جاڭا مەكتەپتەردىڭ اشىلۋى اۋدانداعى ءۇش اۋىسىمدا وقۋ, اپاتتى جانە ەسكى عيماراتتاردا ءبىلىم بەرۋ ماسەلەلەرىن شەشۋگە ناقتى سەرپىن بەردى. بۇل ەڭ الدىمەن وقۋشىلاردىڭ دەنساۋلىعى مەن ءبىلىم ساپاسىنا وڭ اسەر ەتىپ, پەداگوگتەردىڭ زاماناۋي تالاپتارعا ساي جۇمىس ىستەۋىنە مۇمكىندىك تۋعىزدى. ۇلتتىق جوبا تەك جاڭا عيماراتتار سالۋمەن شەكتەلمەي, اۋىل مەن قالا اراسىنداعى ءبىلىم ساپاسىن تەڭەستىرۋگە, بالالاردىڭ قابىلەتىن اشۋعا جانە ۇستاز ەڭبەگىن قولداۋعا باعىتتالعان ماڭىزدى باستاما بولىپ وتىر.
ساۋران اۋدانى ءبىلىم ءبولىمىنىڭ باسشىسى عاني باقىت ۇلىنىڭ ايتۋىنشا, «كەلەشەك مەكتەپتەرى» – بولاشاق ۇرپاقتىڭ زياتكەرلىك الەۋەتىن ارتتىرۋعا ارنالعان كەشەندى جوبا.
«بۇل مەكتەپتەر – بالالاردىڭ قاۋىپسىز, جارىق ءارى زاماناۋي ورتادا ءبىلىم الۋىنا جاسالعان ناقتى جاعداي. سونىمەن قاتار مۇعالىمدەر ءۇشىن دە جاڭا مۇمكىندىكتەر اشىلدى. زەرتحانالارمەن, STEM جانە روبوتوتەحنيكا كابينەتتەرىمەن جابدىقتالعان مەكتەپتەر ۇستازداردىڭ كاسىبي شەبەرلىگىن شىڭداپ, وقىتۋ ۇدەرىسىنىڭ ساپاسىن ارتتىرۋعا مۇمكىندىك بەرەدى», دەدى ول.
ەڭبەكشى ديقان اۋىلىندا اشىلعان 600 ورىندىق №4 جالپى ءبىلىم بەرەتىن مەكتەپ بىرنەشە ەلدى مەكەندەگى وقۋشى جۇكتەمەسىن ازايتىپ, ءۇش اۋىسىمدا وقۋ قاۋپىن جويدى. بۇگىندە مەكتەپ ءبىر اۋىسىمدا جۇمىس ىستەپ, جۇزدەگەن بالانىڭ ساپالى ءبىلىم الۋىنا جاعداي جاساپ وتىر. ال س.قوجانوۆ اۋىلىندا بۇرىن اپاتتى جاعدايدا بولعان ەسكى سامان مەكتەپتىڭ ورنىنا 300 ورىندىق جاڭا مەكتەپ سالىنۋى اۋىل بالالارى ءۇشىن قاۋىپسىز ءارى قولايلى ءبىلىم كەڭىستىگىن قالىپتاستىردى. سونداي-اق شورناق اۋىلىنىڭ اشا ەلدى مەكەنىندە اشىلعان №5 جالپى ءبىلىم بەرەتىن مەكتەپ كورشىلەس ءبىلىم بەرۋ ۇيىمدارىنداعى ءۇش اۋىسىم ماسەلەسىنىڭ الدىن الىپ, وقۋشىلاردى زاماناۋي ماتەريالدىق-تەحنيكالىق بازامەن قامتۋعا مۇمكىندىك بەردى.
ۇلتتىق جوبا اياسىندا بوي كوتەرگەن بۇل مەكتەپتەردە فيزيكا, حيميا, بيولوگيا زەرتحانالارى, IT, روبوتوتەحنيكا, STEM كابينەتتەرى, سپورت جانە شىعارماشىلىق زالدارى تولىق جابدىقتالعان. مۇنداي مۇمكىندىكتەر وقۋشىلاردىڭ جان-جاقتى دامۋىنا, ال پەداگوگتەردىڭ جاڭا ادىستەرمەن ناتيجەلى جۇمىس ىستەۋىنە جول اشىپ وتىر. ساۋران اۋدانىندا جۇزەگە اسىرىلعان «كەلەشەك مەكتەپتەرى» ۇلتتىق جوباسى – بالالار بولاشاعىنا سالىنعان بەرىك نەگىز ءارى ۇستاز ەڭبەگىنە كورسەتىلگەن ناقتى قولداۋدىڭ جارقىن كورىنىسى.
