فوتو: اشىق دەرەككوزدەن
جاڭاجىلدىق مەرەكە كۇندەرى ەلىمىزدە قوعامدىق ءتارتىپتى قورعاۋ جانە ءورت قاۋىپسىزدىگىن باقىلاۋ كۇشەيتىلىپ, رەزەرۆتىك كۇشتەر ازىرلەنەدى. ىشكى ىستەر ءمينيسترىنىڭ ورىنباسارى يگور لەپەحا كوشەلەردەگى پوليتسيا پاترۋلدەرى كوبەيىپ, ستراتەگيالىق نىساندار مەن ازاماتتار كوپ جينالاتىن ورىنداردا تاۋلىك بويى كەزەكشىلىك ۇيىمداستىرىلاتىنىن ايتتى.
مەرەكە قارساڭىندا وڭىرلەردە مىڭنان استام بۇقارالىق ءىس-شارا جوسپارلانعان. ولاردىڭ باسىم بولىگى بالالاردىڭ قاتىسۋىمەن وتەدى. وسىعان بايلانىستى پرەمەر-مينيستر ىشكى ىستەر مينيسترلىگىنە توتەنشە جاعدايلار مينيسترلىگىمەن بىرلەسە وتىرىپ, جوسپارلانعان ءىس-شارالاردىڭ قاۋىپسىز ءوتۋىن قامتاماسىز ەتۋ ءۇشىن قاجەتتى شارالاردى قابىلداۋدى جانە تاۋلىك بويى پاترۋلدىك, كەزەكشى قۇرامنىڭ جۇمىسىن ۇيىمداستىرۋدى تاپسىردى.
ء«بىزدىڭ مىندەتىمىز ءىس-شارالار وتەتىن جەرلەردە قۇقىق بۇزۋشىلىقتار مەن قىلمىستاردىڭ الدىن الۋ جۇمىستارىن قامتاماسىز ەتۋ. كوشەلەر مەن قوعامدىق ورىنداردا قىلمىستاردىڭ پروفيلاكتيكاسىنىڭ ءتيىمدى جۇيەسىن قۇرعان ءجون. جاعدايدى باقىلاۋعا الىپ, ونىڭ ىشىندە بەينەكامەرالار ارقىلى ۆيزۋالدى باقىلاۋ ۇيىمداستىرۋ قاجەت. قاجەت بولعان جاعدايدا وقيعالارعا شۇعىل ارەكەت ەتۋ شارالارىن قامتاماسىز ەتىڭىزدەر. سونداي-اق ادامدار كوپ جينالاتىن نىسانداردا لاڭكەستىك شابۋىلداردىڭ الدىن الۋ ءۇشىن كەشەندى پروفيلاكتيكالىق شارالار قابىلدانسىن. ءىىم مەن تجم-عا كۇشەيتىلگەن رەجيمدە جۇمىس ىستەۋ تارتىبىنە كوشۋدى تاپسىرامىن», دەپ تاپسىردى پرەمەر-مينيستر.
مەرەكە كۇندەرى ءورت قاۋىپسىزدىگىن قامتاماسىز ەتۋ ماسەلەسىنە دە كوڭىل اۋدارىلدى. ءىس-شارالاردىڭ باسىم بولىگى ادامدار كوپ جينالاتىن نىسانداردا, سونداي-اق ويىن-ساۋىق جانە قوعامدىق ورىنداردا وتەدى. شارالاردا پيروتەحنيكالىق ونىمدەر دە قولدانىلادى. بۇگىندە اينالىمنان 700 بىرلىكتەن استام جانە 97 قوراپ سەرتيفيكاتى جوق پيروتەحنيكا الىنعان. مەرەكە قارساڭىندا تاعى ءبىر رەت «قۇقىقتىق ءتارتىپ» پروفيلاكتيكالىق ءىس-شارالارىن وتكىزۋ تاپسىرىلىپ وتىر. ونىڭ اياسىندا پيروتەحنيكالىق ونىمدەردى ساقتاۋ جانە ساتۋ ورىندارىنا رەيدتەر ۇيىمداستىرىلادى.
تجم ماماندارى ادامدار كوپ جينالاتىن 7 مىڭنان استام نىساندى تەكسەرگەن. سونداي-اق مەرەكەلىك ىس-شارالار وتكىزىلەتىن ورىندار تەكسەرىلىپ, پايدالانۋعا رۇقسات بەرىلگەن.
حالىقتىڭ الەۋمەتتىك وسال ساناتىنداعى ازاماتتار تۇراتىن تۇرعىن ۇيلەردە ورتكە قارسى داتچيكتەردى مونتاجداۋ جۇمىستارى جالعاسىپ جاتىر. قازىرگى ۋاقىتتا تۇرعىن ۇيلەردە 36 مىڭنان استام قورعانىس قۇرىلعىلارى ورناتىلعان.
مەرەكە كۇندەرى قالا ىشىندە دە, شىعابەرىس جولدارىندا دا اۆتوموبيل ترافيگى ارتاتىنى دا ءسوزسىز. سوندىقتان اۆتوموبيل جولدارىندا ەرەكشە باقىلاۋ ورناتىلعان. ماماندار اۋا رايى ناشارلاعان جاعدايدا قۇتقارۋ جۇمىستارىن پىسىقتادى. ال اۆتوجولداردا جىلىتۋ ورىندارى جابدىقتالعان, ارنايى تەحنيكا مەن اۆياتسيا جەدەل دەن قويۋ رەجيمىنە اۋىستىرىلعان.
وڭىرلەردە بالالاردى تاسىمالداۋدا مىندەتتى تۇردە پوليتسيا قىزمەتكەرلەرى بىرگە ەرىپ جۇرۋگە ءتيىس. اكىمدەرگە بۇل ماسەلەنى ەرەكشە باقىلاۋعا الۋ تاپسىرىلدى.
ء«وڭىر اكىمدىكتەرىنە الداعى مەرەكەلەردى قاۋىپسىز وتكىزۋ بويىنشا كەشەندى پروفيلاكتيكالىق شارالاردى قابىلداۋدى تاپسىرامىن. ەنەرگەتيكا مينيسترلىگى اكىمدىكتەرمەن بىرلەسىپ, ەنەرگەتيكالىق وبەكتىلەردە قاۋىپسىزدىكتى جانە ولاردىڭ اقاۋسىز جۇمىس ىستەۋىن قامتاماسىز ەتسىن. جىلىتۋ جانە سۋمەن جابدىقتاۋ جۇيەلەرىنىڭ بارلىق پارامەترلەرىن ساقتاپ, جەدەل ارەكەت ەتۋ ءۇشىن جوندەۋ بريگادالارىنىڭ كەزەكشىلىك كەستەسىن جاساۋ قاجەت. جالپى العاندا بارلىق مەملەكەتتىك ورگان مەن قۇرىلىم مەرەكە كۇندەرىن ءساتتى جانە تىنىش وتكىزۋ ءۇشىن جان-جاقتى شارالار قابىلداۋى كەرەك», دەدى ولجاس بەكتەنوۆ.
