فوتو: Polisia.kz
بۇعان دەيىن الەۋمەتتىك جەلىلەردە قالانىڭ مەيرامحانالارىنىڭ بىرىندە بولعان وقيعانىڭ بەينەجازباسى تاراعان ەدى. بەينەجازبادا مەيرامحانا قوناعى مەن مەكەمە اكىمشىسى اراسىندا جانجال تۋىنداعان.
اتالعان وقيعا بويىنشا مەدەۋ اۋداندىق پوليتسيا باسقارماسىنىڭ قىزمەتكەرلەرى تەكسەرۋ جۇرگىزىپ, جانجالعا قاتىسى بارلاردى انىقتاپ, ولاردان تۇسىنىكتەمە الدى. وقيعانىڭ بارلىق ءمان-جايى مۇقيات زەردەلەندى.
«تەكسەرۋ بارىسىندا تاراپتار جاعدايدىڭ ەموتسيالىق اسەردەن تۋىنداعانىن اتاپ ءوتتى. ولاردىڭ ايتۋىنشا, كەيبىر سوزدەر مەن ارەكەتتەر اشۋ ۇستىندە جاسالعان جانە ولاردىڭ شىنايى ۇستانىمىن بىلدىرمەيدى», دەپ حابارلادى پوليتسيا.
سونداي-اق جانجال بارىسىندا تاراپتاردىڭ ءبىر-بىرىنە جەڭىل دارەجەدە فيزيكالىق اسەر قولدانعانى انىقتالدى.
«ەكى تاراپ ءوزارا كەشىرىم سۇراپ, تاتۋلاستى جانە بولعان جاعدايعا وكىنىش ءبىلدىردى. سونىمەن قاتار ولار ازاماتتاردى ءبىر-بىرىنە قۇرمەتپەن قاراپ, كەز كەلگەن كەلىسپەۋشىلىكتى بەيبىت جولمەن شەشۋگە شاقىردى», دەپ اتاپ ءوتتى دەپارتامەنت وكىلدەرى.
سونىمەن بىرگە تەكسەرۋ ناتيجەسىندە جانجالعا قاتىسقان تاراپتاردىڭ ارەكەتتەرىنە قۇقىقتىق باعا بەرىلدى. ەكى قاتىسۋشىعا دا ۇساق بۇزاقىلىق فاكتىسى بويىنشا اكىمشىلىك ءىس قوزعالىپ, سوت شەشىمىمەن ولار 20 اەك مولشەرىندە ايىپپۇل تۇرىندەگى اكىمشىلىك جاۋاپكەرشىلىككە تارتىلدى.
پوليتسيا تۇرمىستىق كەلىسپەۋشىلىكتەر, قارىم-قاتىناس نەمەسە ءتىل ماسەلەلەرى ەشقاشان جانجالعا, ارانداتۋعا جانە قوعامدىق ءتارتىپتى بۇزۋعا سەبەپ بولماۋى ءتيىس ەكەنىن ەسكە سالدى.
«ۇلتارالىق نەمەسە تىلدىك تاقىرىپتاردا ارانداتۋشىلىق جاساۋ – جول بەرىلمەيتىن ارەكەت جانە ول قوعامدىق قاۋىپسىزدىككە قاتەر توندىرەدى», دەپ اتاپ ءوتتى دەپارتامەنتتە.
قۇقىق قورعاۋ ورگاندارى «قوعامىمىزدىڭ نەگىزى – ءوزارا قۇرمەت, بىرلىك پەن كەلىسىم» ەكەنىن تاعى دا ەسكە سالدى.
«الماتى قالاسىنىڭ پوليتسيا دەپارتامەنتى زاڭناما اياسىندا قاتاڭ جۇمىس ىستەيدى, بارلىق ازاماتتاردىڭ زاڭ الدىنداعى تەڭدىگىن قامتاماسىز ەتەدى جانە جانجالداردى ۇيىمداستىرۋعا نەمەسە ارانداتۋعا قاتىسى بار تۇلعالار زاڭدا بەلگىلەنگەن جاۋاپكەرشىلىككە تارتىلاتىنىن ەسكەرتەدى», دەپ تولىقتىردى ۆەدومستۆو.
ايتا كەتەيىك, شىمبۇلاقتاعى «Gusto» مەيرامحاناسىندا اكىمشى قازاق تىلىندە قىزمەت كورسەتۋدەن باس تارتىپ, قوناققا دورەكى سويلەگەنى ءۇشىن سىنعا قالعان ەدى. الەۋمەتتىك جەلى قولدانۋشىسىنىڭ ايتۋىنشا, ول قازاقشا قىزمەت كورسەتە الاتىن داياشى بار-جوعىن سۇراعاندا, اكىمشى بۇعان مىندەتتى ەمەس ەكەنىن ايتىپ, دورەكى جاۋاپ بەرگەن.
