– بۇگىن ءبىز بىرنەشە تۇرعىن ءۇيدىڭ كىلتىن ءبىر مەزەتتە تاپسىرىپ وتىرمىز. بۇل – اۋدان تۇرعىندارىنىڭ تۇرعىن ءۇي ماسەلەسىن كەزەڭ-كەزەڭىمەن شەشۋدەگى ماڭىزدى قادام, – دەدى اۋدان باسشىسى ءسابيت وسپانوۆ.
2023-2029 جىلدارعا ارنالعان تۇرعىن ءۇي-كوممۋنالدىق ينفراقۇرىلىمدى دامىتۋ تۇجىرىمداماسى اياسىندا سالىنعان بەس قاباتتى, 80 پاتەرلى تۇرعىن ءۇي اباي قالاسىنىڭ 30ا شاعىن اۋدانىندا ورنالاسقان. اتالعان ۇيدەگى پاتەرلەر يپوتەكالىق نەسيەلەۋ باعدارلامالارى ارقىلى بەرىلۋدە.
سونداي-اق جەڭىس داڭعىلىنداعى № 7/2 بەس قاباتتى تۇرعىن ءۇي مەن تولاعاي تۇيىعىنداعى ءبىر قاباتتى ۇيلەر جەكە قۇرىلىس سالۋشىلاردان ساتىپ الىنىپ, الەۋمەتتىك وسال ساناتقا جاتاتىن ازاماتتارعا ءبولىندى.
كوپبالالى انا ايجان جۇكەنوۆا تۇرعىن ءۇي كەزەگىندە شامامەن 10 جىل تۇرعان.
– بۇگىن ءبىز ءۇشىن ەرەكشە قۋانىشتى كۇن. ەندى ەكى وتباسىعا ارنالعان جەر ۇيدە تۇراتىن بولامىز. بۇل ۇيلەردىڭ قالاي سالىنىپ جاتقانىن ءوز كوزىممەن كورىپ, وسىنداي باسپانا بۇيىرسا ەكەن دەپ ارماندادىم. مۇندا جولدار اسفالتتالعان, ورتالىق جىلۋ جۇيەسى مەن كارىز جۇرگىزىلگەن, پاتەردىڭ جوسپارى دا وتە ىڭعايلى. بالالارىممەن بىرگە جايلى ءومىر سۇرەمىز, – دەدى ول.
اباي اۋدانىندا تۇرعىنداردى قولجەتىمدى ءارى جايلى باسپانامەن قامتاماسىز ەتۋ جۇمىستارى الداعى ۋاقىتتا دا جۇيەلى تۇردە جالعاسىن تاباتىنى اتاپ ءوتىلدى.
قاراعاندى وبلىسى
قاسىمحان عالىم
