كوميتەتتىڭ مالىمەتىنشە, 2025 جىلدىڭ اقپان ايىندا ايەل اقتوبە قالاسىنداعى اۆتوسالونداردىڭ بىرىنەن 2025 جىلى شىعارىلعان اۆتوكولىكتى 16 490 000 تەڭگەگە ساتىپ العان. ونىڭ 8 310 000 تەڭگەسىن بىردەن تولەپ, قالعان بولىگىن 7 جىل مەرزىمگە نەسيەگە راسىمدەگەن.
الايدا 2025 جىلدىڭ ءساۋىر ايىنىڭ ورتاسىنان باستاپ كولىكتە بىرقاتار اقاۋلار انىقتالعان. اتاپ ايتقاندا, قوزعالتقىشتىڭ كلاپان قاقپاعى تىعىزداعىشى ماڭىندا بۋلانۋ, كلاپان قاقپاعى استىنان ماي اعۋى جانە كلاپان قاقپاعىن بەكىتەتىن بولتتىڭ بۇراندالى بولىگىنەن ماي اعۋى تىركەلگەن.
ساتىپ الۋشى اتالعان ماسەلەلەر بويىنشا رەسمي ديلەرگە ءتورت رەت جۇگىنگەنىمەن, اقاۋلار تولىق جويىلماعان.
كوميتەتتىڭ حابارلاۋىنشا, كولىكتى قايتارۋ تۋرالى اۋىزشا تالاپتارعا اۆتوسالون باس تارتىپ, اۆتوموبيل تەحنيكالىق كۇردەلى تاۋار ساناتىنا جاتادى جانە قايتارىلمايدى دەپ جاۋاپ بەرگەن.
كوميتەت تۇسىندىرگەندەي, ازاماتتىق كودەكستىڭ 403-بابىنىڭ 5-تارماعىنا سايكەس, شارتتىڭ ەلەۋلى تۇردە بۇزىلۋى جاعدايىندا زارداپ شەككەن تاراپ كەلتىرىلگەن شىعىندى وتەۋدى تالاپ ەتۋگە قۇقىلى. سونىمەن قاتار «تۇتىنۋشىلاردىڭ قۇقىقتارىن قورعاۋ تۋرالى» زاڭنىڭ 15-بابى 1-تارماعىنىڭ 4) جانە 6) تارماقتارىنا ساي, تۇتىنۋشى تاۋاردى اۋىستىرۋدى نەمەسە شارتتى بۇزىپ, تولەنگەن اقشانى قايتارۋدى تالاپ ەتە الادى.
كوميتەت وكىلدەرىنىڭ ايتۋىنشا, كولىك قۇرالدارى تەحنيكالىق كۇردەلى تاۋارلارعا جاتادى. الايدا ەلەۋلى كەمشىلىك انىقتالعان جاعدايدا, مۇنداي تالاپتار زاڭدى بولىپ ەسەپتەلەدى. ەلەۋلى كەمشىلىك دەپ جويىلمايتىن, جويۋ ءۇشىن شامادان تىس ۋاقىت پەن قارجى تالاپ ەتەتىن نەمەسە تۇتىنۋشىنىڭ ومىرىنە, دەنساۋلىعىنا جانە مۇلكىنە قاۋىپ توندىرەتىن اقاۋلار تانىلادى.
سونداي-اق زاڭناماعا سايكەس, ساتۋشى تۇتىنۋشىنىڭ تالاپتارىن بەلگىلەنگەن مەرزىمدە ورىنداۋعا, ساراپتاما جۇرگىزۋ شىعىندارىن وتەۋگە جانە تاۋارداعى كەمشىلىكتەر ءۇشىن, ولار تۋرالى بىلگەن-بىلمەگەنىنە قاراماستان, جاۋاپ بەرۋگە مىندەتتى. ساتۋشىنى جاۋاپكەرشىلىكتەن بوساتاتىن كەز كەلگەن كەلىسىم زاڭسىز دەپ تانىلادى.
كوميتەتتىڭ مالىمەتىنشە, اۆتوسالوننىڭ تۇتىنۋشىنىڭ زاڭدى تالابىن ورىنداۋدان باس تارتۋى ونىڭ قۇقىقتارىنىڭ تىكەلەي بۇزىلۋى بولىپ سانالادى.
2025 جىلدىڭ مامىر ايىندا ايەل تۇتىنۋشىلاردىڭ قۇقىقتارىن قورعاۋ دەپارتامەنتىنە جۇگىنگەن. جازباشا تالاپ-ارىز جولدانعاننان كەيىن اۆتوسالون كولىكتى كەرى قابىلداپ, ساتىپ الۋشىعا تولىق سومانى قايتارعان. اتاپ ايتقاندا, 8 310 000 تەڭگە قولما-قول تولەنىپ, 8 190 000 تەڭگە بانك الدىنداعى نەسيەلىك مىندەتتەمەلەردى جويۋ ارقىلى قايتارىلعان.
