سۋرەت: naryntany.kz
ەڭبەك جولىم الماتى وبلىسى, ىلە اۋدانىنداعى «بەنت» جشس زاۋىت اسحاناسىندا اسپاز كومەكشىسى بولىپ ەڭبەك ەتۋدەن باستالدى. كەيىن شپال تسەحىندا مەتالل قالىپتاردى تازالاۋ, مايلاۋ جۇمىستارىن اتقارىپ, ءوندىرىستىڭ جاۋاپتى ۇدەرىسىنە ارالاستىم. ۋاقىت وتە كەلە كران ماشينيستەرىن وقىتۋ سىندى ماڭىزدى مىندەت سەنىپ تاپسىرىلدى. سول ساتتەن باستاپ ءوز ىسىمە بار كۇش-جىگەرىمدى ارناپ, وسى سالادا تاباندى ەڭبەك ەتىپ كەلەمىن.
بۇگىندە كاسىبي بىلىكتىلىگىمدى ارتتىرۋ – باستى ماقساتىم. 10-15 جىلدىق ەڭبەك ءوتىلى بار ارىپتەستەرىمنىڭ اقىل-كەڭەسىن تىڭداپ, تاجىريبەمدى تولىقتىرىپ وتىرامىن. وندىرىستەگى ءاربىر كۇنىم – شىڭدالۋ مەن ءوسۋ مەكتەبى. ادال ەڭبەك ەتكەن ادامنىڭ وتباسى, جورا-جولداسى مەن ورتاسىندا دا ابىرويى ارتىپ, زور قۇرمەتكە يە بولاتىنىن از ۋاقىتتاعى تاجىريبەمدە ايقىن سەزىندىم.
مەن ۇلكەن ءارى تاتۋ وتباسىندا ءوستىم. اتا-انام, اتا-اجەم, باۋىرلارىممەن بىرگە ءبىر شاڭىراق استىندا تاربيەلەنىپ, ەڭبەكقورلىق پەن جاۋاپكەرشىلىكتى بالا كەزدەن بويىما ءسىڭىردىم. وتباسىم – ەڭ باستى تىرەگىم, ەڭبەكتەگى كۇش-قۋاتىمنىڭ قاينار كوزى. بوس ۋاقىتىمدا تازا اۋادا سەرۋەندەپ, كۇندەلىكتى ەڭبەكتەن سەرگىپ, جاڭا كۇش جيناۋعا تىرىسامىن. بۇل الداعى ماقساتتارىما سەنىممەن قادام باسۋعا كومەكتەسەدى.
جۇمىسشى ماماندىقتار جىلى اياسىندا قاراپايىم ەڭبەك ادامدارىنىڭ ەڭبەگى ەل كولەمىندە لايىقتى باعالانىپ جاتقانىنا شىن جۇرەكتەن قۋانىشتىمىن. وسى ورايدا ەڭبەك ادامىنىڭ مارتەبەسىن ارتتىرۋعا باعىتتالعان باستامالارى ءۇشىن مەملەكەت باسشىسىنا العىسىمدى بىلدىرەمىن. ەڭبەككە كورسەتىلگەن قۇرمەت – وتان بولاشاعىنا سالىنعان بەرىك نەگىز.
ديلفۋزا باقىتجانوۆا,
«فيرما «بەنت» جشس كرانشىسى, «ەرەن ەڭبەگى ءۇشىن» مەدالىنىڭ يەگەرى
الماتى وبلىسى,
ىلە اۋدانى
