قوناق ۇيلەر زاماناۋي ستاندارتتارعا ساي جاڭارتىلادى

ءمينيستردىڭ ايتۋىنشا, بۇرىن قولدانىستا بولعان تالاپتار قازىرگى زامانعى ستاندارتتارعا سايكەس كەلمەيدى. وسىعان بايلانىستى جاڭا ەرەجەلەر جوباسى قازىرگى ۋاقىتتا پارلامەنت ماجىلىسىندە قارالۋدا.

«جاڭارتىلعان جۇيە قوناق ءۇي قىزمەتتەرىنىڭ ساپاسىن ارتتىرۋعا, كەلۋشىلەردىڭ قاناعاتتانۋ دەڭگەيىن جوعارىلاتۋعا جانە قازاقستاننىڭ تۋريستىك باعىت رەتىندەگى تارتىمدىلىعىن كۇشەيتۋگە مۇمكىندىك بەرەدى», دەدى ەربول مىرزابوسىنوۆ.

سونداي-اق مينيستر 2025 جىلى الماتى قالاسى CNN Travel نۇسقاسى بويىنشا جىلدىڭ ۇزدىك تۋريستىك باعىتتارىنىڭ قاتارىنا قوسىلعانىن, ال قازاقستاننىڭ Lonely Planet باسىلىمىنىڭ Best in Travel 2025 رەيتينگىنە ەنگىزىلگەنىن اتاپ ءوتتى.

بۇدان بولەك, الماتى Bloomberg باسپاسىنىڭ نۇسقاسى بويىنشا 2026 جىلدىڭ ەڭ ۇزدىك 25 تۋريستىك لوكاتسياسىنىڭ ءبىرى رەتىندە تانىلدى. Amazon Prime, M6 جانە CCTV4 تەلەارنالارىمەن بىرلەسىپ جۇزەگە اسىرىلعان مەديا-جوبالار حالىقارالىق دەڭگەيدە ميلليونداعان اۋديتوريانى قامتىپ, ەلدىڭ تۋريستىك الەۋەتىنىڭ تانىمالدىلىعىن ارتتىرۋعا ىقپال ەتتى.

سونىمەن قاتار 2025 جىلى ەلىمىزدەگى 8 نەگىزگى كۋرورتتىق ايماققا ينۆەنتاريزاتسيا جۇرگىزىلدى. مينيستر ەربول مىرزابوسىنوۆ اتالعان جۇمىستاردىڭ ناتيجەسىندە 2025-2028 جىلدارعا ارنالعان كۋرورتتىق ايماقتاردى دامىتۋ جونىندەگى جول كارتاسىنىڭ جوباسى ازىرلەنگەنىن اتاپ ءوتتى.

سونداي-اق بيىل كۋرورتتىق ينفراقۇرىلىمدى جۇيەلى جاڭعىرتۋدى, قاۋىپسىزدىك دەڭگەيىن ارتتىرۋدى, لوگيستيكانى جانە تۋريستىك سەرۆيستەردى دامىتۋدى كوزدەيتىن ششۋچە-بۋراباي كۋرورتتىق ايماعىن دامىتۋدىڭ, سونداي-اق 2025-2029 جىلدارعا ارنالعان «ماڭعىستاۋ» تۋريستىك ايماعىن دامىتۋدىڭ كەشەندى جوسپارى بەكىتىلدى.