تۇركيادا ليۆيا ۇشاعى اپاتقا ۇشىرادى

ۇشاق راداردان جوعالىپ, بايلانىس ۇزىلگەن

تۇركيانىڭ ىشكى ىستەر ءمينيسترى الي ەرليكايانىڭ مالىمەتىنشە, 9H-DFJ بورتتىق ءنومىرلى Falcon 50 ۇشاعى انكارا اۋەجايىنان 20:10-دە ليۆيا استاناسى تريپوليگە باعىت العان. ۇشۋ كەزىندە ەكيپاج حايمانا اۋدانى ماڭىندا شۇعىل قونۋعا سۇرانىس ءبىلدىرىپ, كوپ ۇزاماي بايلانىسقا شىقپاي قالعان. ساعات 20:52-دە ۇشاقپەن بايلانىس تولىق ۇزىلگەن.

كەيىن جاندارمەريا بولىمشەلەرى اۋە كەمەسىنىڭ قالدىقتارىن حايمانا اۋدانىنداعى كەسيككاۆاك اۋىلىنان وڭتۇستىككە قاراي 2 شاقىرىم جەردەن تاپقان.

بورتتا 8 ادام بولعان

اپات كەزىندە ۇشاقتا 8 ادام, ونىڭ ىشىندە ليۆيا باس شتابىنىڭ باستىعى موحاممەد الي احمەد ال-حادداد بولعان. ول سول كۇنى انكاراعا رەسمي ساپارمەن بارعان.

ليۆيا پرەمەر-ءمينيسترى ابدەل حاميد دبەيبا ال-حاددادتىڭ قازا تاپقانىن راستادى. ونىڭ ايتۋىنشا, ۇشاقتا سونداي-اق ليۆيا قۇرلىق اسكەرلەرىنىڭ قولباسشىسى, اسكەري ءوندىرىس باسقارماسىنىڭ ديرەكتورى, باس شتاب باستىعىنىڭ كەڭەسشىسى مەن فوتوگرافى, 3 ەكيپاج مۇشەسى بولعان. بارلىعى قازا تاپقاندار قاتارىندا دەپ ەسەپتەلىپ وتىر.

الدىن الا سەبەپ جانە تەرگەۋ

الدىن الا مالىمەتتەرگە سايكەس, اپاتقا تەحنيكالىق اقاۋ سەبەپ بولۋى مۇمكىن. قازىر وقيعانىڭ ءمان-جايىن انىقتاۋ ءۇشىن تەرگەۋ جۇرگىزىلىپ, ىزدەستىرۋ-قۇتقارۋ جۇمىستارى جالعاسىپ جاتىر.

ليۆيادا ازا تۇتۋ جاريالاندى

وسى قايعىلى وقيعاعا بايلانىستى ليۆيا ۇكىمەتى 3 كۇنگە سوزىلاتىن رەسمي ازا تۇتۋ كۇندەرىن جاريالادى. ايتا كەتەلىك, 24-25 جەلتوقسان كۇندەرى ەلدە تاۋەلسىزدىك كۇنىنە ارنالعان مەرەكەلىك ءىس-شارالار وتپەك بولعان.