مينيسترلىكتىڭ حابارلاۋىنشا, نۇرلان سانجار ۇلى قازاق مادەنيەتى مەن ونەرىنىڭ دامۋىنا ەلەۋلى ۇلەس قوسقان كورنەكتى تۇلعا بولدى. ول بۇكىل عۇمىرىن شىعارماشىلىققا, ۇلتتىق رۋحانياتقا ارناپ, كەيىنگى ۇرپاققا تاعىلىمى مول, قۇندى مۇرا قالدىردى.
ونەر يەسى قالىڭ كورەرمەنگە رەجيسسەر ابدوللا قارساقباەۆتىڭ «مەنىڭ اتىم قوجا» فيلمىندەگى باستى ءرولى ارقىلى كەڭىنەن تانىلدى. بۇل تۋىندىداعى بەينەسى ارقىلى نۇرلان سەگىزباەۆ قازاق كينو ونەرىندەگى دارا تۇلعالاردىڭ بىرىنە اينالىپ, وتاندىق كينو تاريحىندا ايرىقشا ءىز قالدىردى. ونىڭ ەكراندا سومداعان كوركەم وبرازدارى بىرنەشە بۋىن كورەرمەننىڭ جادىندا ساقتالىپ, ۇلتتىق ونەردىڭ التىن قورىنان لايىقتى ورىن الدى.
مادەنيەت جانە اقپارات مينيسترلىگى مارقۇمنىڭ جارقىن بەينەسى, شىعارماشىلىق مۇراسى مەن عيبراتتى عۇمىر جولى حالقىمىزدىڭ جادىندا ماڭگى ساقتالاتىنىنا سەنىم ءبىلدىردى.
