كۇرەسكەر تۇلعا, قارىمدى قالامگەر

ەسىمىن ۇلىقتاۋدى جەرلەستەرى تاعى ءبىر يگىلىكتى شارامەن اتاپ ءوتتى قىزىلجاردىڭ قۇيقالى توپىراعىنان ءوسىپ-ءونىپ, ادەبيەتتەگى وزگەگە ۇقسامايتىن ايشىقتى قولتاڭباسىمەن جەتە تانىلعان جەرلەستەرىمىزدىڭ ءبىرى سافۋان شاي­مەردەنوۆ ەكەنى ەش تالاس تۋدىرمايدى. ماعجان جۇماباەۆ, ءسابيت مۇقانوۆ, عابيت مۇسىرەپوۆ سەكىلدى تاۋ تۇلعالى اعالارىنىڭ ءىزىن باسىپ, مۇقاڭداي ۇلى تۇلعادان باتا العان, شىنايىلىق پەن شىندىقتى ۇيلەستىرە بىلگەن پروزالىق شىعارمالارى مەملەكەتتىك سىيلىقتىڭ لاۋ­رەا­تى, قازاقستاننىڭ حالىق جازۋشىسى ماراپاتتارىمەن, قوعامداعى قايراتكەرلىگى «وتان» وردەنىمەن اتاپ وتىلگەن كوركەم ءسوزدىڭ كوشەلى يەسى كوزى جۇمىلعانشا تۋعان جەرگە دەگەن پەرزەنتتىك پارىزىن وتەۋمەن بولدى. سونىڭ مىسقالداي عانا ءبىر مىسالىنا 2014 جىلى 24 جەلتوقساندا ۇكىمەتتىڭ قاۋلىسىمەن ەسىمى بە­رىلگەن پەتروپاۆل قالالىق قا­زاق گيمنازياسىنىڭ جەدەلدەتىپ سالىنۋىنا قوسقان ەرەن ۇلەسىن ايتساق تا جەتكىلىكتى. 1992 جىلى ىرگەتاسى قالانسا دا, قاراجاتتىڭ جەتىسپەۋشىلىگىنەن قۇرىلىسى توقتاپ قالعان ۇلتتىق ءبىلىم وردا­سىنا رەسپۋبليكالىق ۆەدومس­ت­­ۆو­لاردان ءتيىستى اقشانى لەزدە بولدىرتكەن بولاتىن. ءسويتىپ, 320 ورىندى گيمنازيا 1996 جىلى ەسىگىن ايقارا اشىپ, ءبىر مىڭ بالا وقيتىنداي دارەجەگە جەتتى. جاقىندا وسى مەكتەپتىڭ قابىرعاسىنا مەموريالدىق تاقتا ورناتىلدى. وندا سانالى عۇمىرىن تاۋەلسىزدىك كۇرەسىنە ارناعان ايتۋلى ازاماتتىڭ تاسقا باسىلعان سۋرەتى بەينەلەنىپ, اتاق-ماراپاتتارى جازىلعان. مەموريالدىق تاقتانىڭ اشىلۋ سالتاناتىندا سويلەگەن سوزىندە وبلىس اكىمى ەرىك سۇلتانوۆ مۇنداي ۇلىقتاۋ شارالارى الدا دا جالعاسا بەرەتىنىن جەتكىزدى. جيىندا قالالىق ارداگەرلەر كەڭەسىنىڭ مۇشەسى الەكساندر ليپوۆوي, ليتەر مەديا باسپا ءۇيىنىڭ باس ديرەكتورى سايىن ەسماعي, قازاقستان جازۋشىلار وداعى وبلىستىق ۇيىمىنىڭ توراعاسى جاراسباي سۇلەيمەنوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, عالىم سەرىك نەگيموۆ ءسوز الىپ, ەستەلىكتەر ايتتى, جىلى لەبىزدەرىن ءبىلدىردى. استانالىق ايتىسكەر اقىن سەرىكزات دۇيسەنعازى «كور­كەمسوزدىڭ جۇلدىزىن» جىرعا قوستى. مارتەبەلى مەيماندار گيم­نازيانىڭ باي مۇراجايىمەن تانىستى. جاس ونەرپازداردىڭ ءسوز زەرگەرىنىڭ 1986 جىلعى جەلتوقسان كوتەرىلىسى تۇسىنداعى بىربەتكەي, تۋراشىل مىنەزىن سومدايتىن ساح­نالىق قويىلىمىن تاماشالادى. ءومىر ەسقالي, «ەگەمەن قازاقستان». سولتۇستىك قازاقستان وبلىسى. سۋرەتتەردى تۇسىرگەن تالعات تانىباەۆ.