تۋريزم جانە سپورت ءمينيسترى ەربول مىرزابوسىنوۆ بيىل قازاقستاندا تۋريستىك اعىننىڭ ءوسۋى بايقالعانىن ايتتى.
«2025 جىلدىڭ قاڭتار-قىركۇيەك ايلارىنىڭ قورىتىندىسى بويىنشا ەلىمىزگە تۋريستىك ماقساتتا 12,1 ملن شەتەل ازاماتى كەلگەن. ولاردىڭ 8,6 ميلليونى ەلدە ءبىر تاۋلىكتەن استام ۋاقىت بولعان شەتەلدىك تۋريستەر رەتىندە جىكتەلگەن. ورنالاستىرۋ ورىندارىنىڭ قىزمەتىن 1 ملن شەتەلدىك جانە 6,7 ملن ىشكى تۋريست پايدالانعان, بۇل سىرتتان كەلگەن تۋريزم مەن ىشكى ءتۋريزمنىڭ تۇراقتى ءوسىمىن كورسەتەدى», دەدى مينيستر.
ۆەدومستۆو دەرەكتەرىنە سايكەس, ەلىمىزدە ءبىر مەزگىلدە 243,5 مىڭنان استام جاتىن ورىنعا ەسەپتەلگەن 4 499 ورنالاستىرۋ نىسانى جۇمىس ىستەيدى. قوناق ۇيلەر مەن وزگە دە ورنالاستىرۋ نىساندارىنىڭ جيىنتىق تابىسى 268 ملرد تەڭگەگە جەتىپ, وڭىرلەردەگى ىسكەرلىك بەلسەندىلىك پەن تۋريستىك تۇتىنۋدىڭ ارتقانىن كورسەتتى.
2025 جىلدىڭ قاڭتار-قازان ايلارىندا تۋريزم سالاسىنا تارتىلعان ينۆەستيتسيا كولەمى 38,1%-عا ءوسىپ, 923 ملرد تەڭگەنى قۇرادى. سونىمەن قاتار ەلدىڭ 20 وڭىرىندە 147 ينفراقۇرىلىمدىق جوبا جۇزەگە اسىرىلىپ جاتىر. بۇل سالاعا جەكە جانە ينستيتۋتسيونالدىق كاپيتالدىڭ جوعارى قىزىعۋشىلىعىن دالەلدەيدى.
