وقۋدى اياقتاعان 53,5 مىڭ جۇمىسسىز ازاماتتىڭ قاتارىندا تۇركىستان وبلىسى الدا تۇر. وڭىردە 3,5 مىڭ ادام ونلاين وقۋدان وتكەن. تىزىمدە قىزىلوردا, قوستاناي وبلىستارى, الماتى قالاسى مەن الماتى وبلىسى دا الدىڭعى قاتاردا. پلاتفورما ىسكە قوسىلعالى بەرى اۆتورلار ءتۇرلى باعىتتاردا 1 000-نان استام كۋرس جاريالاعان. ونىڭ ىشىندە 375 ساباق تەگىن. سونداي-اق ودان ءارى وقۋ ءۇشىن ءبىلىم بەرۋ الاڭدارىنا اۋىسۋ مۇمكىندىگىمەن Courstore, Fluent Education, ياندەكس قازاقستان سەرىكتەستەرىنىڭ كۋرستارى بار. ساباقتاردىڭ ۇزاقتىعى 6-دان 72 ساعاتقا دەيىن. وقىپ سەرتيفيكات الامىن دەگەن ادامعا ەش قيىندىعى جوق. ۇيدەن شىعىپ, وقىتاتىن اداممەن تىكەلەي جۇزدەسەمىن دەپ تە اۋرە بولمايسىز.
كەيىنگى ايلارداعى ەڭ تانىمال كۋرستاردىڭ ىشىندە «IT جانە تەلەكوممۋنيكاتسيا», «اسپاز-كونديتەر», «سەنىڭ مانساپتىق باستاماڭ: «ەلەكتروندىق ەڭبەك بيرجاسىن قالاي پايدالانۋعا بولادى», «جۇمىسشىلاردى باسقارۋ», ء«پىشۋ جانە تىگۋ» سىندى ساباقتار بار. قۋانتارلىعى, پلاتفورمادا الەۋمەتتىك قىزمەت كورسەتۋ, باسقا دا سالالارداعى ءتۇرلى ماماندىقتار جونىندەگى تەگىن كۋرستاردىڭ سانى ۇنەمى ارتىپ وتىرادى. مىسالى, بيىل جۇمىسشى ماماندىقتار جىلىنا وراي مەكتەپ تۇلەكتەرى مەن تەحنيكالىق, كاسىپتىك ءبىلىم بەرۋ ۇيىمدارىنىڭ ستۋدەنتتەرىنە «سەنىڭ مانساپتىق باستاماڭ: «ەلەكتروندىق ەڭبەك بيرجاسىن قالاي پايدالانۋعا بولادى» اتتى كۋرس ورنالاستىرىلعان. ءدال وسى ارنايى ساباقتار جاستاردىڭ ماماندىق تاڭداۋىنا جاردەمدەسەدى. ولار ساباقتا جۇمىس ىزدەپ, وزىندىك داعدىلارىن قالىپتاستىرۋدى ۇيرەنەدى. سونداي-اق ەلەكتروندىق ەڭبەك بيرجاسىنىڭ قۇرالدارىن ءتيىمدى قولدانىپ, بوس جۇمىس ورىندارىن تابۋ, بىلىكتىلىكتى ارتتىرۋ, باسقا دا مۇمكىندىكتەردى ەرتە باستان ءبىلىپ وسەدى. بۇگىندە 375 مىڭنان استام مەكتەپ وقۋشىسى مەن ستۋدەنت اتالعان وقىتۋدان وتكەن.
نەگىزى پلاتفورما حالىقتىڭ ءبىلىم دەڭگەيى مەن كاسىبيلىگىن ارتتىرۋعا, مانساپتىق دامۋدى ىنتالاندىرۋعا, ء«ومىر بويى وقىتۋ» تۇجىرىمداماسىن ىلگەرىلەتۋگە باعىتتالعان. ءارى جۇيە قىزمەتتەر نارىعى قاعيداتىنا سايكەس ونلاين كۋرستارعا قول جەتكىزۋدى ۇسىناتىن حالىقارالىق وقىتۋ الاڭدارىنا ۇقساس قۇرىلعان. وقۋ ەلەكتروندىق ەڭبەك بيرجاسىنداعى «ونلاين وقىتۋ» بولىمىندە قولجەتىمدى. پلاتفورمادا ەل ازاماتتارى وقىتۋدىڭ ءتىلىن, ماتەريالدى بەرۋدىڭ ىڭعايلى ءتارتىبىن وزدەرى دەربەس تاڭدايدى. ءبىلىم بەرۋ ۇدەرىسىندە ءوزىنىڭ قالاي ىلگەرىلەپ جاتقانىن دا باقىلاي الادى. جۇيەنىڭ ءبىلىم الۋشىعا ارتىقشىلىعى كوپ. مىسالى, كەڭەيتىلگەن كۋرستاردى ىزدەۋ جەڭىل ءارى كۋرس اۆتورلارىمەن جىلدام حابار الماسۋعا بولادى. جاساندى ينتەللەكت كومەگىمەن چات-بوت تا قولجەتىمدى.
ەسكەرەتىن جايت, وقۋ اياقتالعان سوڭ ءبىلىم الۋشى 70% شەكتى دەڭگەيمەن تەست تاپسىرۋعا ءتيىس. تەستىلەۋدەن ءساتتى ءوتىپ, ونلاين كۋرستى اياقتاعان جاعدايدا عانا داعدىلاردى يگەرگەنى تۋرالى سەرتيفيكات بەرىلەدى. كۋرس اياقتالعاننان كەيىن ءبىلىم الۋشىلاردىڭ كۋرستى باعالاۋى دا مىندەتتى تالاپتاردىڭ ءبىرى.
پلاتفورمانىڭ تاعى ءبىر ارتىقشىلىعى, وقۋدان ءساتتى وتكەنىڭىزدى راستايتىن سەرتيفيكاتتى جۇكتەۋ بارىسىندا يگەرگەن داعدىڭىزعا قاراي Enbek.kz-تە بوس جۇمىس ورىندارىنا قاتىستى ۇسىنىستار شىعادى. ول سەرتيفيكات ەلەكتروندىق ەڭبەك بيرجاسىنا تىركەلگەندە ءبىلىم الۋشى جاساعان تۇيىندەمەدە دە اۆتوماتتى تۇردە كورسەتىلەدى.
