى, جاريالاۋداعى جانە عىلىمي اينالىمعا ەنگىزۋدەگى ولشەۋسىز ەڭبەگىن كەڭ كولەمدە تانىتتى», دەيدى ادەبيەت جانە ونەر ينستيتۋتىنىڭ ءباسپاسوز حاتشىسى نۇر ماعازبەكوۆ.
الماتى
