دەپۋتات تيمۋر قىرىقباەۆتىڭ ايتۋىنشا, ماسەلە تەك كاسىپكەرلىكتى قولداۋ شەڭبەرىمەن شەكتەلمەيدى. بۇل قاراپايىم ازاماتتاردىڭ كۇندەلىكتى تۇرمىسىنا تىكەلەي اسەر ەتەتىن جۇيە. ونىڭ سوزىنشە, تالقىلاۋ كەزىندە ۇكىمەتتىڭ قولداۋ ساياساتى جاريالانعان ماقساتتارعا قانشالىقتى سايكەس كەلەتىنى دە سۇراق استىندا قالعان.
«تالقىلاۋ بارىسىندا ۇكىمەتتىڭ بيزنەستى سۋبسيديالاۋ ساياساتىنىڭ ناقتى ناتيجەسى, ونىڭ جاريالانعان ماقساتتارعا سايكەستىگى جانە ەڭ باستىسى – بۇل شارالاردىڭ قاراپايىم ازاماتتاردىڭ تۇرمىسىنا قانشالىقتى اسەر ەتىپ وتىرعانى جونىندە وتكىر ءارى ورىندى سۇراقتار قويىلدى», دەيدى دەپۋتات.
تۇراقتاندىرۋ قورلارىنىڭ باستاپقى ماقساتى ورىندالماي وتىر
تۇراقتاندىرۋ قورلارى 2011-2012 جىلدارى باعا قۇبىلعان كەزەڭدە نارىققا جەدەل ارالاسۋ ءۇشىن قۇرىلعان. نەگىزگى مىندەت - الەۋمەتتىك ماڭىزى بار ازىق-ت ۇلىك باعاسىنىڭ كۇرت وسۋىنە جول بەرمەۋ. الايدا اۋديت ناتيجەسى بۇل تەتىكتىڭ قازىرگى جاعدايدا ءتيىمدى جۇمىس ىستەمەي وتىرعانىن كورسەتكەن.
جوعارى اۋديتورلىق پالاتانىڭ دەرەكتەرىنە سايكەس, الەۋمەتتىك-كاسىپكەرلىك كورپوراتسيالاردىڭ باعانى تۇراقتاندىرۋ پروتسەسىنە قاتىسۋى ناقتى ناتيجە بەرمەگەن. سونىڭ سالدارىنان ءبىر جىل ىشىندە كارتوپ باعاسى شامامەن 40 پايىزعا, پياز 20 پايىزعا وسكەن. بۇل جۇيەلى جوسپارلاۋ مەن باسقارۋدىڭ السىزدىگىن اڭعارتادى.
ءونىم قويمادا, ال دۇكەن سورەسىندە تاپشىلىق
ەڭ الاڭداتارلىق جايتتاردىڭ ءبىرى – بيۋدجەت قارجىسىنا ساتىپ الىنعان ءونىمنىڭ حالىققا جەتپەي, قويمالاردا بۇزىلىپ جاتۋى. باسەكەلەستىكتى قورعاۋ جانە دامىتۋ اگەنتتىگىنىڭ مالىمەتىنشە, سوڭعى ەكى جىلدا ساتىپ الىنعان ءونىمنىڭ نەبارى 19 پايىزى عانا ساتىلعان. قالعان بولىگى 2021 جىلدان بەرى قويمالاردا ساقتالىپ, باعانى تۇراقتاندىرۋ مىندەتىن اتقارماعان.
بۇل جاعداي وڭىرلەردە دە كورىنىس تاۋىپ وتىر. ماسەلەن, قىزىلوردا وبلىسىندا تۇراقتاندىرۋ قورى قويمالارىندا 1,8 ملرد تەڭگەنىڭ ءونىمى ەسەپتە تۇرعانىمەن, الەۋمەتتىك دۇكەندەردە ەت پەن ءسۇت ونىمدەرى جەتىسپەيدى. سونىمەن قاتار كەيبىر وڭىرلەردە بولىنگەن قارجى اينالىمنان شىعارىلىپ, دەپوزيتتەرگە ورنالاستىرىلعانى انىقتالعان.
جاڭا مودەل قاجەت
جوعارى اۋديتورلىق پالاتا قازىرگى فورماتتا الەۋمەتتىك-كاسىپكەرلىك كورپوراتسيالاردىڭ باعانى تۇراقتاندىرۋ تەتىكتەرىنە قاتىسۋى ورىندى ەمەس ەكەنىن اتاپ ءوتتى. سەبەبى ءونىمدى قاشان, قانداي كولەمدە جانە قانداي جاعدايدا نارىققا شىعارۋ كەرەگى الدىن الا جوسپارلانبايدى.
تالقىلاۋ قورىتىندىسىندا ءماجىلىس دەپۋتاتتارى ۇكىمەتكە تۇراقتاندىرۋ قورلارى مەن الەۋمەتتىك-كاسىپكەرلىك كورپوراتسيالاردىڭ تيىمدىلىگىنە كەشەندى باعا بەرۋدى ۇسىندى. نارىققا شىعۋ ۋاقىتى, كولەمى جانە ناتيجەسى ناقتى ولشەنەتىن, اشىق ءارى تۇسىنىكتى تەتىكتەر ەنگىزىلۋى ءتيىس. اكىمدىكتەر وڭىرلىك ەرەكشەلىكتى ەسكەرىپ, ومىرشەڭ ۇسىنىستار ازىرلەۋى قاجەت.
